سه‌رۆك كۆمارێ به‌رێ یێ قوبرسا باكور ب توندی ئه‌ردۆغانی ره‌خنه دكه‌ت
ب، سه‌رجان مه‌حمود:
مسته‌فا ئاكنجی سه‌رۆك كۆمارێ به‌رێ یێ قوبرسا باكور یا تورك راگه‌هاند كو ل توركیا سیسته‌مێ تاكه‌كه‌سی یێ ئه‌ردۆغانی د وارێن ئابووری، سیاسی و جڤاكی دا توركیا بله‌ز به‌ر ب هلوه‌شاندنێ ڤه دبه‌ت و گۆت: (مخابن قوبرسا مه یا باكور ژی ب ته‌مامی كه‌ڤتیه ژێر كاریگه‌ریا سیسته‌مێ تاكه‌كه‌سی یێ توركیا و بۆ ڤێ چه‌ندێ ل قوبرسا باكور ژی ره‌وش رۆژ ب رۆژێ خرابتر دبیت و ل توركیا چ بهێته ئاخڤتن ده‌ستهه‌لاتا نها یا ل قوبرسا باكور ژی هه‌مان ئاخڤتنان دكه‌ت و ئه‌و یه‌ك بۆ پاشه‌رۆژا مه نه باشه و دڤێت ئه‌م ل ژێر كاریگه‌ریا ده‌ستهه‌لاتا ئه‌ردۆغانی ده‌ركه‌ڤین، ژ به‌ر كو سیسته‌مێ تاكه‌كه‌سی یێ ئه‌ردۆغانی توركیا د وارێن ئابووری، سیاسی و جڤاكی دا بله‌ز به‌ر ب هلوه‌شاندنێ ڤه دبه‌ت).
سه‌رۆكێ به‌رێ یێ قوبرسا باكور هه‌روه‌سا راگه‌هاند ژی كو توركیا ژ پیڤه‌رێن یاسایێن نێڤده‌وله‌تی دوور كه‌ڤتیه و گرتنا سه‌لاحه‌دین ده‌میرتاش هه‌ڤسه‌رۆكێ به‌رێ یێ هه‌ده‌پێ و ئۆسمان كاڤالا خوه‌دانكارێ ناڤدار و ب سه‌دان كه‌سێن سیاسه‌تمه‌دار نیشا دده‌ت كو توركیا د وارێ دادوه‌ریێ دا تێكچوویه و گۆت: (ده‌وله‌تا توركیا ل دژی كه‌سایه‌تیێن سیاسی و ره‌وشه‌نبیرێن ئۆپۆزسیۆن یێ ژ قوبرسا باكور ژی بریارێن توند وه‌ردگریت و نها هژماره‌ك زێده ژ كه‌سێن ناڤدار ل قوبرسا باكور نه‌شێن سه‌ره‌دانا توركیا بكه‌ن).
