رێڤه‌به‌رێ ڤه‌گوهاستنا دهۆكێ: چو بریار نه‌گه‌هشتینه مه بۆ زێده‌كرنا ماوێ لوگوكرنێ
دهۆك، نه‌وزاد هلۆری:
ب گوره‌ی بریارا وه‌زاره‌تا ڤه‌گوهاستنێ یا حوكمه‌تا هه‌رێما كوردستانێ رۆژا 1/8/2021ێ ژڤانێ لێدانا شه‌ریت و لوگویێن ته‌كسیان ب دوماهی هاتیه، به‌لێ كاركرنا وان به‌رده‌وامه و هه‌تا نوكه نێزیكێ 30% هاتینه لوگوكرن. رێڤه‌به‌رێ ڤه‌گوهاستنا دهۆكێ ژی دیاركر كو پێدڤی یه شوفێر ب زووترین ده‌م سه‌ره‌دانا رێڤه‌به‌ریێ بكه‌ن بۆ لوگوكرنا ته‌كسێن خوه.
خوشه‌بی عوسمان، رێڤه‌به‌رێ ڤه‌گوهاستنا دهۆكێ بۆ ئه‌ڤرۆ دیاركر كو بریاربوو رۆژا 1/8/2021ێ كارێ شه‌ریت و لوگوكرنا ته‌كسیان بهێته راگرتن و گۆت: (هه‌تا نوكه نێزیكێ چوار هزار ته‌كسیی ل سنورێ رێڤه‌به‌ریا مه هاتینه توماركرن كود بیته رێژا نێزیكێ 30% ژ كوما وان ته‌كسیێن ل پارێزگه‌ها دهۆكێ هه‌یی، نوكه كاركرنا مه ل سه‌ر شه‌ریت و لوگوكرنا ته‌كسیان به‌رده‌وامه و رۆژانه دناڤبه‌را 100 بۆ 120 ته‌كسیان دهێنه لوگوكرن).
زێده‌تر گۆت: (ب گوره‌ی په‌یچێ وه‌زاره‌تا ڤه‌گوهاستنێ ده‌مێ شه‌ریت و لوگوكرنا ته‌كسیان بۆس ێ هه‌یڤان هاتیه درێژكرن، به‌لێ هه‌تا نوكه چوو بریار و نڤیسار بۆمه نه‌هاتینه، ئه‌گه‌ر ده‌م هاته زێده‌كرن پێدڤی یه شوفێر ب زوترین ده‌م قه‌ستا رێڤه‌به‌ریا مه بكه‌ت بۆ توماركرنا ته‌كسێن خوه، داكو تووشی چو به‌رپرسیاره‌تیێن قانونی نه‌بن).
ناڤبری دیاركر ژی كو هه‌ر شوفێره‌كێ ته‌كسیان دده‌ما دیاركری دا ته‌كسیا خوه لوگو نه‌كر دێ هێته سزادان و گۆت ژی: (شوفێر دێ ژلایێ رێڤه‌به‌ریا هاتن و چونێ هێته سزادان كو ئه‌و ژی گرتنا ترومبێلا وی یه هه‌تاكو شه‌ریت و لوگو دكه‌ت، ئه‌گه‌ر دووباره بو ودێ ب كوژمێ 500 هزار دیناران هێته سزادان، مه‌ره‌م ژ لوگوكرنا ته‌كسیان ژی بۆ هندێ یه كو جوداهی د كارێ ته‌كسیان دناڤبه‌را پارێزگه‌هان و وان ته‌كسیان ژی بهێته‌كرن ئه‌وێن دناڤا پارێزگه‌هان و ده‌رڤه‌یێ پارێزگه‌هان كار دكه‌ن، ئه‌ڤه زێده‌باری وێ یه‌كێ كو ژروویێ ئه‌من و ئاسایشێ ڤه زێده‌تر كونترولا وان دهێته‌كرن و هه‌ر كه‌سێ تشته‌كێ خوه ژی به‌رزه بكه تدێ زوتر هێته دیتن).
ئه‌و شوفێرێن كو د سرا شه‌ریت و لوگوكرنا ته‌كسێن خوه دابوون گله‌یێن زۆر ل جهێن شوله‌ژێ دكرن كو پێرابوونێن وان زۆرن و چه‌ندین رۆژان پێڤه دمینن هه‌تاكو بشێن تومار بكه‌ن.
شوفێره‌كێ ته‌كسیێ كو ل زاخۆ هاتبویه رێڤه‌به‌ریا ڤه‌گوهاستنێ و نه‌ڤیا ناڤێ خوه بێژیت بۆ ئه‌ڤرۆ گۆت: (پێدڤی بوو مه هه‌ر ل زاخۆ دروستكربایه ژبه‌ركو ئه‌م نه‌شێن بۆ چه‌ندین جاران هاتن و چونێ دناڤبه‌را زاخۆ و دهۆكێ بكه‌ین، هه‌تاكو ئه‌م مامه‌له‌یێن خوه داوی بینین 10 جهان دچینێ كو ئه‌ڤ یه‌ك ژی ده‌مه‌كێ زۆره و هه‌موو جهان ژی ره‌نگه سرا بیت، ئه‌ڤه زێده‌باری كو مه‌سره‌فه، كارێ مه‌یێ ته‌كسیێ وه‌كو كارێ خازوكان لێ هاتیه، له‌وا دبیت بارێ مه بهێته سڤكرن).
