دارستانێن سۆتی ل دهۆكێ نه‌هاتینه تۆماركرن
دهۆك، له‌زگین جوقی
رێڤه‌به‌رێ دارستان وپاوانێ ل پارێزگه‌ها دهۆكێ دیار كر:”ژبه‌ر شه‌رێ دناڤبه‌را په‌كه‌كێ و توركیا تیمێن دارستانێ نه‌شێن بچنه وان جه و ده‌ڤه‌رێن دارستان تێدا هێته سۆتن و هه‌موو دارستانێن هاتینه سۆتن نه‌هاتینه تۆماركرن.
كاوه سه‌بری فارس، رێڤه‌به‌رێ دارستان و پاوانێ ل پارێزگه‌ها دهۆكێ بۆ ئه‌ڤرۆ راگه‌هاند:” ل دووڤ دووماهی داتایێن گه‌هشتینه به‌ر ده‌ستێ مه، هه‌تا نۆكه ل پارێزگه‌ها دهۆكێ دۆرێن 15 هزار دونه‌مێن ئه‌ردی هاتینه سۆتن، ژ وانا ژی پتریا ئه‌ردێ دارستان و پاوانێ بوویه. ئه‌ڤ حاله‌تێن ئاگربه‌ربوونێ پتر ل ناحیا كانی ماسێ و قه‌زا زاخۆ و ناحیا ئامێدیێ چێبووینه، ئه‌و ژی ژ ئه‌گه‌ری شه‌رێ په‌كه‌كێ و توركیا گه‌له‌ك دارستان و پاوانی هاتیه سۆتن و تێكدان”.
رێڤه‌به‌رێ دارستان و پاوانێ ل پارێزگه‌ها دهۆكێ ئاشكه‌را كر كو ژ ئه‌گه‌رێ شه‌رێ په‌كه‌كێ و توركیا تیمێن مه ژی نه‌شیاینه بچن هه‌موو جهێن هاتینه سۆتن تۆمار بكه‌ن ب رێیێن هه‌مه جۆره ئه‌م زانیاریان ل سه‌ر سۆتنا دارستان و پاوانێ ب ده‌ستخۆڤه دئینین”.
كاوه سه‌بری فارس گۆت ژی هنده‌ك دارێن هاتینه سۆتن ژیێ وان دگه‌هیته 100 سالان و گه‌له‌ك جۆرێن داروباری ژبه‌ر شه‌رێ ل دهۆكێ هاتینه سۆتن”.
سه‌ربه‌ست سه‌بری، رێڤه‌به‌رێ ناحیا كانی ماسێ دیار كر: “سێ كانیێن ئاڤێ ژبه‌ر شه‌ری خرابووینه ئه‌و ژی ل چه‌لكا موسلمانان و گوندێ كێسته‌ی و چه‌لكا مه‌سیحیان، ژێده‌رێن ئاڤێ ل ڤان گوندان تووشی زیانێ بووینه و نوكه هه‌ولدان یێن دهێنه كرن ئاڤ ژ خابیری بۆ ڤان گوندان بهێته كێشان و ژبه‌ر شه‌رێ په‌كه‌كێ و توركیا ب كوژمێ شه‌ش ملیار دیناران وه‌لاتیێن ناحیا كانی ماسێ زه‌ره‌رمه‌ندبووینه “.
رێڤه‌به‌رێ ناحیا كانی ماسێ گۆتژی: نوكه پرۆژه‌یێ ئاڤێ بۆ گوندێ ئوره یێ دهێته دروستكرن و هه‌ولدان یێن دهێنه كرن بۆ دابینكرنا ئاڤێ بۆ سێ گوندێن دێ ژی ئه‌و ژی گوندێ چه‌لكا موسلمانان و چه‌لكا مه‌سیحیان و گوندێ كێسته دێ ئاڤ ژ خابیری بۆ ڤان گوندان هێته كێشان”.
