لوقمان مه‌جید: ئه‌وا هاتیه كرن پیلانه‌ك بوو دژی سێمێلێ و بێ ده‌نگ نامینین
ئه‌ڤرۆ،
د كۆنگره‌یه‌كێ رۆژنامه‌ڤانی دا ل باره‌گایێ خوه لوقمان مه‌جید سه‌رۆكێ یانا سێمێل یا وه‌رزشی هه‌لویستێ خوه لسه‌ر روودانێن یاریا تیما ئه‌وان یا ته‌پا پیێ د خولا پلا دو دا ل گه‌ل یانا بابان ئه‌وا ب گۆله‌كێ تووشی خوساره‌تیێ بووین و بۆ رۆژنامه‌ڤانا به‌حسكر و بڤی ره‌نگی.
ل ده‌ستپێكێ ناڤهاتی گۆت:ده‌ستنیشانكرنا هنده‌ك دادڤانا بۆ یاریه‌كا چاره‌نڤیس ژلایێ ئێكه‌تیا ته‌پاپیێ یا كوردستانێ بڕیاره‌كا خه‌له‌ت بوو و ئه‌ڤه چه‌ندین سالا ژلایێ وانڤه غه‌دره ل یانا سێمێلێ دهێته‌كرن، یاریا ئێكێ ل گه‌ل بابان ل باژێرێ سلێمانیێ دادڤانێ یاریێ دۆ گۆلێن دروست نه هژمارت و دژاتیا مه هاته‌كرن مه ئه‌وچه‌نده قه‌بۆلكر، لێ مخابن ل یاریگه‌ها زێره‌ڤانی دادڤان هه‌مان خه‌له‌تی كرینه و سێ په‌نه‌لتی بۆ سێمێلێ نه هژمارتن و سه‌رپه‌رشتیارێ یاریێ دانپێدانكر كو دادڤان دخه‌له‌تن بۆ زانین سیروان سه‌لمان سه‌رۆكێ دادڤانان ل ئێكه‌تیا ته‌پاپێی یا كوردسانێ رژدبوو لسه‌ر ده‌ستنیشانكرنا ئه‌ڤان دادڤانا و ئه‌ڤه‌ژی مه‌ره‌مه‌ك پێ هه‌بوو، له‌ورا وه‌كو یانا سێمێلێ نه‌رازیبوونا خوه دیاردكه‌ین لسه‌ر ئه‌ڤێ پیلانێ ئه‌وا دژی یانێ هاتیه دانان و بێ ده‌نگ نامینین و نه‌رازیبوونا خوه گه‌هاندیه ئێكه‌تیا ناڤبری دڤێت یاری بهێته دووباره‌كرن یان سێمێل بۆ پلا ئێك بهێته سه‌رخستن ژبه‌ركو ئه‌و حه‌فت هه‌یڤ بوو مه به‌رهه‌ڤی دكرن و ئێك ژ هه‌ڤڕكێن بهێز بووین و زێده‌تری 150 ملیۆن دیناران مه خه‌رجكرینه و گونه‌هبارێن سه‌ره‌كی دادڤانن.
ژلایه‌كێ دیڤه ناڤهاتی گه‌ڤ ل ئێكه‌تیا ته‌پاپێی كر هه‌كه مافێ ئه‌وان نه‌ڤه‌گه‌ڕێنیت و گۆت: ئه‌م دێ چاڤه‌ڕێ بڕیارا ئه‌وان بین هه‌رده‌مێ بڕیار دژی یانا سێمێلێ هه‌بیت دێ هه‌لویسته‌كێ تۆند دژی ئێكه‌تیا ته‌پاپیێ یا كوردستانێ هێته دیاركرن، مه رێڤه‌به‌ریا گشتی یا وه‌رزشی ل سه‌ر ڤی بابه‌تی ئاگه‌هداركریه و هه‌ر به‌لگه‌یه‌ك ده‌ستێ مه دا ب وێنه و ڤیدیۆ به‌رهه‌ڤن و هاتینه هنارتن.
لدۆر هه‌لویستێ یانا سێمێلێ لوقمان مه‌جید سه‌رۆك بۆ رۆژناما ئه‌ڤرۆ گوت: ژبه‌ركو هه‌ر سال ده‌مێ دگه‌هینه قۆناغێن باش و نێزیكی ده‌ربازبوونێ غه‌در ل مه‌دهێته‌كرن، له‌ورا دێ هه‌لویستێ مه ئه‌وبیت كۆ ئه‌م یانا سێمێل ل گه‌ل وه‌رزشێ ب دووماهی بینین و دێ بزاڤان ژی كه‌ین سكالایێ لسه‌ر ئێكه‌تیا ته‌پاپێی ل ئێكه‌تیێن ئیراقێ و ئاسیا بلندبكه‌ین و نا راوه‌ستیێن هه‌تا بگه‌هینه مافێ خوه.
