سترانه‌كا مامێ خوه دێ تۆماركه‌ت
دهۆك، شاكر ئه‌تروشی:
سترانبێژ (كۆچه‌ر ره‌شید عه‌لی) كو ب كۆچه‌ر خه‌نجه‌ر یێ به‌رنیاسه، د دیداره‌كێ دا بۆ رۆژناما ئه‌ڤرۆ گۆت: ده‌مێ ئه‌ز یێ بچووك به‌رده‌وام ل دیوانا مامێ خوه یێ هونه‌رمه‌ند حه‌سه‌ن عه‌لی خه‌نجه‌ر دروونشتم و من گوهداریا سترانێن وی دكر و ل گه‌ل بۆرینا ده‌می ئه‌و هزر بۆ من چێبوو ئه‌ز ژی سترانان بێژم و مامێ من گه‌له‌ك هاریكاریا من كر و بۆ من وه‌ك ماموستایه‌كی بوو، له‌ورا ل ده‌ستپێكێ من ل گه‌ل وی ستران دگۆتن، دووڤدا گه‌له‌ك سترانبێژ دهاتنه مالا وی وه‌ك هونه‌رمه‌ندێ خودێ ژێ رازی سه‌عید گاباری من ل گه‌ل وی ژی ستران گۆتن، هه‌روه‌سا ل گه‌ل شێخ چێلی و خه‌لیل باكۆزی و عابد دهۆكی و ته‌حسین فه‌قیر خدر و ئه‌حمه‌د بارزانی و خه‌له‌ف حالی و گه‌له‌ك سترانبین دی و هه‌تا نوكه یێ به‌رده‌وامم، هه‌روه‌سا ژبلی سترانێن فولكلۆری ئه‌ز سترانێن هه‌ڤچه‌رخ ژی دبێژم و كورێ من نعمه‌ت ژی سترانبێژ و ئاواز دانه‌ره.
كۆچه‌ری گۆت: هه‌تا نوكه من (22) كاسێت و پێنج سیدێن تۆماركری هه‌نه، هنده‌ك ژوان سترانێن فولكلۆری نه و هنده‌ك ژی یێن من ب خوه‌نه و نوكه ژی تێرا سیدیه‌كی و پتر سترانێن هه‌ڤچه‌رخ ل ده‌ف من هه‌نه هیڤیا من ئه‌وه ده‌لیڤه‌ك بهێت ئه‌ز بشێم تۆماربكه‌م، هه‌روه‌سا من ل به‌ره سترانه‌كا مامێ خوه كو وی دزیندانێ ڤه گۆتبوو دوباره ئه‌ز ژی ب ده‌نگێ خوه تۆماركه‌م، بۆ زانین ل سالا 1998 ل باره‌گایێ ئێكه‌تیا لاوان ل قه‌زا سێمێلی، كو ل وی ده‌می مالامه ل وێرێ بوو من ستران دگۆتن و هونه‌رمه‌ندێ خودێ ژێ رازی عه‌بدولواحد زاخۆیی ژی ل وێرێ بوو مه ستران پێكڤه دگۆتن.
