سۆران عه‌لى: دێ ب هه‌موو زاراڤێن كوردى سترانان بێژم
ئه‌ڤرۆ نیوز، زنار تۆڤى:
سترانبێژێ گه‌نج سۆران عه‌لى قه‌ره‌داغى، كو نوكه ل باژێرێ سلێمانیێ دژیت، د دیداره‌كێ دا بۆ ئه‌ڤرۆ نیوز دیار كر: وى ل سالا 2010 ده‌ست ب كارێ هونه‌رى كریه، د ئه‌ڤ ساله دا وى ئێكه‌م كلیپا خوه یا ب ناڤێ ” تۆم خۆش ئه‌وێ” كو په‌یڤێن ڤێ سترانێ یێن هه‌لبه‌ستڤان نزار ناشادى بووینه، كارێ میكس و ماسترینگێ ژ ئالیێ سیامه‌كى فه‌قى زاده ڤه بۆ هاتیه كرن، كارێ مونتاژێ و ده‌رهێنانێ و وێنه‌كرنێ ژ ئالیێ حه‌مه‌ى شه‌مۆى ڤه هاتیه كرن، ئه‌ڤ سترانه ل چیایێ ئه‌زمه‌ر ل سلێمانیێ هاتیه وێنه‌كرن.
ناڤهاتى زێده‌تر گۆت: پشتى ڤێ كلیپێ من لبه‌ره هنده‌ك كارێن دیتر تۆمار بكه‌م، هه‌روه‌سا ئه‌و حه‌ز ژ هه‌ردو سترانێن فولكلۆرى و هه‌ڤچه‌رخ دكه‌ت، دیسان من لبه‌ره ب هه‌موو زاراڤێن كوردى سترانان بێژم و ئه‌ز ڤێچه‌ندێ وه‌كو ئه‌رك دبینم، دیسان ئه‌و ئامیرێ گیتارێ ژى دژه‌نیت، ل ئاهه‌نگ و هه‌لكه‌فتان گیتارێ دژه‌نیت و سترانان ژى دبێژیت.
سۆرانى ئه‌و چه‌ند ژى ئاشكرا كر: موزیكا بیانى گه‌له‌ك كارتێكرن ل سه‌ر موزیكا كوردى كریه، هه‌روه‌سا د نوكه دا هونه‌رێ كوردى د ئاسته‌كێ ناڤنجى دایه، چونكى هه‌ر ئێك ب ره‌نگێ هه‌ره‌مه‌كى كار دكه‌ت، دیسان وه‌زاره‌تا ره‌وشه‌نبیرى ب رۆلێ خوه رانابیت و نوكه چو فلته‌ر نینن، كو به‌رهه‌مێن هونه‌رمه‌ندان تێرا ده‌رباز ببن و هه‌ر ئێك ب كه‌یفا خوه كار دكه‌ت، هه‌كه خه‌له‌تى د وان سترانان دا هه‌بن، چو حسێب بۆ نینه، هه‌روه‌سا وى لبه‌ر نینه ئو ئه‌لبۆمان چێكه‌ت و ب تنێ ئه‌و دێ سترانێن سینگل تۆمار كه‌ت، چونكى د نوكه دا چێكرنا ئه‌لبۆمان چو گرنگیا خوه نینه، دیسان مه‌زاختنه‌كا مه‌زن لێ دچیت و چو داهات بۆ هونه‌رمه‌ندى ژێ ناهێت، ژ ئالیێ مه‌عنه‌وى ژى ڤه هونه‌رمه‌ند چو مفاى ژێ نابینیت.
ل دووماهیێ ئه‌و ژى ئاشكرا كر: باشتره موزیكێن وه‌كو پۆپ و راپ و جۆرێن دیتر دناڤا موزیكا كوردى دا هه‌بن، ئه‌ڤه خۆشیه‌كا تایبه‌ت دده‌ته هونه‌ر و موزیكا كوردى، لێ دڤێت ئه‌و سترانێن پۆپ و راپ یێن دهێنه چێكرن ژى تام و روحیه‌تا كوردى دناڤ دا هه‌بیت.
