چو زیندانیێن چاكسازیا سنێله و ژنان تووشى كۆرۆنایێ نه‌بووینه
ئەڤرۆ نیوز ، زنار تۆڤى:
سه‌رۆكا لژنا ساخله‌مى و ژینگه‌هێ و كاروبارێن جڤاكى ل جڤاتا پارێزگه‌ها دهۆكێ، بۆ ئەڤرۆ نیوز دیار كر: وان وه‌كو لژنا ساخله‌میێ سه‌ره‌دانا چاكسازیا سنێله و ژنان ل پارێزگه‌ها دهۆكێ كریه، كانێ سه‌روبه‌ر و ره‌وشا وان ل گه‌ل په‌تایا كۆرۆنایێ یا چاوایه؟، پشتى وان دووڤچوون كرى، رێڤه‌به‌ریا چاكسازیێ بۆ وان دیار كریه، كو چو سنێله و ژن تووشى كۆرۆنایێ نه‌بووینه، ره‌وشا هه‌موویان یا باشه، هه‌روه‌سا چاكسازیێ بنگه‌هه‌كێ ساخله‌میێ هه‌یه و مه سه‌ره‌دانه‌كا مه‌یدانى ژى بۆ بنگه‌هێ وان یێ ساخله‌میێ كر، كو هه‌موو پێدڤیاتى و ده‌رمان لێ هه‌بوون، چو كێماسى تێدا نه‌بوون و د ڤى وارى دا وان به‌رهه‌ڤیێن باش كرینه.
دلڤین محه‌مه‌د سه‌لیم هێشتا دبێژیت: كه‌لوپه‌لێن وه‌كو ماسك و ده‌ستگوركان ژى لێ هه‌بوون، هه‌تا هه‌یڤا كانوونا ئێكێ وان تێرا خوه ئه‌و كه‌لوپه‌له هه‌نه و پێدڤى نابنێ، هه‌روه‌سا ب ره‌نگه‌كێ به‌رده‌وام خولێن هشیاركرنێ بۆ زیندانیان و كارمه‌ندێن چاكسازیێ دهێنه ڤه‌كرن، هه‌روه‌سا نوكه هه‌ر 15 رۆژان جاره‌كێ و لدووڤ رێنمایێن ساخله‌میێ كه‌سوكارێن زیندانیان دشێن سه‌ره‌دانا چاكسازیێ بكه‌ن و گرتیێن خوه ببینن، لێ نابیت خوه نێزیكى ئێك بكه‌ن و دڤێت كه‌مامه و ده‌ستگورك ل به‌ربن و دیسان ب ره‌نگه‌كێ به‌رده‌وام چاكسازى ب ده‌رمانێن دژى ڤایرۆسى دهێته ره‌شاندن و پشتى په‌یدابوونا كۆرۆنایێ قوتابخانا وان ژى هاتیه گرتن، دیسان ده‌مێ گرتیه‌كێ نوو دهێته چاكسازیێ ژى بۆ ده‌مه‌كێ دهێلنه ب تنێ هه‌تا ژێ پشت راست دبن كو كۆرۆنایێ لێ نینه، ژنوو دهێته ره‌وانه كرن بۆ ناڤ زیندانیان.
