ل دۆر رۆمانا (من به‌س تو یێ هه‌ی) یا (مه‌لیكه مه‌زان)
د. ره‌شید فندی
به‌ری ده‌مه‌كێ كورت، رۆماننڤیسا مه‌غربی دۆستا ملله‌تێ كورد، (مه‌لیكه مه‌زان) دوماهی رۆمانا خوه، ئه‌وا بناڤێ (عاریه الا منك) بۆ من هنارت و ژ من داخواز كر ئه‌ز بخوینم وپاشی تشته‌كێ كورت ل دۆر وێ رۆمانێ بنڤیسم. ئه‌م دشێین ناڤونیشانێ رۆمانێ ب كوردی بكه‌ینه (چو د به‌ر من نینه به‌س تو) یان (من كه‌س نینه به‌س تو).
مه‌لیكه مه‌زان، رۆمان نڤیسه‌كا مه‌غربی یه ژ نفشێ (ئه‌مازیغی)یه كو به‌ری ئیسلامه‌تی بگه‌هیته وه‌لاتێت باكوورێ ئه‌فریقیا، چو عه‌ره‌ب ل وێرێ نه‌بوون، و ئه‌مازیغی ملله‌تێ سه‌ر ده‌ست بوو ل وێرێ.
مه‌لیكه مه‌زان، یا د حه‌ژێكرنا ملله‌تێ كورد دا بهوژی، و ئه‌ڤه دو رۆمان بۆ حه‌ژێكرنا ملله‌تێ كورد و پێشمه‌رگه‌ی ته‌رخان كرن، رۆمانا به‌ری ڤێ، بناڤێ (ما اصعب الا اراك) بوو، واته (چه‌ند زه‌حمه‌ته ته نه‌بینم).
جهێ راچاندنا ته‌ڤنێ رۆمانا وێ یا نوو، زیندانه‌كه ژ زیندانێت وه‌لاتێ (مه‌غرب) وه‌سا دده‌ته خویاكرن كو ئه‌و ژ به‌ر حه‌ژێكرنا وێ بۆ ملله‌تێ كورد و پێشمه‌رگه‌ی یا د زیندانێ ڤه وێ زیندانیا ژن، ناڤێ (دیهیا) بۆ خوه دانایه كو ناڤه‌كێ (ئه‌مازیغی)یه، وه‌سا دیار دكه‌ت، ده‌سهه‌لاتا نوكه ل وه‌لاتێ مه‌غرب، چو ژ گرنگیا ملله‌تێ كورد نزانیت، هه‌ر وه‌سا گرنگیا رۆلێ پێشمه‌رگه‌ی بۆ شكاندنا (داعش) و پاراستنا ده‌ڤه‌را مه و هه‌می جیهانێ ژ هزر و بیرێت وان یێت خراب.
رۆماننڤیس (مه‌لیكه) زیره‌كانه وێ هزرا مه گۆتی، د ناڤ زیندانێ دا دده‌ته خویاكرن و هنده‌ك په‌له‌وانێت چیرۆكێ دكه‌ته پشته‌ڤان و هاریكار بۆ پشته‌ڤانیا ملله‌تێ كورد و پێشمه‌رگه‌ی، نه هه‌ر ئه‌ڤه، به‌لكو په‌له‌وانه‌كا چیرۆكێ د ناڤ زیندانا ژنان دا، دكه‌ته كورد بناڤێ (بارین) و هه‌ڤاله‌كا نێزیكا وێیه، هه‌ر وه‌سا به‌رامبه‌ری هندێ په‌له‌وانه‌كا چیرۆكێ بناڤێ (حه‌جیا خه‌دیجا) دیار دكه‌ت كو دژی هزر و بیرێت وانه و ب تنێ هزرێت ئیسلامی یێ ل نك هه‌ین، هزر و بیرێت هشك و توند، هه‌ر وه‌سا وێ حه‌جیایێ چو هزر و بیر ل دۆر ملله‌تێ كورد نینن .
خۆشتڤیێ (دیهیا) یا ئه‌مازیغی ژی هه‌ر قه‌هره‌مانه‌كێ ئه‌مازیغی یی فرۆكه‌ڤانه بناڤێ (ئه‌كسیل) و هه‌ر یا ل به‌ندا وی. ڤیانا وی قه‌هره‌مانی د گه‌ل ڤیانا پێشمه‌رگه‌ی تێكه‌ل دكه‌ت و د ئه‌نجامدا وه‌سا دیار دكه‌ت كو هه‌ردو ملله‌تێت كورد و ئه‌مازیغی ل ده‌ڤه‌را رۆژهه‌لاتا ناڤه‌راست وه‌كی ئێكن و خه‌باتا وان یا پیرۆزه بۆ ب ده‌ست خستنا مافێت خوه و ئه‌و هه‌ر دو ملله‌ت د ره‌سه‌نن ل ده‌ڤه‌رێ و بێدادی د گه‌ل هاتیه كرن ده‌مێ ل سه‌ر ده‌ستێ ملله‌تێت زۆر ده‌ست وه‌لاتێ وان هاتیه پارچه كرن ، كوردستان ل ناڤبه‌را توركیا و ئیرانێ و عیراقێ و سووریێ، و وه‌لاتی ئه‌مازیغیا ل ناڤبه‌را وه‌لاتێت مه‌غرب و جه‌زائیر و توونس و لیبیا..
رۆماننڤیس (مه‌لیكه مه‌زان) كه‌یفخۆشیا خوه دیار دكه‌ت ده‌مێ ل دۆر كورد و كوردستانێ د نڤیسیت و دبێژیت: (نڤیسینا من گه‌ش دبیت، ده‌مێ ل دۆر هه‌وه دنڤیسم.) هه‌ر وه‌سا د بێژیت (د ناڤ زیندانیا دا تێته زانین كو سه‌رێ من یێ پڕه ژ ڤیانا وه، ئه‌ڤه ژی نیشانێ منه… )
ل دۆر سیسته‌مێ پێكڤه ژیانێ ل كوردستانێ ،(دیهیا) ئه‌مازیغی دبێژیته هه‌ڤالێت خوه یێت زیندانی (بۆ نموونه ل كوردستانی ل دۆر ئێك مێز، یێ موسلمان و مه‌سیحی وجویی و ئێزدی و زه‌رده‌شتی بگره هه‌تا یێ مولحد ژی دروونن، و بێی شه‌ر و توندوتیژی روونشتنا وان ب دوماهی تێت). به‌لێ د گه‌ل هندێ ژی ده‌سهه‌لاتێت دكتاتۆری، ناڤیت كوردی و ئه‌مازیغی قه‌ده‌غه دكه‌ن و دڤێن وان ناڤا داننه سه‌ر زارۆكێت خوه یێت وان دڤێن ، واته ناڤێت رژێمێت داگیر كه‌ر .
تشته‌كێ سه‌یره كو په‌له‌وانا چیرۆكێ یا بنیات كورد (بارین) د زیندانێ ڤه سروودا نیشتیمانیا كوردی (ئه‌ی ره‌قیب) نیشا زیندانیا دده‌ت…
هه‌ر چاوا بیت رۆماننڤیسا مه‌غربی یا بنیات ئه‌مازیغی، دۆسته‌كا گرنگه بۆ ملله‌تێ كورد و پێدڤیه كورد وێ دۆستا دلسۆژ ژ بیر نه‌كه‌ن و هه‌ر نێزیكی خوه بكه‌ن، هه‌ر وه‌سا فه‌ره هه‌می خوانده‌ڤایێت مه رۆمانێت وێ بخوینن و گرنگیێ پێ بده‌ن .
