هه‌ر وه‌به‌رهێنه‌ره‌كێ پڕۆژێ خوه ته‌مام نه‌كه‌ت دێ ژێ هێته وه‌رگرتن
ئه‌ڤرۆ:
ب بڕیارا ده‌سته‌یا گشتی یا وه‌به‌رهێنانێ، هه‌ر وه‌به‌رهێنه‌ره‌كێ پرۆژێ خوه ته‌مام نه‌كه‌ت دێ ژێ هێته وه‌رگرتن و راده‌ستی وه‌به‌رهێنه‌ره‌كێ دی هێته كرن.
رێڤه‌به‌رێ گشتی یێ یاسایی ل ده‌سته‌یا وه‌به‌رهێنانێ ل هه‌رێما كوردستانێ بۆ ئاژانسا خانی دیار كر، ده‌سته‌یا گشتی یا وه‌به‌رهێنانێ بڕیار دایه، ئه‌و پرۆژه‌یێن به‌ری نوكه نه‌هاتینه ته‌مامكرن و كار تێدا راوه‌ستیایی هه‌موو بهێنه تمامكرن.
موخلس سه‌لیم، رێڤه‌به‌رێ گشتی یێ یاسایی ل ده‌سته‌یا وه‌به‌رهێنانێ گۆت: “به‌ی نوكه هه‌ژماره‌كا پرۆژه‌یێن وه‌به‌رهێنانێ ژ ئه‌گه‌رێ قه‌یرانا دارایی و ئه‌گه‌رێن جودا ب نیڤی ماینه و نوكه كاركرن د هه‌ژماره‌كا ژ وان پرۆژان دا ده‌ست پێكریه و دێ هێنه ته‌مامكرن، هه‌روه‌سا بڕیارا ده‌سته‌یا گشتی یا وه‌به‌رهێنانێ ئه‌وه، كو ژ نوكه وێڤه هه‌ر وه‌به‌رهێنه‌ره‌كێ پرۆژێ خوه ته‌مام نه‌كه‌ت دێ ژێ هێته وه‌رگرتن و دێ راده‌ستی وه‌به‌رهێنه‌ره‌كێ دیتر هێته كرن”.
رێڤه‌به‌رێ گشتی یێ یاسایی ل ده‌سته‌یا وه‌به‌رهێنانێ ئاشكرا كر ژی، هنده‌ك پرۆژه ماینه و هه‌تا نوكه كاركرن تێدا ده‌ست پێ نه‌كریه، به‌لێ ل ده‌مه‌كێ نێزیك ده‌ست ب ته‌مامكرنا وان دێ هێته كرن و كێشێن وان دێ هێنه چاره‌سه‌ركرن، چونكی ئێك ژ پلانێن وه‌به‌رهێنانێ ب دووماهی ئینانا وان پرۆژانه یێن كێشه تێدا هه‌ین.
