كەپەن و جلكێن كوردی ب سیرامیكی چێكرینە
زنار تۆڤی
شێوەكار (كانیك حاجی) د دیدارەكێ دا دبێژیت: ئەز مامۆستایا كۆمەلایەتیێ مە، بەلێ بەهرەیا من هونەرە، هەر ژ بچووكاتی ئەڤ بەهرەیە ل دەف من هەبوویە، نوكە ئەز كارێ شێوەكاری و پەیكەران دكەم ل گەل چێكرنا كارێن سیرامیكی ژی، پشتی من پشكداری د خولان دا كری، نوكە ئەز دشێم ب رەنگەكێ باشتر كارێن سیرامیكی چێكەم، چونكی من زانی ب رێكێن ئەكادیمی كارێن سیرامیكی دروست بكەم. هەروەسا گۆت: ل دەستپێكا كارێ سیرامیكی من دڤییا ئەز جلكێن كوردی، وەك كراس و فیستانان و شەل و شەپكان چێكەم، بەلێ بەری چەند رۆژان بابەتەك ل سۆشیالێ بۆ ترێند، كو ئەو ژی كۆمپانیەكا فرەنسی ب ناڤێ لوی ڤیتۆن، هزر بۆ خۆ ژ دەف كوردان بر و دزی و كەپەنێ كوردی دناڤا فاشیۆنا خۆ دا بەلاڤكر، ل گەل هندێ ژی مەرجێ نوو یێ فاشیۆنێ ئەوە، دڤێت تو كارەكی ژ هزرا خۆ دەربێخی، چێ نابیت تو لاساییكرنێ بكەی، یان ژی دڤێت تو ناڤێ وی جهی یان ژێدەری بێژی یێ كو تە ئەو كارە ژێ وەرگرتی، وان ژی فاشیۆنا خۆ بەلاڤكر و ناڤێ كوردستانێ نە گۆتبوو.
