بەرپرسەکێ ئاسایشا کەرکووک: تیرۆرستان ناڤێن خوە وەکو ئاوارە د ناڤ کەرکووکێ دا تۆمارکربوون
ئەڤرۆ:
شەڤا ئەینی تیرۆرستێن داعشێ ژ چەند لایەکاڤە ل باشوورێ باژێڕێ کەرکووکێ ودناڤ باژێڕێ کەرکووکێ ھێرش کرە سەر ھێزێن پێشمەرگەی و باژێڕێ کەرکووکێ و پشتی دو رۆژان پێشمەرگە شیان داعشێ بشکێنن و ھژمارەکا زۆرا تیرۆرستێن داعش بکوژن، بەرپرسەکێ ئاسایشا پارتی ل کەرکووکێ دبێژیت، مە بەری نوکە پێزانین ل سەر ھاتنا داعش بۆ کەرکووکێ ھەبوون، چونکو داعش ناڤێن خوە وەکو ئاوارە تۆمارکرینە و ھاتینە ناڤا باژێڕێ کەرکووکێ.
عەقید ئیدریس رەفعەت، بەرپرسێ حەرەکاتا ئاسایشا کەرکووکێ بۆ ئەڤرۆ گۆت” ھەر ژ دەستپێکا شەڕێ داعشێ، مە پێزانین ل سەر ھاتنا چەکدارێن داعش بۆ ناڤ باژێڕێ کەرکووکێ ھەبووینە، پتریا وان ژی بناڤێ ئاوارەیێ ھاتینە، ئاریشە ئەوە پتریا خالێن پشکنینێ یێن دھێنە ناڤا کەرکووکێ دا ژلایێ ھێزێن ئەمنی یێن عیراقێ دھێنە رێڤەبرن، راستە پشکەکا وان ھێزا کوردن، بەلێ زۆر ھەنە ژی عەرەبن و خەلکێ دەرڤەی کەرکووکێ نە، مادەم عەرەبن، ئەڤە ژ ھاتنا وەلاتیێن عەرەب بۆ ناڤا کەرکووکێ دێ چاڤێن خوە گرن، ددەمێ ھاتنا ئاواران ژی خەلک ھەبوویە داعشبوویە و خوە بناڤێ ئاوارەیێ تۆمارکریە و نوکە ل باژێڕێ کەرکووکێ دژین”.
عەقید ئیدیریسی گۆت ژی” رۆژێن بۆری مە پیزانین ھەبوون داعش کەفتینە ناڤا ئاوارەیان و ئەڤ کەسێن خوە د ئوتێلا کەرکووکێ دا ئاسێ کری و شەڕکری، خەلکێ گوندەکێ چیایێ حەمرینن و بناڤێ ئاوارەیێ ھاتینە کەرکووکێ، بەلێ ھەموو ھاتینە کوشتن و بزاڤێن وان بۆ گرتنا کەرکووکێ شکەستن ئینا ، نوکە رەوش یا ئارامە و ئالۆزیێن ب ئەگەرێ ھێرشا رۆژا ئەینیێ چێبووین ھاتینە کۆنتڕۆلکرن و رەوشا ئەمنی سەدێ سەد ژلایێ ھێزێن ئەمنی و ئاسایشێ ڤە ھاتیە پاراستن و ھێزەکا زۆرا پێشمەرگەی ژی ھاتیە دەڤەرێ”.
ژلایەکێ دیڤە ژێدەرەکێ ئاگەھدار ل رەوشا کەرکووکێ بۆ رۆژناما ئەڤرۆ دیارکر، رەوش یا باشە، زیانێن مەزن یێن گەھشتینە تیرۆرستان، لێ دو فەرماندێن ھێزێن پێشمەرگەی ھاتینە شەھیدکرن ژوان عەمید شێرکو و لیوا حسێن مەنسوور فەرماندێ ھێزا دو یا پشتەڤانی، ئەڤە ژبلی شەھید و برینداربوونا ھژمارەکا پێشمەرگەیێن کوردستانێ، بەلێ د ھەمبەر دا ھژمارەکا زۆرا تیرۆرستێن داعشێ ھاتینە کوشتن و تەرمێن وانژی کەفتینە بن دەستێ پێشمەرگەی”.
گوت ژی” ئەو گوندێن ژلایێ داعش ھاتینە گرتن وەکی، مەلا عەبدولا و مەکتەب خالید و مەھرەوان و مریەم بەگ و چەند جھێن دی، ژلایێ ھێزێن پێشمەرگەی ھاتینەڤە رزگارکرن و نوکە پێشمەرگە تێدایە و داعش پاشڤەچوویە بۆ جھێ خوە یێ بەرێ”.
