زیان پتری ملیارە و ٥٠٠ ھزار دینارایە
ئەڤرۆ، نەوزاد ھلۆری:
٣١ جھێن گشتی ل سالا بوری ژ ئەگەرێ لەھیان خراپ بوینە و نەھاتینە چێکرن
ژ ئەگەرێ باران و لەھیان ل سالا بوری ب کوژمێ پتری ملیارەک و ٥٠٠ ھزار دیناران ٣١ جھێن گشتی و ئاڤا ل سنوورێ پارێزگەھا دھۆکێ خراپ بوینە، ھەتا نوکە نەھاتینە چێکرن ڤە، ڤێ یەکێ کێشە بۆ وەلاتیان دروستکرنە، ژ بەرکو پشکەک ژ وان راستەوخۆی گرێدای کاروبارێن رۆژانەیێن خەلکی نە.
خالد رێکانی، جێگرێ رێڤەبەرێ گشتیێ باژێرڤانیان ل پارێزگەھا دھۆکێ بۆ رۆژناما ئەڤرۆ گۆت: (ل سالا بوری ل وەرزێ بارینا باران و درۆستبوونا لەھیان ل زڤستان و بھارێ ب تایبەتی ل ھەیڤا ئادارێ، ژ ئەگەرێ بارینا بارانێن بھێز و درۆستبوونا لەھیان زیانێن زۆر ب کەرتێ گشتی و وەلاتیان ل سنوورێ باژێرڤانیێن سەر ب رێڤەبەریا گشتی یا باژێرڤانیان کەفت کو زیانێن وێ پتری ملیارەک و ٥٠٠ ھزار دیناربوون و ٣١ جھێن ئاڤەدان و گشتی و پرۆژەیان بخوڤە دگرتن، ئەڤە ژبلی وان زیانێن ب وەلاتیان و مال و حال و خانو و باخچە و جھێن وان کەفتی).
زێدەتر گۆت: (مە ھەموو زیان بۆ جھێن شولەژێ ھنارتنە داکو دووبارە جارەکا دی بھێنە چێکرن ڤە، زیانێن مولک و مالێن وەلاتیان ژی ب رێیا ناحی و قایمامیان ھاتینە خەملاندن، بەلێ جھێ داخێ یە ھەتا نوکە چوو ژ وان جھان نەھاتینە چێکرن، ئەڤ سالە دا کو زیان کێمتر بن ب ھەڤکاریا کومپانیێن پاقژکرنێ ھەموو بەرھەڤی ھاتینەکرن).
جێگرێ رێڤەبەرێ گشتیێ باژێرڤانیان ل پارێزگەھا دھۆکێ دیارکر ژی کو زورترین زیان ب قەزا ئاکرێ کەفتنە و گۆت: (زیانێن جھێن گشتی و ئاڤەدان ل سنوورێ سێمێلێ دگەھنە ٢٢٠ ملیون و ٢٠١ ھزار و ٥٠٠ دیناران کو پرانیا وان ژی دکەڤنە ناحیا مسێریکێ، ل دەڤەرا ئاکرێ ژی زیانێن باران و لەھیان دگەھنە ٤٢٨ ملیون و ٧١٧ ھزار و ٥٠٠ دینارە کو پرانیا وان ژی ل ناحیا دینارتە و کەلاتێ بوون، ل دەڤەرا ئامێدیێ ژی ٢٩١ ملیون و ٥٥٤ ھزار دینارن زیان ھەنە، دیسان ل دەڤەرا زاخۆ ژی ٢٩ ملیون و ٩٤٢ ھزار دینارن زیان ھەبوینە و ل دەڤەرا شێخان ژی ١٢ ملیون و ٣٠٠ ھزار دیناران، دیسان ل سنوورێ باژێرڤانێن سەر ب قەزا دھۆکێ ژی کو ئەو ژی دەورۆبەران بخوڤە دگریت ٣٢ ملیون و ٩٨٥ ھزار دیناران زیان ب جھێن گشتی و پرۆژەیان کەفتنە، ککوما گشتی دبیتە ملیارەک و ٥٧٧ ملیون و ھەشت ھزار و ٥٠٠ دینار).
