چاڤد‌ێرەک: سەرەدانا پاپا دێ بیتە ئەگەرێ ب ھێزبوونا پێگەھێ ھەرێما کوردستانێ
ئەڤرۆ، ھۆشەنگ تاجر:
چاڤدێرەکێ سیاسی یێ رۆژھەلاتێ کوردستانێ راگەھاند کو سەرەدانا پاپا بۆ ھەرێما کوردستانێ گەلەک گرنگ و دیرۆکی بوو، ب سەرەدانا پاپای دێ گەلەک تشت ھێنە گوھۆرین و ئەو یەک دێ بیتە ئەگەرێ ب ھێزبوونا پێگەھێ ھەرێما کوردستانێ، ژ بەر ھندێ ژی گرنگە کورد بشێن مفای ژ ھەموو گوھۆرینان وەربگرن.
فەرھاد جەمشیدی چاڤدێرێ سیاسی یێ رۆژھەلاتێ کوردستانێ بۆ ئەڤرۆ دیار کر کو سەرەدانا پاپا بۆ ھەرێما کوردستانێ سەرەدانەکا گەلەک مەزن و دیرۆکی بوو، چونکو عیراق د رەوشەکا گەلەک ئالۆز دایە و ھەروەسا پیلانێن مەزن ل دژی ھەرێما کوردستانێ ھەنە، سەرەدانا پاپای وەسا کر کو جارەکا دی بابەتێ مافێ کوردان و ئەو زۆرداریا کو ل کوردان دھێتە کرن ببیتە رۆژەڤا جیھانێ، پرانیا دەزگەھێن راگەھاندنا جیھانێ جارەکا دی بەحسێ کوردان کرن بێگومان ئەو یەک ژی بۆ ھەموو کوردان گەلەک گرنگ بوو و گۆت: (دڤێت ئەم باش بزانین کو ھەر گوھۆرینەک ل ھەرێما کوردستانێ روو بدەت یان ژی د ئاستێ جیھانێ دا ھەر پێشھاتەک بھێتە مەیدانێ تنێ کارتێکرنا خوە ل ھەرێما کوردستانێ ناکەت، بەلکو کارتێکرنا خوە ل ھەموو کوردان دکەت، ژ بەر ھندێ ژی سەرەدانا پاپای بۆ ھەرێما کوردستانێ گەلەک گرنگ بوو).
ناڤھاتی راگەھاند کو کوردێن پارچێن دی یێن کوردستانێ ژ سەرەدانا پاپای بۆ ھەرێما کوردستانێ دلخوەش بوون، براستی ژی پێشوازیەکا گەلەک باش و ھەژی ژ پاپای ھاتە کرن، کوردان جارەکا دی بۆ ھەموو جیھانێ سەلماندن کو ئەو ئاشتیخوازن و ل دژی شەری نە، د سەرەدانا پاپای دا جارەکا دی بۆ ھەموو جیھانێ ھاتە سەلماندن کو ھەرێما کوردستانێ وارگەھێ پێکڤەژیانێ یە و ژ بەر ھندێ ژی وەلاتێن داگیرکەرێن کوردستانێ پتر ژ ھەر دەمەکێ نھا دژبەریا ھەرێما کوردستانێ دکەن، چونکو ھەرێما کوردستانێ بوویە مودێلا ئاشتی و پێکڤەژیانێ و ئەو یەک ب دلێ سیستەمێن داگیرکەرێن رۆژھەلاتا ناڤین نینە، ژ بەر ھندێ ژی سەرەدانا پاپای بۆ ھەموو کوردان گەلەک گرنگ بوو.
چاڤدێرێ سیاسی یێ رۆژھەلاتێ کوردستانێ ئەو یەک ژی دیار کر کو ئەو چاڤەرێ دکەت پشتی سەرەدانا پاپای ھندەک گوھۆرین ل دەڤەرێ روو بدەن، چونکو بەری ھەر تشتەکێ ھەڤدیتنا پاپای ل گەل سیستانی روودانەکا دیرۆکی بوو، راستە ئەو یەک ب دلێ ئیرانێ نەبوو لێ پێنگاڤەکا دیرۆکی بوو بۆ ئاشتیێ و گۆت: (ئەز وەسا دبینم کو کاریگەریا سەرەدانا پاپای ب سالان یا بەردەوام بیت و پشتی سەرەدانا پاپای گوھۆرینێن مەزن ل دەڤەرێ روو بدەن، چونکو سەرەدانا پاپای پەیامەک بوو بۆ ئاشتی و پێکڤەژیانێ و راگرتنا شەری، ژ بەر ھندێ ژی رەنگە د ئاستێ نێڤدەولەتی دا ژی ھندەک گوھۆرینێن گرنگ ل دۆر رۆژھەلاتا ناڤین روو بدەن و دڤێت کورد ل ھەموو دەڤەرێ ب تایبەتی ژی ل ھەرێما کوردستانێ خوە بۆ ھەر گوھۆرینەکێ بەرھەڤ بکەن دا بشێن ببنە مفادارێن سەرەکی یێن ھەر گوھۆرینەکێ ل دەڤەرێ).
چاڤدێرێ سیاسی یێ رۆژھەلاتێ کوردستانێ د دووماھیا ئاخڤتنا خوە دا ئەو یەک ژی دیار کر کو د شەرێ ل دژی داعشێ دا ھەرێما کوردستانێ ھەم رۆلەکێ سەرەکی د شەری دا گێرا و ھەم ژی ھەرێما کوردستانێ ببوو مالا ھەموو پێکھاتێن کو ژ دەستێ داعشێ رەڤین، ژ بەر ھندێ ژی پاپا چەندین جاران سوپاسیا سەرۆک بارزانی و پێشمەرگێن کوردستانێ کر، ڤێجا گرنگە ھێزێن کوردی بشێن خواندنەکا راست بۆ روودانێن پشتی سەرەدانا پاپای بۆ دەڤەرێ بکەن.
