كوربه‌ندا ئابووری یا زه‌لامكارێن توركیا و عیراقێ ل دهۆكێ هاته ئه‌نجامدان
دهۆك، نه‌وزاد هلۆری:
ب به‌رهه‌ڤبوونا پارێزگارێ دهۆكێ و ب پشكداریا پتری 50 كۆمپانیێن توركی و عیراقی و هه‌رێما كوردستانێ، كوربه‌ندا ئابووری یا زه‌لامكارێن توركی و عیراقێ ل دهۆكێ هاته كرن.
د چارچوڤێ كوربه‌ندی دا هژماره‌كا گوتاران هاتنه پێشكێشكرن و چه‌ندین گرێبه‌ست و لێكتێگه‌هشتن د ناڤبه‌را بازرگان و به‌لێنده‌ر و خودان كۆمپانیێن هه‌رێما كوردستان و عیراق و توركیا دا هاتنه ئه‌نجامدان.
د.عه‌لی ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانی دا دیار كر كو وه‌لاتێ توركیا ل سه‌ر ئاستێ كوردستان و عیراق و پشكه‌كا هه‌ری زۆر یا وه‌لاتێن جیهان و ده‌ڤه‌رێ ژی ژ روویێ ئابووری ڤه گرنگیه‌كا تایبه‌ت هه‌یه و گۆت: “وه‌كو كارگێریا پارێزگه‌ها دهۆكێ هه‌موو پێرابوونێن قانوونی و ئاسانكاریان بۆ بارزگانان دكه‌ین، ب تایبه‌تی ب رێیا ده‌رگه‌هێ ئیبراهیم خه‌لیل ل زاخۆ و هه‌ر ئاریشه‌كا دكه‌ڤیته د ناڤبه‌را بازرگانان دا ئه‌م به‌رهه‌ڤین چاره‌سه‌ر بكه‌ین، هه‌كه ژلایێ مه بیت، من دڤێت بێژم: باشترین و ب رێكوپێكترین و قانوونیترین ده‌رگه‌هه ل عیراقێ؛ ده‌رگه‌هێ ئیبراهیم خه‌لیله، هه‌ر جوداهیه‌كا ده‌رگه‌هێن دی ل گه‌ل ده‌رگه‌هێ ئیبراهیم خه‌لیل ئه‌م ب روونی دبێژین: ئه‌و گه‌نده‌لیێ و قاچاغچیێ دكه‌ن، ل زاخۆ هیچ تشته‌كێ زێده ناهێته وه‌رگرتن و ئه‌م پێگیریێ ب هه‌موو رێنمایێن حوكمه‌تا ناڤه‌ندی و حوكمه‌تا هه‌رێما كوردستانێ دكه‌ین”.
زێده‌تر گۆت: “هه‌موو بازرگانێن عیراق و هه‌رێما كوردستانێ ب باشترین شێوه دێ ئاسانكاری بۆ هێنه‌كرن دوور ژ رۆتین و نه‌قانونیێ، رێنمایی بۆ هه‌موو لایه‌كی هاتینه‌كرن”.
ژلایه‌كێ دیڤه، فه‌رید ئه‌یوب، ئه‌ندامێ ده‌سته‌یا بلند یا به‌لێنده‌رێن كوردستانێ دیار كر كو د ڤێ كوربه‌ندا ئابووری دا، نێزیكی 40 كۆمپانیێن توركی و هژماره‌كا كۆمپانیێن عیراقێ و هه‌رێما كوردستانێ تێدا پشكدارن و بۆ ئه‌ڤرۆ گۆت: “د ناڤبه‌را بازرگان و به‌لێنده‌ر و كۆمپانیان دا چه‌ندین گرێبه‌ست هاتینه كرن و لێكتێگه‌هشتنه‌كا زۆر د ناڤبه‌را وان دا هاتیه‌كرن و په‌یوه‌ندیێن باشتر دناڤبه‌را وان دا هاتینه‌كرن”.
فه‌ریدی زێده‌تر گۆت: “80% ژ به‌لێنده‌رێن كوردستانێ كارێ بازرگانیێ ژی دكه‌ن، قه‌یرانا دارایی و كۆرۆنایێ ژی زۆرترین زیان گه‌هاندینه وان، به‌لێ پشتی ده‌ست ب كاربوونا كابینا نه‌هێ جاره‌كا دی ڤه‌لڤین كه‌فتیه كاری و دوباره به‌لێنده‌ر كه‌فتینه كاری، نێزیكی 500 ملیۆن دۆلاران قه‌رێن به‌لێنده‌ران ل نك حوكمه‌تێ نه، بزاڤ دهێنه‌كرن كو هه‌ر چو نه‌بیت پشكه‌ك ژ وی پاره‌ی بۆ به‌لێنده‌ران بهێته مه‌زاختن”.
