وێنەگری سێ چاڤ ھەنە
ئەڤرۆ، عەلی حاجی:
شیمال ئەحمەد وێنەگرەکێ خەلکێ زاخۆیە، د دیدارەکێ دا بۆ رۆژناما ئەڤرۆ دیارکر کو ئەو دخوازیت خەلکەکی فێری ستایلان بکەت دەمێ وێنەکی بۆ وان دگریت و بەردەوام ژی ب رێیا ئەنترنێتێ پێزانێن نوو ل دۆر ھونەرێ وێنەگرتنێ وەردگریت:
شیمالی گۆت: ل سالا ٢٠١١ وەکو حەزەک د کارێ راگەھاندنێ دا من دەست ب کاری کر ل کەنالەکێ نافخۆیی ل پشکا پەخشی، پشتی وی دەمی حەزا وێنەگرتنێ ل دەف من دروست بوو، لەوما سالا ٢٠١٨ من دەست ب وی کاری کر، چنکو وێنەگری چاڤێ سێیێ ھەیە و ھەر کەسەکێ ئەو چاڤ نە بیت ب زەحمەتە بشێت کارێ وێنەگریێ بکەت و ئەو حەزا ل دەف مروڤی ژی ھەی وە دکەت چاڤێ سێیێ ل دەف مروڤی پەیدا ببیت، ھەر ئێک ژ حەسەن حاجی و ئەحمەد زاخۆیی و فەرھاد زاخۆیی ھەڤالێن من یێ نێزیک بوون کو ئەو ژی رێ نیشاندەرێن من بوون کو دەست ب گرتنا وێنەیان بکەم و ھەتا نوکە ژی من شیایە پێنگاڤێن باش پاڤێژم و بتنێ پشکداری خولەکێ بوویمە لێ رۆژانە ژی ب رێیا ئەنترنتێ تەماشەیی ڤیدیۆیان دکەم بۆ باشترکرنا شیانێن خوە و دخوازم ھەر کەسەکێ وێنەکێ بگریت ئەز ستایلان بۆ وان ب دانم ب تایبەتی ژی ستایلێن کلاسیکی دا کو خەلکەک فێری ستایلان بیت د دەمێ وێنان دا و ھەموو دەمان ژی کەسێ وێنەگر دخوازیت دیمەنێن جوان ژ سروشتی نیشا بدەت و سروشت ژی تشتەکێ تایبەتە، بۆ ھەر وێنەگرەکی ژی پێدڤی یە بەردەوام ھزرێن دروست بکەت و ستایلێن تایبەت ژی بدانیت.
