پتر ژ 50 سالانه ل عه‌فرینێ تابلۆیێن ژیانا كورده‌واریێ به‌رچاڤ دكه‌ت
ئه‌ڤرۆ،
خانما شێوه‌كارێ یا كورد ، شوكران بیلال كو خه‌لكێ باژێرێ عه‌فرینا رۆژئاڤایێ كوردستانێ یه، بۆ ده‌مێ پتر ژ 50 سالایه ب ڕێیا تابلۆیێن ره‌نگاوره‌نگێن خوه ژیانا كورده‌واری ل سه‌ر ئاخا عه‌فرینێ به‌رچاڤ دكه‌ت.
خانما شێوه‌كرا و هونه‌رمه‌ندا رۆژئاڤایێ كوردستانێ ل سالا 1954 ژ دایك بوویه و د ته‌مه‌نێ زارۆكاتیێ دا، ده‌ست ب كارێن هونه‌رێ شێوه‌كاری كریه و ل سالا 1966 پشكداری د پێشانگه‌ها زارۆكێن جیهانێ ل وه‌لاتێ ئیتالیا دا كریه، دوێ پێشانگه‌هێ دا خه‌لاته‌ك وه‌رگرتیه.
شوكران بیلال ل په‌یمانگه‌ها ( فه‌تحی موحه‌مه‌د ) كو یا تایبه‌ته ب هونه‌رێ شێوه‌كاری ڤه، ل باژێرێ حه‌له‌بێ خواندیه و ده‌رچوویا كولیژا هونه‌رێن جوان ل زانكۆیا حه‌له‌بێ یه.
خانما شێوه‌كار ئه‌نداما ئه‌كادیمیا نێڤده‌ولی یا هونه‌ری و زانست و ئه‌ده‌بی یه، هه‌تا نوكه ل ( حه‌له‌ب، به‌یرۆت ، پاریس ، ئه‌نتاكیا ، دیار به‌كر، و ئیتالیا، د پڕانیا پێشانگه‌هێن شێوه‌كاری دا كریه، هژمراه‌كا مه‌زنا خه‌لاتێن ناڤخووه‌یی و نێڤده‌ولی دا وه‌رگرتینه.
ل گۆڕ شاره‌زایێن دبیاڤێ هونه‌ری دا، خانما شوكران دتابلۆیێن خوه‌دا پتر گرنگیێ ب سرۆشت، و فۆلكلور و ژینگه‌هێ كورده‌واری دده‌ت، كو كه‌ساتیا خوه تێدا دبینیت و په‌یداكریه، بتایبه‌تی ژیانا ئافره‌ت زارۆكان، كو خه‌م و سته‌ماكارێ ل هه‌مبه‌ری وان دبه‌رده‌وامن، و هه‌رده‌م د سه‌رگردانیێ و ده‌ربه‌ده‌ریێ دا دهێنه رۆژه‌ڤێ.
