خودانێن هولێن شه‌هیانان نه‌رازیبوونه‌ك ئه‌نجام دا
دهۆك، نه‌وزاد هلۆری:
نوونه‌رێن هولێن داوه‌ت و شه‌هیانان ل هه‌موو پارێزگه‌ها دهۆكێ خرڤه‌بوونه‌كا نه‌رازیبوونێ ل هولا ته‌ناهی ئه‌نجام دا و تێدا خواست ده‌رگه‌هێن هولێن وان بهێنه ڤه‌كرن كو ژ ئه‌گه‌رێ كۆرۆنایێ هاتینه گرتن.
وه‌لید ئیسماعیل، نوونه‌رێ خودانێن هولان بۆ رۆژناما ئه‌ڤرۆ گوت: “مه وه‌كو خودانێن هولێن داوه‌ت و شه‌هیانان ل دهۆك و زاخۆ و ئاكرێ و هه‌موو پارێزگه‌ها دهۆكێ خرڤه‌بوونه‌كا ئاشتیانه یا نه‌رازیبوونێ ئه‌نجام دا و ده‌نگێ خوه گه‌هانده جهێن شوله‌ژێ كو بهێلن ئه‌م ژی وه‌كو هه‌موو جهێن دی هولێن خوه ڤه‌كه‌ین كو ژ ئه‌گه‌رێ كۆرۆنایێ هاتینه گرتن”.
زێده‌تر گوت: “نێزیكی پێنج هزار كه‌س ل هولێن داوه‌تان كار دكه‌ن و هه‌موو هه‌یڤان ئه‌م كرێ و باجێ و كرێیا ئاڤ و كاره‌بێ دده‌ین، هه‌كه كۆرۆنا ب تنێ ل هولێن داوه‌تان بیت بلا بگرن، به‌لێ هه‌كه ل هه‌موو جهایه و ب تنێ دێ هولا گرن ئه‌م د رازی نینین، له‌وا دڤێت پشته‌ڤانیا وان كه‌سان بهێته‌كرن كو ل وان هولان كار دكه‌ن و داهاته‌كێ بۆ خێزانێن خوه دبه‌ن”.
ناڤبری دیار كر ژی، هه‌كه حوكمه‌ت ل دووڤ داخوازیا وان نه‌هێت دێ وان هه‌لویسته‌كێ دی هه‌بیت و گوت: “هه‌كه به‌رسڤ نه‌خێر بوو، ئه‌م دێ هێینه سه‌ر جاددێ و چ یا د شیان ژی دا بیت دێ كه‌ین، چونكی ژین و ژیانا مه ل سه‌ر وان هولایه”.
