ئه‌ڤ ساله یه‌كه‌یێن ئاكنجیبوونێ ب بهایه‌كێ گونجای دێ هێنه فرۆتن
هه‌ولێر، قائید میرۆ:
بڕیاره ئه‌ڤ ساله گوهۆڕین بكه‌ڤنه د ئاڤاكرنا یه‌كه‌یێن ئاكنجیبوونێ دا و به‌رپرسه‌كێ ده‌سته‌یا وه‌به‌رهێنانێ ژی دبێژیت: ئه‌ڤ ساله یه‌كه‌یێن ئاكنجیبوونێ ب بهایه‌كێ ئه‌رزان و قه‌ڕێن دۆمدرێژ دێ هێنه فرۆتن.
موخلیس سه‌لیم، رێڤه‌به‌رێ گشتیێ قانوونی ل ده‌سته‌یا وه‌به‌رهێنانێ بۆ رۆژناما ئه‌ڤرۆ دیار كر، بڕیاره ئه‌ڤ ساله هژماره‌كا كۆنفڕانسان ل دۆر ره‌وشا وه‌به‌رهێنانێ ل هه‌رێما كوردستانێ بهێنه ئه‌نجامدان و گۆت: “ئێك ژ وان كۆنفڕانسێن، كو بڕیاره ل ده‌ستپێكا ئه‌ڤ ساله ل دۆر گه‌شه‌كرنا كه‌رتێ وه‌به‌رهێنانێ بهێته ئه‌نجامدان و كه‌سێن بسپۆر و كۆمپانیێن وه‌به‌رهێنانێ دێ پشكداریێ تێدا كه‌ن، چونكو كه‌رتێ وه‌به‌رهێنانێ پێدڤی ب گوهۆڕین و پێشكه‌فتنێ هه‌یه د هه‌موو بیاڤان دا”.
موخلیس سه‌لیم خویا ژی كر كو پلانا وه‌به‌رهێنانێ ئه‌ڤه‌یه، كو هه‌ر پڕۆژه‌یه‌كێ ئاكنجیبوونێ ئه‌ڤ ساله بكه‌ڤیته د بیاڤێ بجهئینانێ دا، دڤێت ره‌وشا ئابووری یا وه‌لاتیان ل به‌رچاڤ بهێته وه‌رگرتن و گۆت: “بهایێ یه‌كه‌یێن ئاكنجیبوونێ دگه‌ل ره‌وشا ئابووری یا وه‌لاتیان دێ هێنه گونجاندن، ب شێوه‌یه‌كی ب بهایه‌كێ ئه‌رزان و ب قستێن دۆمدرێژ بهێنه فرۆتن، هه‌تا هه‌موو وه‌لاتیه‌ك بشێت ژ كڕینا یه‌كه‌یێن ئاكنجیبوونێ مفادار ببیت و هه‌موو ته‌خێن جڤاكی ماف هه‌بیت ببنه خودان یه‌كه‌یێن ئاكنجیبوونێ”.
