عه‌لی باباجان: توركیا تووشی مه‌زنترین قه‌یران د دیرۆكا خوه دا بوویه
ئه‌ڤرۆ:
سه‌رۆكێ پارتا دیموكراسی و پێشكه‌فتن یا توركیا راگه‌هاند كو وی سالا ٢٠١٥ هه‌ست ب ره‌وشا خراب یا توركیا كربوو لێ خوه بێده‌نگ كر و دیار دكه‌ت كو ئه‌و په‌شیمانه و پێدڤی بوو وی ده‌می راستیا هه‌ی بۆ خه‌لكێ توركیا ئاشكرا كربا، چونكو نها توركیا تووشی مه‌زنترین قه‌یران د دیرۆكا خوه دا بوویه.
عه‌لی باباجان سه‌رۆكێ پارتا دیموكراسی و پێشكه‌فتن DEVA بۆ ده‌زگه‌هێن راگه‌هاندنا توركیا دیار كر كو سالا ٢٠١٥ ئه‌ردۆغانی ده‌ستێوه‌ردان د كاروبارێن به‌نكێ و دادگه‌هان كر، وی ده‌می من هه‌ست پێكر كو دێ توركیا به‌ر ب چاره‌نڤیسه‌كا خراب ڤه چیت، لێ من بریارا دا كو بێده‌نگ بم و چ نه‌بێژم و گۆت: (نها ده‌مێ ئه‌ز هزرا خوه دكه‌م بریارا من وی ده‌می خه‌له‌ت بوو، چونكو ره‌وشا ئابووری و سیاسی یا توركیا رۆژ ب رۆژێ خرابتر لێ دهێت، چونكو نها گه‌له‌ك كه‌س ل توركیا نه‌شێن نانێ رۆژانه بۆ خوه دابین بكه‌ن، لێ مخابن هه‌تا نها ژی ئه‌ردۆغان و پارتا وی راستیا هه‌ی قه‌بوول ناكه‌ن و ناخوازن دانپێدانێ ب شكه‌ستنا خوه بكه‌ن).
باباجان د پشكه‌كا دی یا ئاخڤتنا خوه دا ئه‌و یه‌ك ژی دیار كر كو ئه‌ردۆغانی كۆنترۆلا هه‌موو سازیێن ده‌وله‌تی و ب تایبه‌تی ژی یێ ئابووری كریه ده‌ستێ خوه، لێ ئابووری كارێ كه‌سێن بسپۆره و ئه‌ردۆغان ژی نه‌ڤێت راستیا هه‌ی قه‌بوول بكه‌ت و ژ به‌ر هندێ ژی نها توركیا تووشی قه‌یرانه‌كا گه‌له‌ك مه‌زن هاتیه و گۆت: (د راستی دا ئێدی سه‌رده‌مێ ده‌ستهه‌لاتا ئه‌ردۆغانی ل توركیا ب دووماهی هاتیه، دڤێت هه‌لبژارتنێن پێشوه‌خت ل توركیا بهێنه كرن دا خه‌لك ده‌ستهه‌لاتا نوو دیار بكه‌ت، ئه‌ردۆغان و كه‌سێن نێزیكی وی توركیا تووشی كاره‌ساته‌كا گه‌له‌ك مه‌زن كرینه، براستی ژی دڤێت كارێن گه‌له‌ك مه‌زن بهێنه كرن دا توركیا ژ قه‌یرانا نها قورتال بیت، ب چه‌ند سالان ژی ره‌وشا توركیا ئاسایی نابیت، دڤێت كارێن مه‌زن بهێنه كرن، ئه‌ردۆغان و كه‌سێن نێزیكی وی نه‌شێن توركیا قورتال بكه‌ن، چونكو سه‌رده‌مێ ده‌ستهه‌لاتا وی ب دووماهی هاتیه و دڤێت ب رێیا هه‌لبژارتنان خه‌لكێ توركیا ئه‌ردۆغانی و كه‌سێن نێزیكی وی ژ ده‌ستهه‌لاتێ دوور بكه‌ن).
سه‌رۆكێ پارتا دیموكراسی و پێشكه‌فتنێ ئه‌و یه‌ك ژی دیار كر كو توركیا رۆژ ب رۆژێ ژ ئورۆپا و ئه‌مریكا دوور دكه‌ڤیت، ئه‌ردۆغان هه‌ر رۆژ دبێژیت كو جیهان هه‌موو تووشی قه‌یرانا ئابووریێ بوویه، ئه‌و یه‌ك راست نینه و وی دڤێت وه‌سا خوه قورتال بكه‌ت و گۆت: (ئاكپارتیێ نها چو به‌رنامه بۆ چاره‌سه‌ریێ نینن، وان چو پرۆژه بۆ باشكرنا ره‌وشا ئابووریێ نینن، تنێ وان دڤێت ژیێ ده‌ستهه‌لاتا خوه درێژ بكه‌ن، كاره‌ساتا نها نیشا دده‌ت كو ئێدی خه‌لك ژ ره‌وشا نها بێزار بووینه، ژ به‌ر هندێ ژی ئه‌م دبێژین كو دڤێت ل توركیا هه‌لبژارتنێن پێشوه‌خت برێڤه بچن، چونكو براستی ژی ره‌وشا نها یا توركیا گه‌له‌ك خرابه و رۆژ ب رۆژێ خرابتر لێ دهێت و مخابن به‌رپرسێن نها توركیا برێڤه دبه‌ن تنێ هزرا خوه دكه‌ن و ژ ره‌وشا ژیانا خراب یا خه‌لكی ئاگه‌هدار نینن یان ژی بۆ وان گرنگ نینه كا خه‌لك د ره‌وشه‌كا چه‌ند خراب دانه).
ناڤهاتی د دووماهیا ئاخڤتنا خوه دا ئه‌و یه‌ك ژی دیار كر كو ئه‌ز دبێژم دڤێت سه‌رده‌مه‌ك نوو ل توركیا ده‌ستپێ بكه‌ت، پێدڤیا توركیا ب ده‌ستهه‌لاته‌كا نوو و دیموكراتی هه‌یه، دڤێت سیسته‌مێ توركیا ببیته سیسته‌مێ په‌رله‌مانی، چونكو نابیت ب تنێ كه‌سه‌ك بریارێ ل دۆر پاشه‌رۆژا هه‌موو خه‌لكێ توركیا بده‌ت.
