په‌رله‌مانتاره‌كا مه‌سیحی:مه‌سیحیان هیڤی و ئومێد نه‌ماینه ڤه‌گه‌رنه سه‌ر گوندێن خوه
ئه‌ڤرۆ، بارزان مزووری:
په‌رله‌مانتاره‌كا مه‌سیحی راگه‌هاند، گه‌له‌ك ژ مه‌سیحیان هیڤی و ئومێد نه‌ماینه ڤه‌گه‌رنه سه‌ر گوندێن خوه، گه‌له‌ك ژ وانا هزر ژ كوچكرنێ كریه بۆ ده‌رڤه‌ی وه‌لاتی. دیسان گه‌له‌ك ژ مه‌سیحیان بریارا دووماهیێ دایه كۆ ب ئێكجاری ڤه‌گه‌رنه باژێران و گوندان ب ئێكجاری بهێلن، چونكو نوكه نێزیكێ ١٥ گوندێن مه‌سیحیان مه‌ترسیا چولكرنێ ل سه‌ر هه‌یه.
كلارا عودیشۆ، سه‌رۆكا فراكسیونا ئه‌نجومه‌نێ كلدانی و سریانی و ئاشوری ل په‌رله‌مانێ كوردستانێ بۆ رۆژناما ئه‌ڤرۆ گۆت: ئه‌ڤه چار رۆژه مه‌سیحیێن گوندێ چه‌لكێ ئاواره‌بووینه بێرسڤێ و بێگوڤا و مه‌رۆ مالاتێ وان ب وان ڤه بوویه كێشه، ژ به‌ر كۆ نه‌شێن وی مه‌رومالاتی دگه‌ل خۆ ڤه‌گوهێزن بۆ جهێ لێ ئاواره‌بووین و نه‌شێن ببه‌نه ئاقاری ژی ژبه‌ر بوردومانا فرۆكێن له‌شكه‌ری یێن توركیا و چه‌كدارێن په‌كه‌كێ نه‌شێن دناڤ گوندی ژی بمینن. ژبه‌ركۆ گه‌له‌ك جاران پاشماوێن بوردومانێ بۆ ناڤ گوندی دهێن ئێك ژ هاونێن مه‌زن به‌ریا چه‌ند رۆژه دناڤ گوندی كه‌فت بوو، به‌لێ نه‌په‌قی بوو.
زێده‌تر گۆت: ئه‌م وه‌كۆ مه‌سیحی هه‌ردوو لایان شه‌رمزار دكه‌ین، چونكو وان شه‌ر ئینایه دناڤ گوندی دا، به‌لێ جهێ داخێ یه پتریا گوندێن مه‌سیحیان ل سه‌ر سنورن گوندێن مه كه‌فتینه به‌ر ڤان ئالۆزیان و نوكه وه‌رزێ چاندنێ یه و زیانێن مه‌زن ب به‌رهه‌مێ وان كه‌فتیه ژبه‌ر نه‌سه‌خبێریكرنا به‌رهه‌مێ خۆ یێ چاندنێ.
ناڤهاتی گۆت: چولكرنا گوندێن مه‌سیحیان یێن دكه‌ڤنه به‌ر شه‌رێن په‌كه‌كه‌ی و توركیا دێ مه‌ترسی سه‌ر هه‌لدایه سه‌ر كومه‌لگه‌ها مه‌سیحیان ل كوردستانێ، ژبه‌ركۆ گه‌له‌ك ژ وان مه‌سیحیان هیڤی و ئومێد نه‌ماینه ڤه‌گه‌رنه سه‌ر گوندێن خوه، گه‌له‌ك ژ وانا هزر ژ كوچكرنێ كریه بۆ ده‌رڤه‌ی وه‌لاتی دیسان گه‌له‌ك ژ مه‌سیحیان بریارا دووماهیێ دایه كۆ ب ئێكجاری ڤه‌گه‌رنه باژێرا گوندا ب ئێكجاری بهێلن، نێزیك ١٥ گوندا مه‌ترسیا چولكرنێ ل سه‌ره، ژبه‌ر مه‌ترسیا بوردومانێن فرۆكێن له‌شكرێ توركیا گوند هێلایه، ئه‌و گوندێن نه‌هلێ ل ده‌ڤه‌را ئاكرێ یێن مه‌سیحیان پشتی ئه‌ڤ ئوپه‌راسیونا له‌شكه‌رێ توركیا ده‌سپێكری ل ده‌ڤه‌را به‌رواری بالا نه‌گه‌هشتیه ده‌ڤه‌را نه‌هلێ.
ناڤهاتی زێده‌تر گۆت: ئه‌م د ره‌شبینین ئه‌ڤ كێشه چاره‌سه‌ربیت، لێ ب هه‌ر رێیه‌كا دبلوماسی هه‌بیت حكومه‌تا عێراقێ دڤێت، پاراستنا سیاسه‌تا عێراقێ بكه‌ت وه‌كۆ ده‌وله‌ت ب رێكێن دبلوماسی و سیاسی دڤێت ئه‌ڤ شه‌ره ب دوماهیك بهێت، پێدڤیه حكومه‌تا عێراقێ ب رێیێن دبلوماسی دگه‌ل حكومه‌تا توركیا بگه‌هیته چاره‌سه‌ریه‌كێ.
