سه‌رۆكێ ده‌سته‌یا وه‌به‌رهێنانێ: ئه‌ڤ ساله گه‌له‌ك وه‌به‌رهێنه‌رێن بیانی خواستیه پرۆژان ئه‌نجام بده‌ن
ئه‌ڤرۆ، زنار تۆڤی:
سه‌رۆكێ ده‌سته‌یا وه‌به‌رهێنانێ ل هه‌رێما كوردستانێ دیار كر، نوكه قه‌بارێ وه‌به‌رهێنانێ ل هه‌رێما كوردستانێ زێده‌بوویه، د ئه‌ڤ ساله دا هژماره‌كا باش یا پرۆژێن وه‌به‌رهێنانێ ل هه‌رێما كوردستانێ هاتینه په‌سه‌ند كرن و ژ روویێ ئابووری ڤه دێ مفایه‌كێ باش گه‌هیننه هه‌رێما كوردستانێ، د هه‌مان ده‌م دا ئه‌ڤ ساله گه‌له‌ك وه‌به‌رهێنه‌رێن بیانی قه‌ستا هه‌رێما كوردستانێ كریه و وان وه‌به‌رهێنه‌ران ڤیایه پشكداریێ د چێكرنا پرۆژه‌یان دا بكه‌ن، دیسا رۆژانه وه‌به‌رهێنه‌ر قه‌ستا ده‌سته‌یا وه‌به‌رهێنانێ دكه‌ن، ژ پێخه‌مه‌ت كاری د ڤی كه‌رتی دا بكه‌ن.
د. محه‌مه‌د شوكری، سه‌رۆكێ ده‌سته‌یا وه‌به‌رهێنانێ زێده‌تر بۆ رۆژناما ئه‌ڤرۆ گۆت: “نوكه كار د چه‌ندین پرۆژێن ستراتیژی دا دهێته كرن، ژ وان ژی پرۆژێ پیشه‌سازیا خوارنێ ل پارێزگه‌ها دهۆكێ، نوكه قووناغا ئێكێ ب دووماهی هاتیه، كو مه‌زنترین پرۆژێ پیشه‌سازیا خوارنێ یه ل سه‌ر ئاستێ عیراقێ، د هه‌مان ده‌م دا مه چه‌ندین پرۆژێن ستراتیژی یێن دیتر ژی هه‌نه، وه‌سا بڕیاره ئه‌و پرۆژه ژی بكه‌ڤنه د وارێ بحهئینانێ دا”.
گۆتژی: “ئه‌ڤ ساله كه‌رتێ وه‌به‌رهێنانێ ل هه‌رێما كوردستانێ پێشڤه‌چوون ب خوه‌ڤه دیتیه، ل سالا 2021 ب تنێ 396 پرۆژه د كه‌رتێن جودا یێن وه‌به‌رهێنانێ دا هاتینه په‌سه‌ند كرن، دیسا هه‌ژماره‌كا پرۆژێن دیتر یێن ستراتیژی هه‌نه و بڕیاره ئه‌و پرۆژه ژی بكه‌ڤنه د وارێ بجهئینانێ دا، ب ڤێ چه‌ندێ دێ كه‌رتێ وه‌به‌رهێنانێ كه‌ڤیته د قووناغه‌كا دیتر یا پێشكه‌فتنێ دا ل هه‌رێما كوردستانێ، هه‌روه‌سا د نوكه دا قه‌بارێ وه‌به‌رهێنانێ ژی ل هه‌رێما كوردستانێ گه‌له‌ك زێده بوویه”.
