هه‌تا نوكه ب تنێ پێنچ هزار خێزانێن مووسل هاتینه قه‌ره‌بووكرن
شێخان، بارزان مزووری:
هه‌تا نوكه حكومه‌تا عێراقێ قه‌ره‌بوویا زیان ڤێكه‌فتیێن شه‌رێ رێكخراوا تیرۆرستی یا داعش نه‌كرینه، ژ سه‌رجه‌مێ 50 هزار خێزانا ب تنێ 5 هزار خێزانێن ناڤ سه‌نته‌رێ باژێرێ مووسل هاتینه قه‌ره‌بوكرن، ئاوارێن شێخان دژین خه‌لكێ شه‌نگال و ده‌شتا مووسل داخاز ژ حكومه‌تا عێراقێ دكه‌ن قه‌ره‌بوویا وان ژی بكه‌ت.
عیماد خدر، ئێك ژ زیان ڤێكه‌فتیێن شه‌رێ داعش بۆ رۆژناما ئه‌ڤرۆ دیار كر، ئه‌ڤه حه‌فت ساله د ژیانا ئاواره‌یێ داد ژین لبن خیڤه‌تان دناڤ كه‌مپان دا ئه‌ڤه چه‌ندین جارا داخازی ژ مه هات كرن فورمێن خۆ پر بكه‌ین بۆ قه‌ره‌بووكرنا مه هه‌تا نوكه چ دیار نه‌بوویه ب تنێ گوتنه ژلایێ حكومه‌تا عێراقێ ڤه، چه‌ند جارا وه‌زیرا كوچ كوچبه‌ران سه‌ره‌دانا كه‌مپا كریه هه‌تا نوكه چ نه‌كریه ب تنێ هاتیه خو نیشا ئاوارا بده‌ت.
ناڤهاتی خویاكر، بۆچی حكومه‌تا عێراقێ ب تنێ خه‌لكێ مووسل قه‌ره‌بووكریه، ئه‌گه‌ر وان زیان ڤێكه‌فت بن مه قوربانی یێن داین هه‌تا نوكه كچ و ژنێن مه د ده‌ستێ داعش دانه چاره‌نڤیسێ وان یێ به‌رزه‌یه خه‌لكێ مووسا ب تنێ زیانێن مادی یێن داین هاتینه قه‌ره‌بووكرن، ما هه‌تا كه‌نگی دێ د ژیانا ئاواره‌یێ دا ژین و زارۆكێن مه هه‌تا نوكه نزانن ژیانه‌ك دی یا هه‌ی ل سه‌ر جه و وارێن خۆ هه‌ر دیتی یه ژیانا ئاواره‌ی.
ره‌فعه‌ت سمۆ، جێگرێ پارێزگارێ مووسل بۆ كارۆبارێن كارگێری بۆ رۆژناما ئه‌ڤرۆ دیار كر، ژ سه‌رجه‌مێ 50 هزار خێزانێن زیان ڤێكه‌فتی، حكومه‌تا عێراقێ پێنچ هزار خێزان قه‌ره‌بوكرینه، ئه‌و رێژا هاتینه قه‌ره‌بوكرن هه‌موو خه‌لكێ مووسلن و خه‌لكێ ده‌شتا مووسل و یێ شه‌نگال دناڤ وان قه‌ره‌بویان دا نه‌بوون، پێتڤی بوو حكومه‌تا عێراقێ میكانزمه‌ك بۆ دانابایه كۆ هه‌ر ده‌ڤه‌ره‌كێ هنده‌ك ناڤ دناڤ وان قه‌ره‌بویان دا توماركربون، به‌لێ جهێ داخێ یه هه‌تا نوكه خه‌لكێ مه یێ بێ به‌هره ژ وان قه‌ره‌بویان ژلایێ خوڤه مه‌ژی چه‌ندین جارا بزاڤ كرینه كۆ خه‌لكێ شه‌نگال و ده‌شتا مووسل وان قه‌ره‌بویا وه‌رگرن، به‌لێ ده‌مێ ناڤ دهێن ب تنێ یێن سه‌نته‌رێ مووسلن.
میر حازم ته‌حسین به‌گ، میرێ ئێزدیان بۆ رۆژناما ئه‌ڤرۆ دیار كر جهێ داخێ یه حكومه‌تا عێراقێ خه‌لكێ مه یێ شه‌نگال بیر كریه ژ قه‌ره‌بووكرنێ پێتڤی بوو حكومه‌تا عێراقێ ده‌مێ ئه‌و 5 هزار خه‌لكێ مووسل قه‌ره‌بوكرین ناڤێ هزار خێزانێن شنگال دناڤ وان ناڤان كربون دا ئه‌و ژی بێ به‌هر نه‌بون ژ قه‌ره‌بوكرنێ.
حسێن عیدۆ، زیان پێكه‌فتیێ شه‌رێ داعش بۆ رۆژناما ئه‌ڤرۆ دیار كر، حكومه‌تا عێراقێ خێزانێن داعش ل مووسل قه‌ره‌بوكرینه و خه‌لكێ شه‌نگال قه‌ره‌بوو نه‌كرینه و نزانین ئه‌گه‌ر چیه ئه‌گه‌ر حكومه‌تا هه‌رێمێ نه‌بوویه مه ئه‌ڤ خیڤه‌ته و ژیانه ژی نه‌دبوو، به‌لێ جهێ داخێ یه بۆ وه‌زاره‌تا كوچ كوچبه‌رێن عێراقێ .
