حوكمه‌تا ئیراقێ باج ل سه‌ر كه‌لوپه‌لێن هه‌رێما كوردستانێ دانایه
هه‌ولێر، قائید میرۆ:
حوكمه‌تا ئیراقێ بڕیاره‌كا دی دژی هه‌رێما كوردستانێ ده‌ركریه و به‌رپرسه‌كێ وه‌زاره‌تا بازرگانی و پیشه‌سازیا هه‌رێما كوردستانێ ژی ئاشكرا كر، چه‌ند رۆژه‌كه به‌غدا باج ل سه‌ر وان كه‌لوپه‌لێن ب رێیا هه‌رێما كوردستانێ دچنه ده‌ڤه‌رێن دی یێن ئیراقێ دانایه.
فه‌تحی عه‌لی، شیره‌تكارێ وه‌زاره‌تا بازرگانی و پیشه‌سازیا حوكمه‌تا هه‌رێما كوردستانێ بۆ رۆژناما ئه‌ڤرۆ دیار كر، به‌ری چه‌ند سالان حوكمه‌تا ئیراقێ خالێن گومركی د ناڤبه‌را هه‌رێما كوردستانێ و پارێزگه‌هێن ناڤه‌ڕاست و باشوورێ ئیراقێ دانابوون، به‌لێ پشتی رێككه‌فتن هاتیه كرن ئه‌و خالێن گومركی هاتبوونه لادان و گۆت: “چه‌ند رۆژه‌كه ل هه‌موو وان ده‌رگه‌هێن د ناڤبه‌را هه‌رێما كوردستانێ و پارێزگه‌هێن ناڤه‌ڕاست و باشوورێ ئیراقێ دا دوباره خالێن گومركی هاتینه دانان و باج ئێخستیه سه‌ر وان كه‌لوپه‌لێن ل هه‌رێما كوردستانێ دچنه ده‌ڤه‌رێن د بن ده‌ستهه‌لاتا به‌غدا دا”.
فه‌تحی عه‌لی گۆتژی: “دانانا خالێن گومركی به‌روڤاژی قانوونێ و رێككه‌فتنا د ناڤبه‌را هه‌ردو حوكمه‌تان دایه، له‌وڕا ژی ب رێیا نوونه‌رێ حوكمه‌تا هه‌رێما كوردستانێ ل به‌غدا، وه‌زاره‌تا بازرگانی و پیشه‌سازیا هه‌رێمێ داخواز ژ حوكمه‌تا فیدڕالی كریه ئه‌ڤان خالێن گومركی نه‌هێلیت، چونكی دێ زیانێن مه‌زن بۆ بازرگان و وه‌لاتیان هه‌بن، هه‌موو ئه‌و كه‌لوپه‌لێن ژ ده‌رڤه دهێنه هه‌رێما كوردستانێ باجا گومركی ل سه‌ر هه‌یه و چێنابیت دوجاران باجێ بده‌ن”.
