ژ به‌ر كۆچبه‌ران پۆله‌ندا بارێ نه‌ئاسایی راگه‌هاند
ئه‌ڤرۆ:
وه‌زیرێ به‌رگریێ یێ پۆله‌ندا راگه‌هاند كو ب هزاران كۆچبه‌ر ل سه‌ر سنۆرێ وان كۆمبووینه و دخوازن ده‌ربازی پۆله‌ندا ببن و نها ره‌وش گه‌له‌ك ئالۆز بوویه، ژ به‌ر هندێ ژی وان ١٢ هزار سه‌رباز ل سه‌ر سنۆری بجه كرینه و ب هه‌ماهه‌نگی ل گه‌ل وه‌زاره‌تا ناڤخوه و هێزێن ل سه‌ر سنۆری كار دكه‌ن دا نه‌هێلن كۆچبه‌رێن نه‌ئاسایی ده‌ربازی پۆله‌ندا ببن.
ماریوس بواشتاك ئه‌و یه‌ك ژی راگه‌هاند كو وان نها بارێ نه‌ئاسایی ل پۆله‌ندا راگه‌هاندینه و ب هه‌موو ره‌نگه‌كێ كار دكه‌ن دا نه‌هێلن كۆچبه‌ر ده‌ربازی ئاخا وان ببن، چونكو ژماره‌كا ئێكجار زۆر كۆچبه‌رێن نه‌ئاسایی ل سه‌ر سنۆرێ وان ل گه‌ل بیلا رۆسیا كۆمبووینه و دخوازن ده‌ربازی پۆله‌ندا ببن.
ل گۆر ژێده‌رێن میدیایی ب هزاران كۆچبه‌ر ل سه‌ر سنۆرێ بیلارۆسیا و پۆله‌ندا كۆمبووینه و دخوازن ده‌ربازی پۆله‌ندا ببن دا بچنه ئێك ژ وه‌لاتێن ئێكه‌تیا ئورۆپا، لێ شه‌ڤا بۆری هێزێن سه‌ربازی یێن پۆله‌ندا دیار كرینه كو ئه‌و ب چو ره‌نگه‌كێ رێ ناده‌ن كۆچبه‌ر ده‌ربازی وه‌لاتێ وان ببن و هه‌كه ئه‌و نه‌چار بن دێ توندوتیژیێ ژی ل دژی وان كۆچبه‌ران بكار ئینن، چونكو پۆله‌ندا ئه‌و شیان نینن بشێت پێشوازیێ ل وان كۆچبه‌ران بكه‌ت كو ب ره‌نگه‌كێ نه‌قانوونی دخوازن ده‌ربازی پۆله‌ندا ببن.
