نابیت وێنه‌گر ب ترسیت
زاخۆ، عه‌لی حاجی:
سفیان عه‌لی، وێنه‌گرێ كه‌نالێ كوردستان تیڤی، د دیداره‌كێ دا بۆ رۆژناما ئه‌ڤرۆ دیاركر كو هاتنا تیرۆرستێن داعش بۆ وی بۆ رێیه‌ك ده‌ست ب كارێ وێنه‌گریێ بكه‌ت و شه‌هید بوون یان بریندار بوونا هێزێن پێشمه‌رگه‌یی ئه‌و گه‌له‌ك د ئێشاند و ئێدی وی ژی خوه وه‌كو پێشمه‌رگه‌یه‌ك دیت.
سفیان گۆت: د ده‌مه‌كێ كێم دا ڤیانا من ل گه‌ل كامیرێ زێده بوو، له‌وما ل سالا 2014 ل گه‌ل ده‌ستپێكرنا شه‌رێ داعش ده‌لیڤه‌ك بۆ من هاته پێش و بۆ جارا ئێكێ وه‌كو كامیره‌ڤانه‌كێ مه‌یدانی ل گه‌ل كه‌نالێ كوردستان تیڤی ده‌ست بكار بووم و د وی ماوه‌یێ كورت دا من شیا كاره‌كێ باش بكه‌م ژبه‌ركو ئه‌م دچووینه هنده‌ك جهان كێم كه‌سان دشیان بچنه وی جهێ ب مه‌ترسی، زێده‌باری وێ چه‌ندێ ژی ل ڤێ دووماهیێ ده‌مێ سۆپایێ توركیا هنده‌ك ده‌ڤه‌رێن روژئاڤایێ كوردستانێ داگیر كرین مه شیا بۆ ده‌مێ ده‌ه رۆژان رۆماله‌كا باش بكه‌ین، له‌ورا هه‌رده‌م ئه‌ز دبێژم پێدڤی یه وێنه‌گر نه‌ترسیت و هه‌موو ده‌مان ب وێره‌كی كارێ خوه بكه‌ت ژبه‌ركو وێنه‌گر دكه‌ڤنه دناڤ هه‌موو كاودانان دا، و د شه‌رێ دژی داعش دا ئه‌ز گه‌له‌ك دئێشام ده‌مێ من د دیت پێشمه‌رگه‌ك شه‌هید د بوو یان بریندار دبوو، به‌لێ من خوه وه‌كو پێشمه‌رگه‌یه‌ك د دیت ژبه‌ركو هه‌موو ده‌مان ل گه‌ل وان بووین.
