سكرتێرێ گشتی یێ نه‌ته‌وه‌یێن ئێكگرتی هۆشداریێ دده‌ت
ئه‌ڤرۆ:
سكرتێرێ گشتی یێ نه‌ته‌وه‌یێن ئێكگرتی راگه‌هاند كو مخابن مه‌ترسیێن گه‌له‌ك مه‌زن ل سه‌ر پاشه‌رۆژا مرۆڤاتیێ هه‌نه، بڕینا دارستانان، تێكدانا ژینگه‌هێ و زێده‌بوونا غازێن مه‌ترسیدار بووینه ئه‌گه‌رێ هندێ كو سه‌قا زێده‌تر پیس ببیت و ئه‌و یه‌ك ژی بوویه مه‌ترسیه‌كا گه‌له‌ك مه‌زن ل سه‌ر مرۆڤاتیێ، مخابن ده‌ستهه‌لاتدارێن جیهانێ وه‌كو پێدڤی گرنگیێ ب ڤان بابه‌تان ناده‌ن و ئه‌و یه‌ك ژی دێ جیهانێ تووشی گه‌له‌ك كاره‌ساتان كه‌ت.
ئانتۆنیۆ گوتریش ئه‌و یه‌ك ژی دیار كر كو مخابن د كۆمبوونا وه‌لاتێن G20 دا وه‌كو پێدڤی به‌حسێ مه‌ترسیێن ل سه‌ر ژیانا مرۆڤان نه‌هاته كرن، بابه‌تێ گه‌رمبوونا ئه‌ردی، پیسبوونا ژینگه‌هێ و زێده‌بوونا غازێن مه‌ترسیدار ژ ئه‌نجاما دروستكرنا چه‌كێن مه‌ترسیدار ژ وان بابه‌تێن گه‌له‌ك گرنگن كو دڤێت ئێدی سنۆره‌ك بۆ وان تشتان بهێته دانان، دڤێت تێكدانا ژینگه‌هێ خه‌ما سه‌ره‌كی یا به‌رپرسێن جیهانێ بیت، چونكو نها پتر ژ هه‌ر ده‌مه‌كێ مه‌ترسی ل سه‌ر ژیانا مرۆڤان دروست بوویه و دڤێت ئه‌م هه‌موو پێكڤه جیهانا خوه ژ ڤان مه‌ترسیان قورتال بكه‌ین.
سكرتێرێ گشتی یێ نه‌ته‌وه‌یێن ئێكگرتی به‌حسێ بابه‌تێ كۆچبه‌ران و شه‌رێ نها ل جیهانێ ژی كر و راگه‌هاند كو دڤێت هه‌موو پرسێن جیهانێ ب رێیێن ئاشتیانه بهێنه چاره‌سه‌ركرن، چونكو هه‌تا شه‌ر به‌رده‌وام بیت دێ هه‌م زیان گه‌هیته ژینگه‌هێ و هه‌م ژی دێ ب هزاران وه‌لاتیێن سڤیل ژی نه‌چار بن كو كۆچبه‌ر بن، ئه‌و یه‌ك ژی نها بوویه ئاریشه‌كا گه‌له‌ك مه‌زن بۆ پرانیا وه‌لاتێن جیهانێ.
