لژنه‌ك بۆ تۆماركرنا زیانێن شه‌ڕێ په‌كه‌كێ و توركیا هاته پێكئینان
زنار تۆڤی:
رێڤه‌به‌رێ ناحیا كانی ماسێ دیار كر، هه‌تا نوكه پێنج گوندێن سنوورێ ناحیا كانی ماسێ (كێسته، چه‌لكا نه‌سارا، ئه‌دنێ، سه‌ره‌رۆ و دێشێشێ) ژ ئه‌گه‌رێ شه‌رێ د ناڤبه‌را په‌كه‌كێ و سۆپایێ توركیا دا هاتینه چۆلكرن، نوكه خه‌لكێ وان گوندان نه‌شێن زه‌ڤی و ئاقارێ خوه ئاڤ بده‌ن، دیسا رووبه‌ره‌كێ مه‌زن یێ دارستانێ و زه‌ڤی و ئاقارێ وان گوندان ژی هاتیه سۆتن و هه‌تا نوكه خه‌لكێ وان گوندان نه‌هاتیه قه‌ره‌بووكرن.
سه‌ربه‌ست سه‌بری ئاكره‌یی، رێڤه‌به‌رێ ناحیا كانی ماسێ بۆ رۆژناما ئه‌ڤرۆ گۆت: “ژ ئه‌گه‌رێ وی شه‌ری زیانه‌كا مه‌زن گه‌هشتیه خه‌لكی وان گوندان، ب فه‌رمانه‌كا كارگێری و ب سه‌رۆكاتیا من، وه‌كو رێڤه‌به‌رێ ناحیێ و ئه‌ندامه‌تیا رێڤه‌به‌ریا چاندنێ و بنگه‌هێ پۆلیسان و هۆبا دارستانێ و باژێرڤانیێ ل ناحیا كانی ماسێ، لژنه‌ك بۆ تۆماركرنا ناڤێن زیان ڤێكه‌فتیێن وی شه‌ری ب مه‌ر‌ه‌ما قه‌ره‌بووكرنێ پێكئینایه، نوكه رۆژانه ئه‌و زیانێن دگه‌هنه خه‌لكێ ڤێ ده‌ڤه‌رێ دهێنه تۆماركرن و ب تنێ ل گوندێ كێسته نێزیكی ملیاره‌ك و 750 ملیۆن دیناران زیان گه‌هشتینه خه‌لكێ وی گوندی، دیسا ناڤێن زیان ڤێكه‌فتیان دێ هێنه نڤیسین، داكو بهێنه قه‌ره‌بووكرن”.
گۆتژی: “ژ ئه‌گه‌رێ شه‌رێ په‌كه‌كێ و سۆپایێ توركیا نێزیكی 10 هزار دۆنه‌مێن ئه‌ردێ دارستانێ و زه‌ڤی و ره‌زێن وه‌لاتیان هاتینه سۆتن، دیسا بنگه‌هێن ساخله‌میێ یێن گوندێن ئه‌دنێ و كێسته هاتینه گرتن، زیان گه‌هشتیه نێزیكی هزار جۆتیارێن ده‌ڤه‌رێ و چه‌ندین خانیێن خه‌لكی و پرۆژین ئاڤێ و جۆكێن ئاڤدانێ یێن خه‌لكێ ڤێ ده‌ڤه‌رێ”.
