ئاژانسه‌كا رۆسیا:توركیا و رۆسیا ل دۆر ئۆپه‌راسیۆنه‌كێ ل باكورێ سووریێ دانوستاندنان دكه‌ن
ئه‌ڤرۆ:
ئاژانسه‌كا رۆسیا دیار دكه‌ت كو چه‌ند رۆژن به‌رپرسێن توركیا و رۆسیا ل دۆر ده‌ستپێكرنا ئۆپه‌راسیۆنه‌كا نوو ژ ئالیێ توركیا ڤه ل باكورێ سووریێ ب تایبه‌تی ژی باژێرێ كۆبانێ دانوستاندنان دكه‌ن و هه‌تا نها ژی رۆسیا رازی نینه توركیا ده‌ست ب چو ئۆپه‌راسیۆنان بكه‌ت.
ئاژانسا سپوتینگ یا رۆسیا راگه‌هاند كو سه‌رۆك كۆمارێ توركیا ره‌جه‌ب ته‌یب ئه‌ردۆغان گه‌له‌ك رژده كو ده‌ست ب ئۆپه‌راسیۆنه‌كا نوو ل باكورێ سووریێ بهێته كرن، ئه‌ردۆغان دبێژیت هێزێن سووریا دیموكرات بووینه مه‌ترسی ل سه‌ر توركیا و دڤێت هه‌موو ده‌ڤه‌رێن سنۆری یێن ل گه‌ل سووریێ بكه‌ڤنه ژێر كۆنترۆلا توركیا لێ رۆسیا ژی ژ به‌ر هنده‌ك ئه‌گه‌ران رازی نینه كو توركیا كۆبانێ و هنده‌ك ده‌ڤه‌رێن دی یێن كوردی داگیر بكه‌ت، ژ به‌ر هندێ ژی چه‌ند رۆژن به‌رپرسێن هه‌ر دو وه‌لاتان ده‌ست ب دانوستاندنان كرینه و هه‌تا نها ژی دیار نینه كا دێ رۆسیا داخوازیا توركیا قه‌بوول كه‌ت یان نه.
ئه‌و یه‌ك د ده‌مه‌كێ دایه كو دو رۆژان به‌ری نها رۆسیا بیست فرۆكێن شه‌ری ل قامشلۆ بجه كرن و هه‌روه‌سا هێزێن رۆسیا ل كۆبانێ و چه‌ندین ده‌ڤه‌رێن دی یێن سنۆری ژی بجه بووینه و هنده‌ك ده‌زگه‌هێن راگه‌هاندنێ ژی به‌حسێ هندێ دكه‌ن كو رۆسیا ب چو ره‌نگه‌كێ نه‌ڤێت گرۆپێن سه‌ر ب توركیا كۆبانێ و ده‌ڤه‌رێن دی داگیر بكه‌ن و هه‌كه ئه‌و ده‌ست ب كاره‌كێ وه‌سا بكه‌ن دێ رۆسیا، رژێما سووریێ و هێزێن سووریا دیموكرات پێكڤه هێرشی وان كه‌ن، ژ به‌ر هندێ ژی نها ره‌وشه‌كا گه‌له‌ك ئالۆز ل باكورێ سووریێ هه‌یه و هه‌موو ئالیه‌كێ ژی خوه بۆ شه‌ری به‌رهه‌ڤ كرینه، لێ هه‌تا رۆسیا و ئه‌مریكا رازی نه‌بن توركیا نه‌شێت ده‌ست ب چو ئۆپه‌راسیۆنه‌كێ بكه‌ت.
ل ئالیێ دی ئالدار خه‌لیل ئێك ژ سه‌ركردێن په‌یه‌دێ ژی دوهی راگه‌هاند كو ئه‌و به‌رهه‌ڤن ب ره‌نگه‌كێ راسته‌وخوه ل گه‌ل رژێما به‌شاری ده‌ست ب دانوستاندنان بكه‌ن، چونكو پێدڤیه پرسێن ل سووریێ د چارچۆڤێ سووریایه‌ك نوو دا بهێنه چاره‌سه‌ركرن و هه‌روه‌سا وان دڤێت پرسا كوردی ژی ل گه‌ل شامێ چاره‌سه‌ر بكه‌ن، دڤێت شام ل هه‌مبه‌ر گه‌فێن توركیا بێده‌نگ نه‌بیت، چونكو بێده‌نگیا شامێ دێ وه‌سا كه‌ت كو توركیا ده‌ڤه‌رێن زێده‌تر ل سووریێ داگیر بكه‌ت و پاشی ژی توركیا ب چو ره‌نگه‌كێ ژ سووریا ده‌رناكه‌ڤیت و ئه‌و یه‌ك دێ بۆ پاشه‌رۆژا هه‌موو سووریێ گه‌له‌ك مه‌ترسیدار بیت، ژ به‌ر هندێ ژی باشتره شام داخوازیێن كوردان قه‌بوول بكه‌ت دا پرسێن هه‌ی بهێنه چاره‌سه‌ركرن و وی ده‌می توركیا ژی نه‌شێت ده‌ست ب چو ئۆپه‌راسیۆنان ل باكورێ سووریێ بكه‌ت.
چاڤدێرێن سیاسی ژی دیار دكه‌ن كو سه‌رۆك كۆمارێ توركیا ب هه‌موو ره‌نگه‌كێ كار دكه‌ت دا ئه‌مریكا و رۆسیا رازی بن دا توركیا ده‌ست ب ئۆپه‌راسیۆنه‌كا نوو ل باكورێ سووریێ بكه‌ت، توركیا دڤێت هه‌موو ده‌ڤه‌رێن سنۆری ب تایبه‌تی ژی كۆبانێ ژ ده‌ستێ كوردان ده‌رخینیت، چونكو ئارمانجا سه‌ره‌كی یا ئه‌ردۆغانی ئه‌وه دا ده‌ڤه‌ره‌كا مه‌زن ل سه‌ر سنۆرێ خوه یێ ل گه‌ل سووریێ كۆنترۆل بكه‌ت و وه‌كو ده‌ڤه‌ره‌كا ئارام بده‌ته نیاسین، وی ده‌می دێ چه‌ند ملیۆن عه‌ره‌بێن كو نها ل توركیا نه ل وێرێ هێنه بجهكرن و دێ وه‌سا دیموگرافیا رۆژئاڤایێ كوردستانێ ژی ب ته‌مامی هێته گوهۆرین، ژ بۆ هندێ ژی توركیا چاڤه‌رێی رازیبوونا ئه‌مریكا و رۆسیا یه، هه‌كه هه‌ر دو وه‌لات رازی بن توركیا دێ د زووترین ده‌م دا ده‌ست ب ئۆپه‌راسیۆنه‌كا نوو كه‌ت.
