تۆلڤه‌كرن ژ كێ؟!
به‌درخان عه‌بدولكه‌ریم زاویته‌یى
هنده‌ك ژ خه‌لكی هۆسا هزردكه‌ن هه‌لبژارتن ده‌لیڤه‌یه بۆ تۆلڤه‌كرنێ، به‌لێ تۆلڤه‌كرن ژ كێ و بۆچێ؟! ده‌نگ وه‌كی چه‌كی یه، دڤێت بۆ بهێزكرنا خوه ل به‌رامبه‌ر دوژمنێن خوه بكاربینی، بۆ پاراستنا خوه بكاربینی، هه‌ر ره‌فتاره‌كا شاش و خه‌له‌ت بكارئینانا ڤی چه‌كی هه‌روه‌كی تو وی چه‌كی راده‌ستی یێ به‌رامبه‌ر خوه دكه‌یی و دژی ته دكارئینیت!، ئێدی ئه‌نجامێن ڤێ ره‌فتارێ دیارن د چاوابن.
ئه‌م هه‌می باش دزانین كێموكاسی یێن هه‌یین و خه‌لك پێدڤی پتر خزمه‌تێ یه چاڤ وان قوربانیێن هاتینه‌دان، به‌لێ ئه‌ڤه وێ چه‌نده نادیاركه‌ت وه‌كو هنده‌ك لایه‌ن بانگه‌شێ پێ دكه‌ن كو چ نه‌هاتیه‌كرن! به‌لكو كوردستانێ د هه‌می بیاڤان دا چه‌ندین قۆناغ برینه و چ به‌راوردی نائێنه‌كرن د ناڤبه‌را پارێزگه‌هێن هه‌رێمێ و پارێزگه‌هن دی یێن ئیراقێ دا. و نوكه ره‌فتارا وه‌لاتێن سه‌ربه‌خوه ل گه‌ل كوردستانێ دئێته‌كرن و ئه‌ڤ ده‌ستكه‌فته دڤێت ب ده‌نگدانێ بهێنه پاراستن.
تۆلڤه‌كرنێ ژكێ؟!
دڤێت ده‌نگێ ته تۆلڤه‌كرن بیت ژ وان لایه‌نان یێن كو ملێ خوه داینه ملێ شۆفینیان ل به‌غدا بۆ برینا مووچه و بۆدجه‌یێن هه‌رێمێ و هه‌ر چ یاخراب و نه شرین هه‌یه ل هه‌مبه‌ر كوردستانێ یاگۆتی. ده‌نگێ ته دڤێت تۆلڤه‌كرن بیت ژ وان لایه‌نان یێن نیڤه‌كا ئاخا ڤی وه‌لاتی راده‌ستی ملیشیاتان كری و خه‌لكێ مه ل وان ناڤه‌یا تووشی كاره‌ساتێن مه‌زن كرین و نوكه ژی ده‌لیڤه بۆ دروست ببیت د خیانه‌تێ كه‌ت.
ده‌نگێ ته دڤێت تۆلڤه‌كرن بیت ژ وان لایه‌نان یێن كو رۆژا قودسێ ساخ دكه‌ن و چار تبلان بلندكه‌ن و ئالایێ فه‌لستینێ ل ستویێ خوه دانن و به‌هیا بۆ مورسی دادنن، به‌لێ حازر نه‌بیت وه‌ك كورد هه‌ڤخه‌میا خوه بۆ عه‌فرینێ ده‌رببریت! دژی كریار و ره‌فتارێن په‌كه‌كێ به‌یانامه‌كێ ده‌ركه‌ت! هه‌لویسته‌كی ده‌رببریت دژی تۆبارانكرنا وه‌لاتێن هه‌رێمی بۆ ده‌ڤه‌رێن كوردستانێ! دژی ره‌فتار و بریارێن به‌غدا راوه‌ستیت ئه‌ون دژی هه‌رێمێ دئێنه‌كرن!
ده‌نگێ ته دڤێت تۆلڤه‌كرن بیت ژ وان لایه‌نان یێن كو هه‌ولا كۆده‌تایێ دایی د په‌رله‌مانێ كوردستانێ دا و د گوپیتكا قه‌یرانان دا خوه ڤه‌كێشای ژ حوكمه‌تێ و پرۆژێ حوكمه‌تا ئینقاز بلندكری بۆ ژناڤبرنا قه‌وارێ هه‌رێمێ!
ببۆرن پ یلان و خرابیێن ڤان لایه‌نان هند گه‌له‌كن ل هه‌مبه‌رى هه‌رێمێ و خه‌لكێ كوردستانێ دا ئێدی نائێنه هه‌ژمارتن!
ده‌نگێ ته دڤێت تۆلڤه‌كرن بیت ژ وان لایه‌نان یێن كو بێ هیڤیێ و بێ ئۆمێدیێ د ناڤ جڤاكی دا و تایبه‌ت ل ناڤ گه‌نجان دا به‌لاڤ دكه‌ت و گه‌نج و لاون ڤی وه‌لاتی هاندده‌ن بۆ تێكدانێ و وێرانكرنێ و بێزاركرنا وان! و وان بخوه چ پلان و پرۆژه نینن بۆ خزمه‌تكرنێ، به‌لكو به‌شه‌كن ژ پیلانێن دژی كوردستانێ دئێنه گێران!
هه‌ر ده‌نگه‌كێ بۆ پارتی نه‌بیت هه‌روه‌كی تو چه‌كه‌كی راده‌ستی لایه‌نێن دی دكه‌ی و مل ب ملێ ملیشیاتان رادوه‌ستیت و دژی كوردستانێ بكارئینیت! له‌وا بۆ پاراستنا كوردستانێ و به‌رسینگرتنا پیلانان و پاشه‌رۆژه‌كا گه‌شتر دڤێت پشت و په‌نا بین بۆ كاندیدێن پارتی و وێ هێزێ و چه‌كی راده‌ستی پارتی بكه‌ین بۆ بهێزكرنا كوردستانێ و پاراستنا ده‌ستكه‌فتان.
