كۆمپانی و بازرگانێن توركیا زێده‌تر دێ قه‌ستا هه‌رێما كوردستانێ كه‌ن
دهۆك، له‌زگین جوقی:
سه‌رۆكێ كۆمه‌لا پیشه‌سازی و خودانكارێن نێڤده‌وله‌تی ل توركیا دیار كر كو ره‌وشا هه‌رێما كوردستانێ بۆ ئه‌نجامدانا كارێ بازرگانی گه‌له‌ك گونجایه و نوكه هه‌ژماره‌كا كۆمپانی و بازرگانێن توركیا ل هه‌رێما كوردستانێ كار دكه‌ن و دبێژیت: ئه‌م یێ كار دكه‌ین زێده‌تر كۆمپانی و بازرگانێن توركیا قه‌ستا هه‌رێما كوردستانێ بكه‌ن.
نه‌واف كلیچ، سه‌رۆكێ كۆمه‌لا پیشه‌سازی و خودانكارێن نێڤده‌وله‌تی ل توركیا بۆ رۆژناما ئه‌ڤرۆ گۆت: “ئه‌م دخوازین پتر كۆمپانی و بازرگانێن توركیا قه‌ستا هه‌رێما كوردستانێ بكه‌ن، بۆ ڤێ مه‌ره‌مێ ژی شانده‌كێ كۆمپانی و بازرگانێن توركیا هاتیه هه‌رێما كوردستانێ و ل هه‌موو پارێزگه‌هێن هه‌رێما كوردستانێ دێ روونشتنان دگه‌ل بازرگانان ئه‌نجام ده‌ن بۆ وێ چه‌ندێ رێككه‌فتن د ناڤبه‌را بازرگانێن توركیا و هه‌رێما كوردستانێ دا بهێنه كرن بۆ كاری بازرگانی”.
ئاشكرا ژی كر كو پشتی بازرگانێن توركیا ب چاڤێن خوه ره‌وشا هه‌رێما كوردستانێ دبینن دێ گه‌هنه وێ باوه‌ریێ كو هه‌رێما كوردستانێ ژی وه‌كو توركیا یا ئارام و خوه‌شه بۆ كارێن بازرگانی و چو ئاریشه نینن و گۆت: “نوكه بازرگانێن شه‌رنه‌خێ، مێرسینێ، ئه‌سته‌نبول، ئه‌زمیر، بورسا، وانێ، ئامه‌د و هه‌ژماره‌كا ویلایه‌تێن دی یێن وه‌لاتێ توركیا هاتینه هه‌رێما كوردستانێ كار دكه‌ن، مه دڤێت كۆمپانی و بازرگانێن توركیا پتر قه‌ستا هه‌رێما كوردستانێ بكه‌ن و ئه‌ڤه بۆ مه یا گرنكه”.
نه‌واف كلیچ گۆتژی: “مه‌ره‌ما مه ئه‌وه بازرگانێن توركیا دگه‌ل بازرگانێن هه‌رێما كوردستانێ ریككه‌فتنان بۆ كارێن بازرگانی د وارێ چاندن و پیشه‌سازی دا ئه‌نجام بده‌ن، بازرگان كار بكه‌ن، داكو ئابوورێ مه یێ بهێز بیت، له‌ورا ئه‌م دێ كومپانیان هانده‌ین ژ هه‌موو ده‌ڤه‌رێن توركیا قه‌ستا هه‌رێما كوردستانێ بكه‌ن بۆ كاركرنێ”.
زێده‌تر گۆت: “نوكه ئه‌م یێ كار دكه‌ین داهاتێ بازرگانی دو قات زێده ببیت، په‌یوه‌ندیێن خوه یێن ئابووری و بازرگانی دگه‌ل هه‌رێما كوردستانێ بهێز بكه‌ین، بۆ ڤێ مه‌ره‌مێ ژی نوكه ب هزاران كۆمپانیێن توركیا ل هه‌رێما كوردستانێ كار دكه‌ن و مه پلان هه‌یه پتر كۆمپانیێن توركیا بهێنه هه‌رێما كوردستانێ كار بكه‌ن”.
