شێوه‌كاره‌ك: هونه‌ر زمانه‌كێ جیهانیه و هه‌موو كه‌س دشێن ل سه‌ر كار بكه‌ن
ئه‌ڤرۆ، هه‌رهین محه‌مه‌د:
شێوه‌كار و په‌یكه‌رسازێ گه‌نج كارزان ئه‌حمه‌د د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: هونه‌رێ شێوه‌كاری دونیایه‌كا تایبه‌ت پێشكێشی من كریه وه‌ل من كریه ل سه‌ر هه‌ر كاره‌كێ دی یێ هونه‌ری راوه‌ستم ب شێوه‌كێ خه‌یال و ئه‌كادیمی و هه‌لسه‌نگاندنێ بۆ بكه‌ی و ره‌ڤتارێ ل گه‌ل بكه‌ی و نرخی بده‌یێ ژلایێ بهایی و زانستی و جوانیێ و هه‌ركاره‌كێ په‌یكه‌رسازی من كری من یا حه‌زژێكری، له‌ورا من یا كری و دیسان ب ڤی كاری من شیایه داهاته‌كی ژی ب ده‌ست خوه ڤه بینم و هێزه‌كا مه‌زن ب شێوه‌كێ ئه‌كادیمی بده‌مه هونه‌ری.
ناڤهاتی گۆت ژی: په‌یكه‌رسازی زمانه‌ك و جیهانه‌كه بۆ وان كه‌سان یێن كارێ په‌یكه‌رسازی دكه‌ن و هونه‌رێ په‌یكه‌رسازی دهێته هژمارتن ب دانا نیاسینا وی هونه‌رمه‌ندی و هه‌ركه‌سه‌كی دڤێت مێژوویا وه‌لاته‌كی ب زانیت پێدڤیه ته‌ماشه‌ی مێژویا هونه‌رێ وان بكه‌ت، له‌و را په‌یكه‌رسازی بۆ دانا نیاسینا هه‌ر وه‌لاته‌كی یا گرنگه وه‌كو تشته‌كی یه مرۆڤ ل پشت خوه دهێلیت بۆ ملله‌تێن دی و هه‌كه ته‌ماشه‌ی مێژوویێ بكه‌ین سومه‌ریا و ئه‌كه‌دیا كارێن گه‌له‌ك جوان كرینه وه‌كو تشته‌كێ مێژوویی مایه بۆ ملله‌تێن دی و پتریا په‌یكه‌رێن ئه‌ز چێدكه‌م ده‌ربرینێ ژ وان كاره‌ساتان دكه‌ت یێن ب سه‌رێ ملله‌تێ كورد هاتین ب گشتی.
ل دووماهیێ گۆت: پتریا زانایان ل سه‌ر ده‌مێ یونانیان هه‌تا نوكه و ل سه‌ر وێ هزرێ بووینه كو هونه‌رمه‌ندی جیهانا تایبه‌تا خوه هه‌یه و شیانێن هزركرنێ یێن تایبه‌ت هه‌نه، چونكو هه‌ر كاره‌كێ هونه‌رمه‌ند دكه‌ت هزرد وی كاری دا دكه‌ت به‌ری ده‌ستپێبكه‌ت و چ جوداهی دناڤبه‌را هونه‌رمه‌ندێ به‌هدینی و سورانی و زازاكی دا نینه، چونكو هونه‌ر زمانه‌كێ جیهانیه هه‌موو كه‌س دشێن ل سه‌ر كاربكه‌ن، چونكو هه‌ركاره‌كێ هونه‌ری بكه‌ت رامانه‌كێ ده‌ت.
