دیارییا مەلا مستەفایێ بارزانی دایـە بابـێ من هێشتا یا ل دەف مـن پاراستی یە
سالار محەمەد دۆسكی:
1-7
پێشمەرگەیێ شۆڕشا گولانێ ئسماعیل سادق عەزیز بێتكاری بەرواری، ل سالا 1951 ژ بنەمالەكا نشتیمان پەروەر و كورد پەروەر ژ دایك بوویە، ژ پێنچ برا پێك دهات و سێ برا شەهید بووینە، ل بەر دەستێ مامۆستایێن ئاینی فێری خواندنا قورئانێ بوویە، دناڤ شۆڕشێ دا زێدەتر خوە فێری خواندن و نڤێسیێ دكەت، و پتر شیانێن خوەیێن زانستی و فێربوونێ پێش تێخیت.
ل سالا 1996 هاتینە ناڤ باژێرێ دهۆكێ و پێشتر ل بێگوڤا بووینە و ل ل سالا 1981 دبیتە پێشمەرگە و قەستا ناڤ رێزێن شۆڕشا گولانێ دكەت
پێشمەرگەیێ شۆڕشا گولانێ ئسماعیل سادق عەزیز بێتكاری بەرواری، د دیدارەكێ دا ل گەل رۆژنامەیا ئەڤرۆ گۆت: ل سالا 1958 بابێ من دناڤا رێكخستیێن پارتی دیموكراتی كوردستان دا هاتە رێكخستن، ل سالا 1961 ل دەمێ مەلا مستەفا بارزانی قەستا دەڤەرا بەرواری یا دكەت، و ل گوندێ كارە بابێ من ل گەل چەندین مرۆڤێن مە ل گوندێ ناڤبری پێشوازی ل خودێ ژێ رازی مەلا مستەفا بارزانی كر و قەستا ناڤ شۆڕشا ئیلۆنێ دكەن، و دبنە پێشمەرگە و هەر هەمان دەم خودێ ژێ ڕازی مەلا مستەفا بارزانی ل گەل چەندین پێشمەرگان بۆ ماوەێ چەند هەیڤان ما ل گوندێ تروانش، دوڤدا بابێ من بۆ پێشمەرگە ل گەل هەر ئێك ژ ناسر بەگێ و بابێ من جێگرێ وی بوو وی دەمی دگۆتنێ سەرقول و گەلەك پێشمەرگەیێن دەڤەرا بەرواری یا ژ گوندێن (كارە، سپینداری، ئورە، تروانشی) گەلەك گوندێن دی سەر ب وی ڤە بوون و سەرپەرشتێ گشتی ناسر بەگ بوو، گەلەك شەرێن شۆڕشا ئیلۆنێ بابێ من پشكداری تێدا كریە، وەكی شەرێن (مێرگەسورێ، سەرێ ئامێدیێ، مەتینی، پێشابیرێ، شۆش و شەرمن، كەپیێ عەمەر ئاغایی) زێدەباری رامالینا جاشان ل گەلەك دەڤەرێن كوردستانێ، ژ ئەنجامێ ڤێ پشكداریكرنێ و بابێ من دو جاران هاتیە خلاتكرن و رێز ل خەبات و زیرەكی و مێرخاسیا وی هاتیەگرتن، هەر جهێ بابێ من قەست كربایێ ئەو جه نەبەردا و مێرەكێ زیرەك بوو بۆ تڤەنگا خوە، شەرێ(مێرگەسورێ) وەكی ژێ دهێتە گۆتن شەرەكێ مەزن بوو، و هێزەكا مەزن یا لەشكرێ ئیراقێ ل گەل جاشا پشكداری تێدا كربوو، ئەو وی شەری ل گەل هێزەكا دەڤەرا بارزان پشكداربوون، ل دوف گۆتنا خودێ ژێ ڕازی ناسر بەگێ كو چیرۆكا وی شەری ڤەدگێرا كوخ ودێ ژێ ڕازی مەلا مستەفا بارزانی ب دووربینی هایداری ڕەوشا شەڕێ ناڤبری بوو، و یێ ئاگەدار بوو ل سەر هەر لڤین و بزاڤەكێ و جەنابێ وا فەرمان دا بوو كو خودانێ بەرگیزێن شین پشتی شەری بلا بهێتە دەف وی و ئەو ژی بابێ من بوو و دەمێ شەر ب دووماهی هاتی جەنابێ بارزانی گۆت ئەڤی بدەنە ل گەل من و هەمان دەم ناسر بەگێ گۆت بوو ئەم هەمی ل گەل تەینە جەنابێ سەرۆك و ئەم هەمی خزمەتێ داینە، و دوڤدا گەلەك پێشمەرگە ژ وی شەری هاتنە خەلاتكرن، و هەر ئێكێ دەستەكێ بەرگیزا و پێنچ دینار ژ جەنابێ وان وەك خەلات وەرگرتن، دیسا ل شەرەكێ دی هەر دیسا ژ بەر چالاكی و زیرەكی یا وی رەختەكێ فیشەكا و بڕنوویەك وەك دیاری بابێ من وەرگرت بوون و هەتا نوكە ئەو رەخت مایە و مە پاراستی یە، ل سالا 1975 پشتی نسكۆ ب سەرێ مللەتێ مە داهاتی، ئەو رەخت ل گەل تڤەنگا خوە یا بڕنوو و خەنجەرەكا زیفی من ڤەشارت بوون ل گل چەندین كەرستە و كەل و پەلێن لەشكری من دناڤ شكەفتەكێ ڤە ڤەشارت بوون، و ل سالا 1996 ل ئەوان كەرستێن ڤەشارتی زڤریم و دووبارە من ئینانە ڤە و هەتا نوكە وەكی من ئاماژە پێكری دپاراستینە، تڤەنگا بڕونوو وی دەمی برایێ من ژی بكارتینا پێشمەرگە بوو و فیشەك ل سەر كیسێ خوە دكرین.
هەمان پێشمەرگەیێ شۆڕشا گولانێ ئەو ژی گۆت: باپیرێ من هەر دكەڤندا چەك هەبوو و دەمێ ل دەسپێكا سالێن شێستان چەند مەغفەرێن پولیسان ل دەڤەرێ هاتینە ستاندن، ئەو چەك وەك دەسكەفتەكی بۆ پێشمەرگەی ما و گەلەك جورێن چەكان هەبوو و هەنگێن روسی هەبوون، قەمە پێڤە بوون و ئنگلیزیێن كورت هەبوون و بڤێ رێكێ بابێ من ژی وەكی هەڤالێن خوەیێن پێشمەرگە ب چەك كەفت دناڤ شۆڕشێ دا.
هەمان پێشمەرگەیێ شۆڕشا گولانا پێشكەفتنخواز ئەو ژی گۆت: شیرەتا باببێ من یا هەمی گاڤا دگۆت دڤێت چ جارا ئەم بەرێ چەكێ خوە نەدەینە سەری و دڤێت بەرێ چەكێ مە هەر ل دوژمنی بیت، بابێ من دو جاران چوویە خزمەتا مەلا مستەفا بارزانی خودێ ژێ رازی بیت، دگۆت چەند مرۆڤێ خەموكی و عاجز و وەستایی بیت و دەمێ دچیە دیوانا مەلا مستەفا بارزانی هەر هەمی وەستیان و ماندیبوون دهاتە ژبیركرن، چونكە مرۆڤەكێ دادپەروەر و شارەزا و بیر تیژ و دووربین بوو و گەلەك ب نەرمی و روحەت ل گەل مرۆڤی تاخفت.
پێشمەرگەیێ شۆڕشا گولانێ ئسماعیل سادق عەزیز بێتكاری بەرواری ئەو ژی گۆت: دەمێ ئەم زارۆك و گەلەك جاران بابێ من دهاتە دەستیردانێ و مە ب چەك و جلكێن كوردی دیت و دیسا گەلەك جاران پێشمەرگە دهاتنە گوندێ مە وی دەمی مە هەست كر كو ئەم مللەتەكێ مەزلومین و باب و برا و مرۆڤێن مە یێ بەرەڤانیێ ژ ماف و نەتەوا مە دكەن، ئانكو مە هەست ب كوردینیێ كر، بەری رێكەفتنا 11ی ئادارا سالا 1970 دو جاران ل گەل بابێ خوە من سەرەدانا فەرماندە ئەسعەد خۆشەڤی ل گوندێ قومریێ ل دەڤەرا بەرواری یا كریە و سەرەدانێن خوە دا من داخازا چەكی ژ فەرماندەی كر، وی كەرم كر و گۆت هێشتا تو بچوویكی نابیت تو چەكی هەلگری، دیسا ل گەل بابێ خوە گەلەك جاران چوویمە دەمێ ل ئەركێن پێشمەرگاتیێ دا وی دەمی ئەز برایێ مەزن بووم و زێدەتر دەمی من ل گەل بابێ من بوو.
پێشمەرگەیێ شۆڕشا گولانێ ئسماعیل سادق عەزیز بێتكاری بەرواری، گۆت: ل سالێن 1961- 1963- دو جاران فرۆكان توب بارنكرن و ل سالا 1964 چارجاران فرۆكان گوندێ مە توب بارانكر، و گوند هاتە سۆتن و نەبتنێ گوندی مە بەلكو هێرش دكرە سەر گەلەك گوندان و دسۆتن و بتنێ قورتالكرنا روحێ بوو خەلك دچوونە شكەفت و بن دەحلا ڕا خوە دپاراستن و گەلەك جاران ژی قەستا گوندەكێ دی دكر یان دەڤەرەكا دی هەتا كاودانێن دەڤەرێ باشتر بانە و ڤەدگەریانە سەر گوند و ملك و مالێن خوە و دووبارە دەست ب ژیانا خوە یا جوتایێ و خودانكرنا تەرش و كەوالی دكر.
