به‌رپرسه‌كا ئه‌مریكا: دڤێت سه‌رۆك بایدن رێ نه‌ده‌ت توركیا ئێرشی باكورێ سووریێ دكه‌ت
ب، سه‌رجان مه‌حمود:
نادینا مائینزا سه‌رۆكا كۆمیسیۆنا ئازادیا بیروباوه‌ریان ل ئه‌مریكا راگه‌هاند كو توركیا به‌رهه‌ڤیان بۆ ئۆپه‌راسیۆنه‌كا سه‌ربازی ل دژی كوردێن سووریێ دكه‌ت و گۆت: (به‌ری نها د ئێرشێن تیرۆرستێن داعشێ و كۆمێن چه‌كدار و ئۆپه‌راسیۆنێن سه‌ربازی یێن توركیا دا كریستیانێن سووریێ و كێم نه‌ته‌وه‌یێن ل باكورێ سووریێ زیانه‌كا مه‌زن یا گیانی و ماددی دیتینه و نها به‌رهه‌ڤیێن توركیا بۆ شه‌ری جاره‌كا دی ژیانا وه‌لاتیێن كریستیان و كێم نه‌ته‌وان ل گه‌ل ئاكنجیێن باكورێ سووریێ دخیته ژێر مه‌ترسیێ و دڤێت ده‌ستهه‌لاتا ئه‌مریكا ژ نها ڤه پێرابوونێن پێدڤی وه‌ربگریت و ئاسته‌نگیان ل هه‌مبه‌ر ئۆپه‌راسیۆنه‌كا سه‌ربازی دروست بكه‌ت، چونكو هه‌كه ئه‌مریكا خوه بێده‌نگ بكه‌ت دێ توركیا ده‌ست ب كاره‌كێ وه‌سا ب مه‌ترسی كه‌ت كو بێگومان دێ ئه‌نجامێن وێ یێن خراب بۆ به‌رژه‌وه‌ندیێن ئه‌مریكا ل سووریێ و رۆژهه‌لاتا ناڤین ژی هه‌بن).
ناڤهاتیێ ئه‌و یه‌ك ژی دیار كر كو كوردێن سووریێ د شه‌رێ ل دژی داعشێ دا هه‌ڤپه‌یمانێ ئه‌مریكا بوون و گه‌له‌ك قوربانی دان، مخابن د ده‌مێ ده‌ستهه‌لاتا ترامپی دا هه‌لوه‌ستێ ئه‌مریكا گه‌له‌ك لاواز بوو و توركیا شیا هنده‌ك ده‌ڤه‌ران ل باكورێ سووریێ داگیر بكه‌ت و نها ژی رۆژانه ل وان ده‌ڤه‌ران زۆلم ل كوردان و نه‌ته‌وه‌یێن دی دهێته كرن، دڤێت سه‌رۆك بایدن رێ نه‌ده‌ت كو ئه‌زموونا چه‌ند سالێن بۆری دوباره ببیت.
د ڤێ مژارێ دا فه‌هیم تاشته‌كین رۆژنامه‌ڤان و نڤیسه‌رێ ناڤدار یێ توركیا ژی راگه‌هاند كو ده‌ستهه‌لاتا ئه‌ردۆغانی بۆ درێژكرنا ژیێ ده‌ستهه‌لاتا خوه ب هه‌موو ره‌نگه‌كێ دخوازیت ئێرشی رۆژئاڤایێ كوردستانێ بكه‌ت و گۆت: (د به‌رنامێ توركیا دا تل ره‌فعه‌ت، كۆبانێ، منبج و عه‌ین عیسا هه‌نه و هه‌ر چه‌نده ئه‌مریكا و روسیا هه‌تا نها گلۆپا كه‌سك بۆ ئۆپه‌راسیۆنه‌كا سه‌ربازی هلنه‌كرینه ژی وه‌سا دیاره ده‌ستهه‌لاتا ئه‌ردۆغانی دێ بكه‌ڤیته د ناڤ بزاڤه‌كا وه‌سا دا و به‌رده‌وام دخوازیت ئه‌مریكا و روسیا بۆ ئۆپه‌راسیۆنا سه‌ربازی رازی بكه‌ت و ژ ئالیێ خوه ڤه هێزێن سووریا دیموكرات ژی خوه بۆ شه‌ره‌كێ دژوار ئاماده دكه‌ن، چونكو ئه‌و ژی نه‌چارن به‌ره‌ڤانیێ ژ ئاخا خوه بكه‌ن).
ل ئالیێ دی سه‌رۆك ئه‌ركانێ سوپایێ روسیا ژی راگه‌هاند كو به‌رژه‌وه‌ندیێن وان یێن ل گه‌ل حوكمه‌تا سووریێ گه‌له‌ك گرنگن و نابیت ئالیه‌كێ ده‌رڤه گه‌فان ل ئێمناهیا ده‌ڤه‌رێ بكه‌ت و گۆت: (ل فرۆكه‌خانا قامشلۆ بنگه‌هه‌كا به‌رفره‌ه یا سه‌ربازی دروست دكه‌ین مه دڤێت د پاشه‌رۆژه‌كا نێزیك دا ئاخا سووریێ ب ته‌مامی ژ كۆمێن تیرۆرست و چه‌كدار پاقژ بكه‌ین و نابیت چو ده‌وله‌ت ئانكۆ هێزه‌كا بیانی ژی ئاخا سووریێ بۆ به‌رژه‌وه‌ندیێن خوه بكار بینیت و مه به‌ری نها ژی چه‌ندین جاران دیار كریه كو دڤێت هه‌موو ئالی پێكڤه كار بۆ چاره‌سه‌ریه‌كا سیاسی ل سووریێ بكه‌ن).
ل دووڤ نووچه‌یا نۆرت پرێس هێزێن ئه‌سمانی یێن روسیا ل فرۆكخانا قامشلۆ ل رۆژئاڤایێ كوردستانێ ده‌ست ب دروستكرنا بنگه‌هه‌كێ مه‌زن یێ سه‌ربازی بۆ فرۆكێن شه‌ری یێن روسیا كرینه و قامشلۆ ژ ئالیێ روسیا ڤه ژ به‌ر جهێ وێ یێ جۆغرافی گه‌له‌ك گرنگه و ل سه‌ر سنورێ ئیراقێ، توركیا و سووریێ یه و رۆسیا ژی دڤێت مفای ژ هندێ وه‌ربگریت.
ل ئالیێ دی دوهی سه‌رۆك كۆمارێ توركیا ره‌جه‌ب ته‌یب ئه‌ردۆغان و سه‌رۆكێ ئه‌مریكا كۆمبوون و به‌رپرسه‌كێ ئه‌مریكا ژی بۆ ئاژانسا رویترز یا نووچه‌یان دیار كر كو د كۆمبوونێ دا بایدنی هۆشداری دایه ئه‌ردۆغانی كو ب سه‌رێ خوه ده‌ست ب چو بزاڤان نه‌كه‌ت چونكو ئه‌و یه‌ك دێ ئه‌نجامێن خوه یێن خراب هه‌بن.
