شاره‌زایه‌كێ چاندنێ: كۆلیان زیانه‌كا مه‌زن گه‌هاندیه كه‌رتێ چاندنێ
ئه‌ڤساله كۆلیان هێرشه‌كا مه‌زن كریه سه‌ر كه‌رتێ چاندنێ و ئه‌گه‌ر چاره‌سه‌ریا وێ نه‌هێته كرن، به‌رهه‌مێ ئه‌ڤساڵه یێ هاڤینێ دێ مه‌ترسی ل سه‌ر بیت، ژ به‌ر كۆ كۆلیان ده‌ست ب خوارنا پشكا دارێن به‌رهه‌مدار و كه‌سكاتی كریه. ئه‌ڤه ژی تشته‌ك نوو نینه و سالانه ئه‌ڤ جۆره كۆلیه ده‌ردكه‌ڤن.
بارزان، ره‌مه‌زان هه‌رنی:
ئیدریس جوتیاره‌كێ ده‌ڤه‌را بارزانه بۆ ئه‌ڤرۆ گۆت: سالانه ئه‌م گرنگیێ ب كه‌رتێ چاندنێ دده‌ین و هه‌موو جۆره به‌رهه‌مه‌كێ دچینن، سه‌ره‌رای هندێ ئه‌ڤ ساله ئاڤ دكێمبوون و باران د وه‌رزێ پێدڤی دا نه‌بارین، به‌لێ مه هنده‌ك تشت هه‌ر چاندینه، به‌لێ ژبلی كێمیا ئاڤێ ئه‌ڤساله جۆره كۆلیه‌ك ده‌ركه‌فتیه و پشكا داران دخوت به‌رهه‌مێ كه‌سكاتی ژی دخوت، مه جۆره ده‌رمانه‌ك بكارئینایه ئه‌و كۆلی نه‌هێلان، به‌لێ پاشی سه‌ر ژ نو كۆلی ده‌ركه‌فتیه‌ڤه، ئه‌گه‌ر ئه‌ڤ كۆلیه نه‌هێته خلاسكرن، دێ مه‌ترسی لسه‌ر به‌رهه‌مێ ئه‌ڤساڵه یێ هاڤینێ هه‌بیت.
تاهر سالح، شاره‌زایێ بوارێ چاندنێ بۆ ئه‌ڤرۆ گۆت: خه‌رزێ كۆلیان سالانه ده‌ردكه‌ڤیت تایبه‌ت ئه‌گه‌ر پله‌یێن گه‌رمێ بلند ببن ئه‌ڤساله ژبه‌ر كێمیا ئاڤێ و نه‌بۆنا بارانا كۆلی و هه‌موو جۆره كرم و كۆلیانه‌ك زێده‌بوونه و دونیا هشكه نه‌چارن دچنه وان جهێن ئاڤ و كه‌سكاتی هه‌ی، ئه‌ڤ جۆره كۆلیانه ب ده‌رمانی ژناڤ دچیت، به‌لێ دووباره ده‌ردكه‌ڤیته ڤه، جوتیار نه‌شێت رۆژانه ده‌رمانی بره‌شینن و پێدڤیه چاڤه‌رێ دووماهیا خه‌رزێ كۆلیان بكه‌ن.
ئاشكراكر: ئه‌ڤ ساله به‌رهه‌م كێمتر ل سالێن بووری هاتیه چاندن، له‌وما ژی كۆلی پتر دچیته ناڤ وان زه‌ڤیێن چاندن تێدا هه‌یه چاره‌سه‌ری ژی ئه‌وه كۆلی نه‌مینیت و ب ده‌رمانی خلاس نابیت، به‌لێ هه‌رده‌ما وه‌رزێ چوونا وی گه‌هشتی ئه‌و بخو نامینیت، هه‌تا خلاس دبیت دێ زیانه‌كا زۆر گه‌هینیت كه‌رتێ چاندنێ.
