هه‌شت كارگه‌هێن پیشه‌سازی ل پارێزگه‌ها دهۆكێ دێ هێنه دروستكرن
ب سه‌رپه‌رشتیا د. عه‌لی ته‌ته‌ر، پارێزگارێ دهۆكێ دوهی 15/6/2021 كۆمبوونا لژنا گه‌شه‌پێدان و پشتگریكرنا پرۆژێن پیشه‌سازی ل پارێزگه‌ها دهۆكێ ب به‌رهه‌ڤبوونا هه‌موو ئه‌ندامێن لژنێ هاته كرن.
د كۆمبوونێ دا دانوستاندن و هه‌لسه‌نگاندن بۆ وان پرۆژێن پیشه‌سازی یێن هاتینه پێشكێشكرن هاته‌كرن، پشتی وه‌رگرتنا بیر و بۆچوونێن لایه‌نێن په‌یوه‌ندیدار رازیبوون ل سه‌ر دروستكرنا هه‌شت كارگه‌هان ل سنوورێ ده‌ڤه‌رداریێن جودا یێن پارێزگه‌ها دهۆكێ د بیاڤێن تێكه‌لۆكا ناڤه‌ندی دا هاته‌كرن.
ئه‌و كارگه‌هێن رازیبوون ل سه‌ر هاتیه‌كرن و بڕیاره بهێنه دروستكرن د بیاڤێن ئاهێن خوارنێ، به‌رهه‌مئینانا ئاسنی، به‌رهه‌مئینانا پلاستیكی، به‌رهه‌مئینانا جپسان و پاقژكه‌ڕان دانه.
دیسا د كۆمبوونێ دا پارێزگارێ دهۆكێ دۆپاتی ل سه‌ر پشته‌ڤانیا كه‌رتێ پیشه‌سازی كر و گۆت: “پێدڤیه ئه‌م هه‌موو ئاسانكاریان د چارچوڤێ قانوونێ دا بۆ كێمكرنا رۆتینێ و گیرۆ نه‌كرنا مامه‌له‌یان و ڤه‌دیتنا بازارێ كاری دا بكه‌ین كو به‌رده‌وام كه‌رتێ پیشه‌سازی گه‌شه‌كرنێ ب خوه‌ڤه ببینیت”.
