قۆنسلێ فره‌نسا: پارێزگه‌ها دهۆكێ جهه‌كێ تایبه‌ت ل نك مه یێ هه‌ی
د. عه‌لی ته‌ته‌ر، پارێزگارێ دهۆكێ دوهی 13/6/2021 پێشوازی ل ئۆلیڤه دیكوتینی، قۆنسلێ گشتی یێ كۆمارا فره‌نسا ل هه‌رێما كوردستانێ و شانده‌كێ وه‌زاره‌تا ده‌رڤه یا فره‌نسا ژ سه‌نته‌رێ روو ب روبوونا قه‌یرانان كر و د هه‌ڤدیتنێ دا به‌حسێ ره‌وشا پارێزگه‌ها دهۆكێ و دوماهی پێشهاتێن ده‌ڤه‌رێ هاته‌كرن.
قۆنسلێ فره‌نسا هه‌ڤخه‌میا خۆ ده‌ربری و به‌رهه‌ڤیا وه‌لاتێ خوه بۆ هه‌ر هاریكاریه‌كێ بۆ روودانا ئاگربه‌ربوونا كه‌مپا شاریا دیار كر، پاشی به‌حسێ پرۆژێن خزمه‌تگۆزاریێن كۆمارا فره‌نسا بۆ هه‌رێما كوردستانێ و عیراقێ كر و راگه‌هاند: “پارێزگه‌ها دهۆكێ جهه‌كێ تایبه‌ت ل نك مه یێ هه‌ی، چۆنكی نێزیكی وان ده‌ڤه‌رانه یێن ئه‌ڤه چه‌ند ساله شه‌ر و ئالۆزی تێدا هه‌ین و هاتنا وێ هژمارا زۆرا ئاواره وپه‌نابه‌ران و هه‌تا نوكه ل پارێزگه‌ها دهۆكێ د ئاكنجی نه، هه‌ر ژ سالا 1014 وه‌ره سه‌نته‌رێ قه‌یرانان پشته‌ڤانیا پرۆژان ل دهۆكێ دكه‌ت و ئه‌ڤرۆ ژی بۆ ڤێ مه‌ره‌مێ شانده‌كێ سه‌نته‌رێ ناڤبری كو سه‌ر ب وه‌زاره‌تا ده‌رڤه‌یه دگه‌ل مه‌دایه بۆ دووڤچوونا ئه‌و جهێن پێدڤی خزمه‌تگۆزاریێن مرۆڤایه‌تی”.
پارێزگارێ دهۆكێ سۆپاسیا شاندێ مێهڤان كر و گۆت: “ئه‌م گه‌له‌ك سۆپاسیا كۆمارا فره‌نسا دكه‌ین، ئه‌ڤه ده‌مێ چه‌ندین سالانه په‌یوه‌ندیێن مه د ئاسته‌كێ گه‌له‌ك باش دانه و به‌رده‌وام ژلایێ مرۆڤایه‌تی و خزمه‌تگۆزاری ڤه هاریكاریا هه‌رێما كوردستانێ كریه و هیڤیدارین د هه‌می لایه‌كی دا ره‌نگڤه‌ده‌ت”.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ پێشوازی ل هاكان تاش، ئه‌ندامێ په‌رله‌مانێ هه‌رێما به‌رلینا كۆمارا ئه‌لمانیا و شانده‌كێ كۆمه‌لا دۆستینیا كوردی – ئه‌ڵمانی كر، د هه‌ڤدیتنێ دا به‌حسێ ره‌وشا پارێزگه‌ها دهۆكێ و دووماهی پێشڤه‌چوونێن ده‌ڤه‌رێ و هه‌رێما كوردستانێ كر.
ئه‌ندامێ په‌رله‌مانێ به‌رلینێ راگه‌هاند: “ئه‌م گه‌له‌ك ب گرنگی به‌رێخوه دده‌ینه په‌یوه‌ندیێن دگه‌ل هه‌رێما كوردستانێ، ئه‌م هاتینه ژ نێزیك ئاگه‌هداری ره‌وشا ده‌ڤه‌رێ ببین”.
