ده‌ڤه‌ردارێن نوو یێن ئامێدیێ و زاخۆ ده‌ست ب كار بوون
ئه‌ڤرۆ، مه‌حمود نهێل:
د چارچوڤێ گوهۆڕینێن به‌رده‌وام یێن د ناڤ دام و ده‌زگه‌هێن میری دا دهێنه ئه‌نجامدان، ب ئاماده‌بوونا د. عه‌لی ته‌ته‌ر، پارێزگارێ دهۆكێ و رێڤه‌به‌رێن ناحیێن سنوورێ قه‌زا ئامێدیێ و رێڤه‌به‌رێن دام و ده‌زگه‌هین میری د رێوره‌سمه‌كی دا (وارشین سه‌لمان) وه‌كو ده‌ڤه‌ردارێ نوو یێ ئامێدیێ ل جهێ (ئیسماعیل مسته‌فا) قایممقامێ قه‌زا ئامێدیێ هاته دانان.
د. عه‌لی ته‌ته‌ر، پارێزگارێ دهۆكێ د په‌یڤه‌كێ دا ده‌ستخوه‌شی ل ئیسماعیل مسته‌فا رشید، ده‌ڤه‌ردارێ به‌رێ یێ ئامێدیێ كر ل هه‌مبه‌ر ئه‌و خزمه‌تا ل سالێن بۆری پێشكێشی خه‌لكێ ده‌ڤه‌را ئامێدیێ كری و پیرۆزباهی ل ده‌ڤه‌ردارێ نوو یێ ئامێدیێ كر و سه‌ركه‌فتن بۆ خواست و پشته‌ڤانیا كارگێریا پارێزگه‌هێ بۆ هه‌ر هاریكاریه‌كێ نیشا دا.
پارێزگه‌ری َدهۆكێ گۆت: “سه‌ركردایه‌تیا هه‌رێما كوردستانێ هه‌رده‌م ته‌كه‌زیێ ل سه‌ر پێشكێشكرنا هه‌موو خزمه‌تگوزاریان و ل دووڤ رێنما و یاسایێن حكومه‌تا كوردستانێ بۆ هه‌موو خه‌لكێ كوردستانێ دكه‌ت و خواست كو ده‌ڤه‌ردارێ نوو یێ ئامێدیێ و هه‌موو رێڤه‌به‌رێن په‌یوه‌ندیدار ب كار و كریار و بێ جوداهی و ب یه‌كسانی خزمه‌تا خه‌لكێ ده‌ڤه‌رێ بكه‌ن”.
پاشی ده‌ڤه‌ردارێ به‌رێ یێ ئامێدیێ سوپاسیا هه‌موو لایه‌نان كر یێن بووینه هاریكار بۆ پێشكێشكرنا هه‌موو خزمه‌تگوزاریا بۆ خه‌لكێ ده‌ڤه‌رێ و سه‌ركه‌فتن بۆ ده‌ڤه‌ردارێ نوو خواست.
وارشین سه‌لمان، ده‌ڤه‌ردارێ نوو یێ ئامێدیێ سۆز دا كو ئه‌و ل جهێ وێ باوه‌ریێ بیت یا پێهاتیه راسپاردن و ل دووڤ یاسا و رێنمایێن حكومه‌تا هه‌رێمێ و ب یه‌كسانی خزمه‌تا خه‌لكێ ده‌ڤه‌را ئامێدیێ بكه‌ت.
ده‌ڤه‌رداریا ئامێدیێ ژ شه‌ش ناوچه‌داریان پێك دهێت (سه‌رسنك، دێره‌لوك، شێلادزێ، چه‌مانكێ، بامه‌رنێ و كانی ماسێ) و نوكه پتر ژ (150) پرۆژێن خزمه‌تگوزاری یێن جودا جودا لێ دهێنه ئه‌نجامدان.
هه‌ر د هه‌مان رۆژ دا (مشیر محه‌مه‌د) وه‌ك ده‌ڤه‌ردارێ نوو یێ زاخۆ ده‌ست ب كار بوو.
