هه‌یڤا بهێت جڤاتا بازرگانیا پاكستانی – ئیراقی دێ هێته دامه‌زراندن
ئه‌ڤرۆ، زنار تۆڤی:
قۆنسلێ فه‌خری یێ سریلانكا ل هه‌رێما كوردستانێ بۆ رۆژناما ئه‌ڤرۆ دیار كر، ل خزیرانا ئه‌ڤ ساله شانده‌كێ وه‌زاره‌تا چاندنێ یا حكومه‌تا هه‌رێما كوردستانێ دێ سه‌ره‌دانا وه‌لاتێ سریلانكا كه‌ت، ل مه‌ها ئادارێ جڤاتا بازرگانی یا پاكستانی و ئیراقی دێ هێته دامه‌زراندن و ئه‌و دێ بیته سه‌رۆكێ وێ جڤاتێ.
د. ئه‌حمه‌د جه‌لال، قۆنسلێ فه‌خری یێ سریلانكا ل هه‌رێما كوردستانێ گۆت: “بڕیاره ل مه‌ها خزیرانا ئه‌ڤ ساله، شانده‌كێ وه‌زاره‌تا چاندن و ژێده‌رێن ئاڤێ یا حكومه‌تا هه‌رێما كوردستانێ سه‌ره‌دانا سازیێن چاندنێ، زه‌ڤیێن چایێ و تاقیگه‌هێن سریلانكا بكه‌ن، داكو مفایی ژ سه‌ربۆرا وی وه‌لاتی د بیاڤێ چاندن و به‌رهه‌مئینانا چایێ دا وه‌ربگرن”.
ناڤهاتی گۆتژی: “بڕیاره ل 15 ئادارا ئه‌ڤ ساله، جڤاتا بازرگانی یا پاكستانی و ئیراقی ل به‌غدا بهێته دامه‌زراندن، كو دێ یا تایبه‌ت بیت د بیاڤێ بازرگانیێ دا د ناڤبه‌را هه‌ردو وه‌لاتان دا، ئه‌و جڤاته ژ 10 ئه‌ندامان پێك دهێت، پێنج ژ وان ئه‌ندامان كوردن و ئه‌ز سه‌رۆكێ وێ جڤاتێ مه، د نوكه دا پاكستانێ چو نوونه‌راتی ل هه‌رێما كوردستانێ نینن، له‌وما ئه‌ز راسپاردیمه ڤی كاری بكه‌م، باره‌گایێ وێ جڤاتێ ژی دێ ل هه‌ولێرا پایته‌خت بیت، هه‌روه‌سا سالانه هه‌رێما كوردستانێ رێژه‌كا مه‌زن یا چایێ ژ وه‌لاتێ سریلانكا دئینیت”.
