شه‌ڕێ كوردایه‌تیێ ئێدی دێ ل به‌غدایێ بت..
شڤان سالم گولى
پشتی ململانه و پرۆپاگنده‌یێن حزب و ئالیێن سیاسی ب مه‌به‌ستا ده‌ربازبوونا جڤاتا نوونه‌رێن ئێراقێ و بداویهاتنا پرۆسا هه‌لبژارتنان، دیار هه‌ر پارته‌كا سیاسی ل گۆر هێز و سه‌نگا خوه یا سیاسی ب ژماره‌كا كورسیان ده‌ربازبوون و ئالی هه‌بووینه ژی تووشی شكه‌سته‌كا سه‌خت بوون.
گرنگ رێژا وان كورسیانه یا كوردان ل به‌غدایێ بده‌ستخستین،
و گرنگتر ژی ئه‌وه گه‌لو ئه‌ڤ ئالیێن سیاسی هه‌موو دێ بن ئه‌و هێزێن ده‌نگ و ماندیبوونا خوه بێخن پال خزمه‌تكرنا راسته‌قینه یا خاك و خه‌لكێ كوردستانێ یان پێچه‌وانه وه‌ك چاوا د گه‌ڕێن بۆریدا مه دیتن هنه‌ك ژێ بوون دارده‌ستێن ولاتێن هه‌رێمی و رێكخۆشكه‌ربوون سزادانا كوردستانێ وكوردستانیان، ژبۆ مه‌ره‌مێن خوه یێن حزبی یێن به‌رته‌نگ.
ئه‌وا پێدڤی ژی ئه‌وه كو خه‌لك د ڤی ماوێ داهاتی دا بینه‌رێ راسته‌قینه و دویر ژ هه‌ست و مه‌به‌ستێن به‌رته‌نگ یێ بۆیه‌ر و هه‌لویستان بت ل به‌غدایێ، داكو بشێن هه‌لسه‌نگاندنه‌كا راسته‌قینه یا ئالیان بكت بۆ هندێ كو بزانیت گه‌ڕا داهاتی پالپشت و پشته‌ڤانێ چ لیسته‌كێ بیت.
ئالیێن سیاسی ژی پێخه‌مه‌ت مانا خوه و بده‌ستخستنا ژماره‌كا زۆرتر یا ده‌نگدان د خۆلا داهاتی دا هه‌موو بزاڤ و چالاكیێن خوه بێخت خزمه‌ت ده‌ستخستنا مافێن هه‌رێم و وه‌لاتیێن هه‌رێمێ.
ب گۆتنه‌كا دی بێژین پارتێن كوردی پشتی داویهاتنا هه‌لبژارتنان پێدڤیه شه‌ڕێ كوردایه‌تیێ ببنه هۆلا جڤاتا نوونه‌رێن ئیراقێ
و سوود ژ سه‌ربۆڕا وان كه‌سێن د خۆلا بۆری دا وه‌ربگرن كو بووینه ستریێ بنێ پێن هه‌رێمێ كا چاوا ژ ره‌حما ده‌نگێن خه‌لكێ زۆره‌ك ژ وان بێبه‌هر مان و چوون د زبلدانا مێژوویێ دا د ڤی چارچووڤه‌یی دا ئۆمێد گه‌لێ كورد ئه‌وه هه‌موو هێزێن كوردی یێن سه‌ركه‌فتی ببن ئێك هێز و خودان ئیراده‌كا كوردپه‌وه‌ریێ ژ به‌ر كو هێزا راسته‌قینه د ئێكگرتنه‌كا راسته‌قینه دایه.
هه‌ر چه‌نده ئه‌ڤ ئۆمێده هنه‌ك لاوازه، لێ وه‌ك ئه‌ندامه‌كێ پارتی بێ دودلی دبێژم هه‌ر ئه‌ندامه‌كێ هه‌ر ئالیه‌كێ سیاسی كوردانه هه‌ولویست بت، پارتی دزانین و شانازیێ پێ دبین ژ به‌ر ئامانج و سه‌ركێشیا مه كوردایه‌تی یه، له‌و ژی مه درووشمێ هه‌ر كه‌سێ پارتی بت كوردایه‌تیێ دكت و هه‌ر كه‌سێ كوردایه‌تیێ دكت پارتیه به‌رز كریه.
