وه‌زیره‌كێ به‌رێ یێ ئاكپارتیێ: ئه‌ردۆغانی توركیا تووشی گه‌له‌ك كاره‌ساتان كریه
ب، سه‌رجان مه‌حمود:
وه‌زیره‌كێ به‌رێ یێ حوكمه‌تا ئه‌ردۆغانی دیار دكه‌ت كو ئه‌ردۆغانی توركیا تووشی گه‌له‌ك ئاریشان كریه، هه‌كه توركیا بڤێت بالیۆزێن ده‌ه وه‌لاتان ده‌رخینیت ئه‌و یه‌ك دێ بیته ئه‌گه‌رێ هندێ كو توركیا تووشی قه‌یرانه‌كا گه‌له‌ك مه‌زن ببیت، چونكو نها ژی توركیا تووشی قه‌یرانه‌كا مه‌زن یا سیاسی و ئابووری بوویه.
پشتی كو بالیۆزێن ئه‌مریكا و ٩ وه‌لاتێن ئورۆپا داخواز ژ حوكمه‌تا توركیا كرن كو هه‌ر یه‌ك ژ سه‌لاحه‌دین ده‌میرتاش هه‌ڤسه‌رۆكێ به‌رێ یێ هه‌ده‌پێ و ئۆسمان كاڤالا ئازاد بكه‌ن، ره‌جه‌ب ته‌یب ئه‌ردۆغانێ سه‌رۆك كۆمارێ توركیا راگه‌هاند كو وی بریار دایه ده‌ه بالیۆزێن كو داخوازا ئازادكرنا ئۆسمان كاڤالا خوه‌دانكارێ ناسكری یێ توركیا كرینه ژ توركیا ده‌رخینن و گۆت: (ڤێرێ توركیا یه و هه‌ر بالیۆزه‌ك كو توركیا ناس نه‌كه‌ت و ژ توركیا تێنه‌گه‌هیت دێ ژ توركیا ده‌ركه‌ڤن و جهێ وان ل وه‌لاتێ مه نینه و هه‌ر تشتێ پێدڤی بكه‌ت ئه‌م دێ ل دژی وان بالیۆزان كه‌ین و ب ئاشكرا دبێژم جهێ وان ل وه‌لاتێ مه نینه).
ل ئالیێ دی یاشار یاكیش كو د كابینا ئێكێ یا حوكمه‌تا ئه‌ردۆغانی دا وه‌زیرێ ده‌رڤه بوو، د داخۆیانیه‌كێ دا بۆ ده‌نگێ ئه‌مریكا راگه‌هاند كو پێنگاڤا ده‌رخستنا بالیۆزێن ئه‌مریكا و وه‌لاتێن ئورۆپا پێنگاڤا به‌ری راگه‌هاندنا شه‌ری یه و گۆت: (ئه‌ڤ تشتێ كو ئه‌ڤرۆ ل توركیا روو دده‌ت چو ده‌مه‌كی روو نه‌داینه و هه‌كه تو بالیۆز و دبلۆماتكاران سنۆرداش بكه‌ی دێ توركیا تووشی قه‌یرانه‌كا مه‌زن یا دبلۆماسیێ بیت و د زمانێ دبلۆماسیێ دا كاره‌كێ وه‌سا دهێته رامانا پێنگاڤا راگه‌هاندنا به‌ری شه‌ری و پشتی ڤێ پێنگاڤێ ده‌ریێن دبلۆماسیێ دهێنه داخستن و هه‌ر ده‌ه ده‌وله‌تێن كو بالیۆزێن وان بهێنه ده‌رخستن ژی بێگومان دێ ب هه‌مان ره‌نگی به‌رسڤا توركیا ده‌ن و دێ توركیا تووشی زیانێن مه‌زن بیت و دڤێت هه‌ر كه‌س باش بزانیت كو كاره‌ك وه‌سا د به‌رژه‌وه‌ندیا توركیا دا نینه).
یاشار یاكیش كو به‌ری ببیته وه‌زیرێ ده‌رڤه بالیۆزێ توركیا بوو، راگه‌هاند ژی كو بریارا ئه‌ردۆغانی یا ده‌رخستنا ده‌ه بالیۆزێن وه‌لاتێن رۆژئاڤایی كاره‌ك گه‌له‌ك ب مه‌ترسیه، یان ئه‌ردۆغان نزانیت كا چ دكه‌ت یان ژی دڤێت توركیا تووشی قه‌یرانه‌كا گه‌له‌ك مه‌زنتر ژ یا نها بكه‌ت و گۆت: (نها توركیا تووشی قه‌یرانه‌كا گه‌له‌ك مه‌زن هاتیه، توركیا ژ ئێكه‌تیا ئورۆپا گه‌له‌ك دوور كه‌فتیه، په‌یوه‌ندیێن توركیا ل گه‌ل پرانیا وه‌لاتێن ئورۆپا تێك چووینه، به‌ری نها ئه‌ردۆغانی گه‌له‌ك بزاڤ كرن كو د سه‌ره‌دانا خوه یا بۆ ئه‌مریكا دا هه‌ڤدیتنه‌كێ ل گه‌ل بایدنی بكه‌ت، لێ سه‌رۆكێ ئه‌مریكا به‌رهه‌ڤ نه‌بوو ل گه‌ل ئه‌ردۆغانی كۆمبیت، ئه‌و یه‌ك ژی نیشا دده‌ت كو ئێدی وه‌كو به‌رێ كه‌س حسابێ بۆ توركیا ناكه‌ت، ژ به‌ر هندێ ژی ب جهێ كو توركیا كار بكه‌ت په‌یوه‌ندیێن خوه ل گه‌ل ئه‌مریكا و وه‌لاتێن ئێكه‌تیا ئورۆپا باش بكه‌ت ئه‌ردۆغان نها به‌رۆڤاژی هندێ كار دكه‌ت و ئه‌و یه‌ك ژی بێگومان دێ زیانێن خوه یێن گه‌له‌ك مه‌زن بۆ توركیا هه‌بن).
هه‌ژی ئاماژه‌پێدانێ یه كو سه‌رۆك كۆمارێ توركیا دخوازیت بالیۆزێن ئه‌مریكا، ئه‌لمانیا، دا‌نیمارك، فنله‌ندا، فره‌نسا، هۆله‌ندا، سوید، كه‌نه‌دا، نه‌رویج و نیوز‌له‌ندا یێن ل توركیا ژ توركیا ده‌رخینیت و نها هه‌موو ئالی چاڤه‌رێی وه‌زیرێ ده‌رڤه یێ توركیا نه دا بزانین كا دێ بریارا وی چ بیت.
ئه‌و یه‌ك د ده‌مه‌كێ دایه كو پشتی داخۆیانیا ئه‌ردۆغانی سه‌رۆكێ په‌رله‌مانێ ئورۆپا ژی راگه‌هاند كو وه‌لاتێن ئورۆپا ل هه‌مبه‌ر گه‌فێن ئه‌ردۆغانی بێده‌نگ نابن چونكو ئه‌ردۆغانی توركیا تووشی گه‌له‌ك ئاریشان كریه و هه‌كه توركیا وان ١٠ بالیۆزیان ده‌رخینیت وی ده‌می دێ بۆ هه‌ر كه‌سه‌كێ ئاشكرا بیت كو سیسته‌مێ توركیا بوویه سیسته‌مه‌ك ل دژی دیموكراسیێ.
