پێنگاڤه‌كا دی
ژ نڤیسینا: رۆب هۆپكۆت(1) Rob Hopcott
وه‌رگێڕان : شه‌مال ئاكره‌یی
پێنگاڤه‌كا دی و دێ وێ كورسیكا كه‌ڤن كو ژ به‌ری هاتیه دروستكرن ل سه‌ر گۆپیتكا چیای بینم. دیمه‌نێ وان داروبارێن خه‌ملدار یێن ل درێژاهیا رێكا من د رێز و بێهنا وان یا خوه‌ش، هه‌موو نه‌ستێن من سه‌رخوه‌ش ده‌كه‌ن. دوور ژ گۆپیتكا چیای، ده‌ریایا شین، په‌راڤێن كه‌نالێ پریستۆل(2) دده‌ته به‌ر پێلێن خوه.
گۆپالێ من یێ كو من ژ دارا سێڤه‌كا ل ژێریا گه‌لی بڕی و ل رێڤه‌چوونێ پشدانیێ ل سه‌ر دكه‌م، هاریكارێ منه ژ ئیشا هه‌ودانا گه‌هان ده‌ما رادوه‌ستم و ل زۆركێن ئه‌كسمۆر(3) یێن مینا پێلان ب سه‌ر دكه‌ڤم و ل وی گه‌لی یێ من ل درێژاهیا ژیانا خوه حه‌ز ژێ كری، دنێڕم.
ئه‌ز نزانم، چما بلووره‌كا داری یا كه‌ڤن هه‌رتم د ده‌ستێ من یێ دی دایه. ئه‌و بلوورا من یا داری یه.. تشته‌كێ سه‌یره ئه‌ز ل گه‌ل خوه هه‌لدگرم و دبه‌مه گوپیتكا چیای، لێ ب راستی ئه‌ز پێ ئارام دبم، بلوورا من ل خوه‌شترین ده‌مێن ژیانا من هه‌ر ل گه‌ل من بوویه.
مه ب هه‌ڤڕا، موزیك دژه‌نی. هنده‌ك جاران ئه‌م ب تنێ بووین، هه‌نده‌ك جاران ژی بۆ ده‌مژمێرێن درێژ یێن تژی ژ به‌خته‌وه‌ریێ ل گه‌ل هاڤالێن خوه بووین. چاڤ دگرنژین، و له‌شێن مه ژی خوه دهه‌ژاند، ریتما ئاوازان ته‌ڤلی هه‌ڤ دبوو، كڤانێن كه‌مانجه‌یان بلند و نزم دبوون. ده‌نگێ بلوورا من هه‌رتم، ل ده‌مێ گونجایی یێ بلند بوو، مینا ده‌نگێ چڤیكا به‌ره‌شه، و ته‌ڤی ده‌نگ و میلۆدیان دا دبوونه ته‌ڤنه‌ك ژ ئاوازێن رند.
خوه‌شته‌ڤیا من، هه‌تا رۆژا مالئاڤاهی ژی ل من كری، كه‌مانجه دژه‌نی. بۆ سالێن درێژ تاكه ئه‌ڤینا من بوو، پشتی چووی ژی چو ئه‌ڤینێن دی جهێ وێ نه‌گرتن. د نێڤ وان هه‌موو كه‌سێن كو مۆزیك مه ب هه‌ڤڕا گرێ دده‌ت، وێ ب تنێ دكاری بچیته د نێڤ كووراتیێن من دا.
ئاوازێن وێ، وره‌یا من به‌ر ب ئه‌ڤرێن سپی بلند و پایه‌دار دكر، وان ئاوازان د نێڤ گر و زوورك و گوندێن دلڤه‌كه‌ر دا سه‌ما دكر. مه ب ئه‌ڤینا خوه یا درێژ، ب هه‌ڤه‌ڕا ده‌مێن خوه‌ش دبۆراندن، مه ب دله‌كێ ئارام رۆژێن ژیانا خوه ده‌رباز دكرن. ئه‌ڤه ئه‌و گره یێ ئه‌م چه‌ندین جاران لێ ب سه‌ردكه‌فتین.
ب تنێ پێنگاڤه‌ك مایه و دێ گه‌همه وێرێ. بای د نێڤ تاكێن وێ دارا مه ڕا دستری، و تیرۆژكێن زراڤ یێن رۆژێ د نێڤ ئه‌ڤران ڕا خوه ڤه‌ددزی و ب رۆناهیا خوه و ئه‌و كورسیكا خوه‌لیكی یا كه‌ڤن كو ژ به‌ری هاتبوو چێكرن و گه‌له‌ك جاران ئه‌م ل سه‌ر دروونشتین رۆهن دكر. ل جهه‌كی ئامیرێ كه‌مانجێ دهاته ژه‌نین و با مینا ئۆركسترایێ ب ده‌نگه‌كێ نزم دپه‌یڤی. پینگاڤه‌كا دی، و دێ من باشتر گوه لێ بیت. با ل ڤێ سپێده‌هیا گولانێ مینا كریستاله‌كی یه، و كه‌سه‌كی گازی من دكر و دگۆت: نه‌ترسه!.
هه‌ر ده‌ما له‌شێ من یێ پیر ل سه‌ر ڤێ كورسیكا سار و ره‌حه‌ت دروونیت، هه‌ستێ ب ئارامیێ دكه‌م. جاره‌كا دی بلوورا خوه كه‌مه د نێڤ لێڤێن خوه دا. ئۆركسترا گه‌هشته لوتكه‌یا خوه و ئاوازا كه‌مانجه‌یا خوه‌شته‌ڤیا من ته‌ڤلی ده‌نگێن ئۆركسترایێ، بلند و نزم دبیت و پتر ژ هه‌موو رۆژێن ل ئه‌سمانی كه‌مانجه دبرسقیت.
هه‌ناسه‌یه‌كا دی و میلۆدیایه‌كا دی، و جاره‌كا دی ئه‌ز و خوه‌شته‌ڤیا خوه دێ هه‌ڤگرینه‌ڤه.
1- رۆب هۆپكۆت: رۆژنامه‌ڤان و چیرۆكنڤیس و مۆزیكژه‌نه‌كێ به‌ریتانی یه.
2- كه‌نالێ بریستۆل: دكه‌ڤیته د نێڤبه‌را باشوورێ وێلز و باشوورێ رۆژئاڤایێ ئینگلته‌را دا.
3- ئه‌كسمۆر: ده‌ڤه‌ره‌كا چیایی یا ڤه‌كری یه دكه‌ڤیته رۆژئاڤایێ سومه‌رست و باكوورێ دیڤۆن ل باشوورێ رۆژئاڤایێ ئنگلته‌را.
ژیده‌ر:
https://www.ahewar.org/debat/show.art.asp?aid=217689
