سه‌روه‌ریا قانوونێ
زه‌نون سلێڤانه‌ی ـ زاخۆ
هندی مه مێژوویا ملله‌تان خواندی و بۆ مه هاتیه ڤه‌گێران و مه ب چاڤ دیتی، قانوون سه‌روه‌ره و هه‌ر كه‌سێ زێده‌گاڤیان بكه‌ت، دزو گه‌نده‌ل بیت، قانوون ل ێپێچینێ د گه‌ل دا دكه‌ت و ئه‌و نه‌بیت ئه‌ڤێ خوه ژ قانوونێ ڤه‌دزیت یان كو قانوون ل ده‌ف وان سه‌روه‌ره و مافێ هه‌ڤوه‌لاتیبوونێ یێ پاراستیه و دیڤچوون ل بچووكترین تشت دهێته‌كرن. ژ پێخه‌مه‌ت هه‌می تشته‌ك باش پرێڤه بچن و كه‌س ژ ده‌رڤه‌ی قانوونێ نه‌مینیت و رێ ل دز و گه‌نده‌ل و مافیان بهێته گرتنێ.
به‌لێ ژ قه‌ده‌را مه، ل جه‌م مه ژی ل هه‌رێما كوردستانێ، د ماوێ ڤان بیست و هه‌شت سالێن ده‌ربازبوویێ دا به‌روڤاژێ ڤێ چه‌ندێ یه، ئانكو خه‌لك و هه‌ڤوه‌لاتیین بێ ماف و بێ ده‌ستهه‌لات، ژ كریارێن نه‌هنگێن دز و گه‌نده‌لكاران دترسن، نه ژ قانوونێ.
له‌ورا ئه‌ڤرۆ نه‌دادی و نه وه‌كهه‌ڤی د هه‌می جۆمگه‌یان دا دهێته دیتن، هه‌ڤوه‌ڵاتی هه‌ست دكه‌ت مافێن وی دهێنه خوارن و جوداهیه‌ك د ناڤبه‌را وی و كه‌سه‌كێ دی دا هه‌یه.
هه‌لبه‌ت ئه‌و ژی ڤه‌دگه‌رت بۆ ده‌ستهه‌لاتا كوردی و دڤێت هه‌ر چ زوویه قانوون رۆلێ خوه ب دروستاهی بگێریت و یا سه‌روه‌ر بیت و ده‌ستهه‌ڵاتا دادوه‌ریێ یا سه‌ربه‌خوه بیت و داواكارێ گشتی ب رۆلێ خوه یێ دروست رابیت و كه‌س خوه ژ قانوونێ بلندتر نه‌بینیت، تاكه ده‌ربازبوونا مه ژی دڤێت هه‌ر ئه‌ڤ چه‌نده بیت و خه‌لك ژ قانوونێ بترسن نه‌ك دزو گه‌نده‌ڵان.
