ئاژانسه‌كا رۆسیا: رۆسیا ل دژی هه‌بوونا هه‌رێمه‌كا كوردی ل سووریێ نینه
ئه‌ڤرۆ:
دو به‌رپرسێن رۆسیا دیار كرینه كو رۆسیا ل دژی ئاڤابوونا هه‌رێمه‌كا كوردی ل سووریێ نینه، چونكو به‌رپرسێن كوردی بۆ رۆسیا دیار كرینه ئه‌و ل دژی پارچه‌بوونا ئاخا سووریێ نینه و وان دڤێت د چارچۆڤێ سووریایه‌كا نوو و دیموكراتی دا بژین و ئه‌و یه‌ك ژی ب دلێ رۆسیا یه.
ل گۆر راپۆرته‌كا ئاژانسا سپوتینگ یا رۆسیا دو به‌رپرسێن رۆسیا د سه‌ره‌دانا خوه دا یا بۆ باژێرێ قامشلۆ یێ رۆژئاڤایێ كوردستانێ دا ل گه‌ل فه‌رماندارێن هێزێن سووریا دیموكرات كۆمبووینه و د كۆمبوونێ دا به‌حسێ ره‌وشا نوو یا سووریێ هاتیه كرن و به‌رپرسێن رۆسیا ژی دیار كرینه كو دڤێت ئاریشا نها د ناڤبه‌را كوردان و شامێ دا بهێته چاره‌سه‌ركرن و دڤێت جاره‌كا دی هه‌ڤدیتن ده‌ستپێ بكه‌ن، به‌رپرسێن كوردی ژی دیار كرینه كو دڤێت شام دانپێدانێ ب رێڤه‌به‌ریا خوه‌سه‌ر بكه‌ت و ده‌ستهه‌لاتێن هه‌رێمی ل سووریێ بهێنه زێده‌كرن.
ل گۆر راپۆرتێ به‌رپرسێن رۆسیا دیار كرینه كو ئه‌و ل سه‌ر چه‌ندین خالان بۆ پاشه‌رۆژا سووریێ كار دكه‌ن و دڤێت پرسا كوردی و هه‌موو پرسێن دی د چارچۆڤێ دستوورێ نوو یێ سووریێ دا بهێته چاره‌سه‌ركرن، لێ ژ به‌ر كو ئالیێن ئۆپۆزسیۆنێ ئاریشان دروست دكه‌ن هه‌تا نها بابه‌تێ دستوورێ نوو یێ سووریێ نه‌هاتیه چاره‌سه‌ركرن و ئاریشه د به‌رده‌وامن، لێ رۆسیا پشته‌ڤانیێ ل هندێ دكه‌ت كو دستوورێ نوو یێ سووریێ ببیته ژێده‌ریێ چاره‌سه‌ریا هه‌موو پرسێن سووریێ ب تایبه‌تی ژی پرسا كوردی.
به‌رپرسێن كوردی ژی دیار كرینه كو دڤێت رۆسیا رێ نه‌ده‌ت كو توركیا ده‌ست ب ئۆپه‌راسیۆنه‌كا دی ل رۆژئاڤایێ كوردستانێ بكه‌ت چونكو ئه‌و یه‌ك دێ بیته ئه‌گه‌ر كو ره‌وشا باكورێ سووریێ ب گشتی ئالۆز ببیت، چونكو هێزێن سووریا دیموكرات هه‌تا نها پێگیری ب ئاگربه‌ستێ كرینه لێ توركیا و هێزێن سه‌ر ب وێ به‌رده‌وام هێرشی ده‌ڤه‌رێن ل ژێر كۆنترۆل وان دكه‌ن و ئاگربه‌ستێ بنپێ دكه‌ن.
ئه‌و یه‌ك د ده‌مه‌كێ دایه كو نها بابه‌تێ ئدلبێ ژی بوویه ئاریشه‌كا گه‌له‌ك مه‌زن د ناڤبه‌را رۆسیا و توركیا دا، توركیا هێزێن نوو ره‌وانه‌ی ئدلبێ كرینه و رۆسیا ژی داخواز ژ توركیا كریه كو هه‌موو هێزێن خوه ژ ئدلبێ ڤه‌كێشن لێ توركیا ژی دیار كریه كو ئاریشا ئدلبێ دێ بیته ئه‌گه‌رێ هندێ كو ب هزاران وه‌لاتیێن دی یێن سووریێ به‌رێ خوه بده‌نه توركیا و ئه‌و یه‌ك دێ ئه‌گه‌رێ روودانا گه‌له‌ك كاره‌ساتان، ژ به‌ر هندێ ژی دڤێت ئاریشا ئدلبێ ب رێیا دانوستاندنان بهێته چاره‌سه‌ركرن، لێ رۆسیا ژی دیار دكه‌ت كو هه‌تا هێزێن چه‌كدارێن سه‌ر ب توركیا ل ئدلبێ بن ئاریشه ناهێته چاره‌سه‌ركرن و دڤێت توركیا هێزێن خوه ڤه‌كێشیت و هه‌تا نها ژی توركیا یا رژده كو دێ هێزێن وێ ل ئدلبێ مینن.
چاڤدێرێن سیاسی ژی دیار دكه‌ن كو هه‌كه رۆسیا ب فه‌رمی پشته‌ڤانیێ ل مافێن كوردان بكه‌ت و ل دژی هه‌رێما خوه‌سه‌ر یا رۆژئاڤایێ كوردستانێ نه‌بیت ئه‌و یه‌ك دێ رێ بۆ گه‌له‌ك گوهۆرینێن باش ڤه‌كه‌ت، چونكو نها مه‌ترسیا هه‌ری مه‌زن ل سه‌ر پاشه‌رۆژا رۆژئاڤایێ كوردستانێ توركیا یه، هه‌كه رۆسیا و ئه‌مریكا رێ نه‌ده‌ن كو توركیا ده‌ست ب ئۆپه‌راسیۆنه‌كا نوو بكه‌ت وی ده‌می دێ گه‌له‌ك ده‌ستكه‌فتێن كوردان ل سووریێ هێنه پاراستن، ژ به‌ر هندێ ژی گرنگه كورد بشێن هه‌م پشته‌ڤانیا رۆسیا و هه‌م ژی پشته‌ڤانیا ئه‌مریكا بده‌ستڤه بینن و دڤێت د ئاستێ نێڤده‌وله‌تی دا ده‌ست ب بزاڤێن مه‌زن بكه‌ن.
