ژبه‌ر هشكه‌سالیێ هنده‌ك جوتیارێن گوندێ به‌رچی برنجێ خوه هشك كر
دێره‌لووك، نه‌وزاد هلۆری:
ژ ئه‌گه‌رێ دروستبوونا هشكه‌سالیێ و كێمبوونا ئاڤێ، پشكه‌ك ژ جوتیارێن گوندێ به‌رچی یا سه‌ر ب ناحیا دێره‌لووكێ ده‌ستبه‌ردارێ برنجێ خوه بوون و هشك كر، موختارێ گوندی ژی دده‌ت دیاركرن پێدڤی یه ب رێیا تانكا ئاڤ بۆ سه‌ر چه‌می بهێته ئینان.
ناجی به‌رجی، موختارێ گوندێ به‌رچی و خوندانێ ئێك ژ وان زه‌ڤیێن برنجێ خوه هشك كری بۆ ئه‌ڤرۆ گۆت: (ئه‌ڤ ساله باران كێم بارینه و بویه ئه‌گه‌رێ دروستبوونا هه‌شكه‌سالیێ، مخابن ژبه‌رڤێ یه‌كێ ئه‌ز ده‌ستبه‌رداری برنجێ خوه بووم و من هشكر، من باتمانه‌كا برنجی چاندبوو و ئه‌ڤه نێزیكێ دوو هه‌یڤانه ئاڤ دده‌م و سه‌خبێر دكه‌م و من مه‌زاختن ژی لێ كریه، به‌لێ داكو برنجێن ده‌وروبه‌ر نه‌بنه قوربانی نه‌چاربووم ئه‌ز زه‌ڤیا خوه هشك بكه‌م و بكه‌م قوربانی).
زێده‌تر گۆت: (تاكه چاره‌سه‌ری دنوكه دا ئه‌وه كو هنده‌ك زه‌ڤی ببن قوربانی داكو یێن مایی هشك نه‌بن یان ژی ب رێیا تانكه‌را ئاڤێ بۆ سه‌ر برنجی بینن، چونكی هژمارا زه‌ڤیان زۆره و ئاڤ كێمه).
رژدی به‌رچی، كه‌راخ و ئاڤهه‌لگێرێ چه‌مێ به‌رچی بۆ ئه‌ڤرۆ گۆت: (ل چه‌مێ گوندێ به‌رچی نێزیكێ 160 پارچه زه‌ڤی وه‌كو برنج هاتیه‌كرن و هژماره‌كا زۆرا خێزانان ب رێیا چاندنا برنجی داهاته‌كێ ده‌ستڤه‌دئینن، به‌لێ جهێ داخێ یه ژ ئه‌گه‌رێ كێم بارینا بارانان و دروستبوونا هشكه‌سالیێ وه‌لاتی برنجێ خوه هشك دكه‌ن، ئه‌گه‌ر هوسا به‌رده‌وام بیت دێ زه‌ڤیێن زێده‌تر ژی هێنه هشك كرن).
زێده‌تر گۆت: (جویا به‌رچی و گوهه‌رزێ ژی زۆر ژ مێژه هاتینه چێكرن و ئاڤێ ددزیت، ئه‌گه‌ر جو سه‌ر ژ نوو بهێنه نوژه‌نكرن ئه‌ز باوه‌رم دێ ئاڤه‌كا باش گه‌هیته گوندی، نوكه ئاڤدانا برنجا مه كرینه نوبه‌ت، دانه‌كێ بو سه‌ر برنجی و دانه‌كێ ژی بو سه‌ر بیستانێن ده‌رامه‌تی، ل گه‌ل ڤێ یه‌كێ دڤێت ب رێیا تانكه‌ران ژی ئاڤ بو سه‌ر چه‌می بهێته‌دان ژبه‌ركو رێژا چاندنا برنجی زوره و ره‌نگه ئاڤ تێرا نه‌كه‌ت).
گوندێ به‌رچی ئێكه ژ گوندێن ناحیا دێره‌لوكێ و پتری 80 خێزانان تێدا دژین، ب كارێ چاند و خودانكرنا ته‌رشوكه‌والی مژولن، ئاخه‌كا ب به‌ره‌كه‌ت هه‌یه و چه‌ند كانیێن ئاڤێ ژی هه‌نه.
