ب كوژمێ 997 ملیون دینارا پرۆژه ل دومیز د هێنه بجهئینان
ئه‌ڤرۆ، ئه‌میر ئه‌ترووشی:
سه‌رۆكێ باژێرڤانیا فه‌یدیێ راگه‌هاند، ب كۆژمێ نێزیكی ملیار دیناران، هژماره‌كا پرۆژه‌یان ل ناحیا فه‌یدیێ دهێنه ئه‌نجامدان و پتریا وان ژی پرۆژه‌یێن ڤه‌كرن و تێكه‌لكرن و قێركرنا جاده‌یێن ناڤخۆیی نه.
ئه‌ندازیار باوه‌ر سه‌گڤان، سه‌رۆكێ باژێرڤانیا فه‌یدیێ بۆ ئه‌ڤرۆ دیار كر، قوناغا ئێكێ ژ پروژێ ڤه‌كرن و قێركرنا جادێن نافخویی ل تاخێ هه‌لات ل دومیز ژلایێ تیمێن باژێرڤانیا فه‌یدیێ هاته ده‌ستپێكرن و گۆت: ئه‌ڤ پرۆژه ب كوژمێ 997 ملیون دینارا ب هه‌ڤكاری دگه‌ل پارێزگه‌ها نه‌ینه‌وا و ب سه‌رپه‌رشتیا ئه‌ندازیارێن باژێرڤانیا فه‌یدیێ دئێته ب جهئینان ژ بۆ خوشكرنا رێكێن هاتن و چوونا وه‌لاتیێن هێژا.
خویاژی كر، د گه‌ل ئه‌نجامدانا پرۆژه‌یان ژی، 153 دۆكان ل كومه‌لگه‌ها دومیز دێ هێنه دابه‌شكرن لسه‌ر خێزانێن كێم ده‌رامه‌ت. ل دووڤ راسپارده‌یێن د. عه‌لی ته‌ته‌ر، پارێزگارێ دهوكێ و پشتی كارێ كومه‌لگه‌ها هه‌ڤچه‌رخ یێن دومیز ب دوماهی هاتین دێ ده‌ست ب دابه‌شكرنا وان هێته‌كرن لسه‌ر خێزانێن كێم ده‌رامه‌ت و گۆت ژی: چه‌ندین پرۆژێن وه‌به‌رهێنانێ ل فه‌یدیێ هه‌نه ژ وان: پرۆژێ وارڤین ستی كو پێك دئێت ژ (700) خانیا، پرۆژێ وارستی ژ (1680) یه‌كێن ئاكنجیبوونێ پێك دئێت، هه‌روه‌سا پروژێ لالاڤ گولدن پارك كو پێك دئێت ژ (41) ئاڤاهیێن ستوینی یێن ئاكنجیبوونێ.
خویاژی كر، ل سالێن 2020 و 2021 ب كوژمێ هه‌شت ملیار دینارا ژلایێ پارێزگه‌ها دهوك و نه‌ینه‌وا ڤه. پروژێن خزمه‌تگوزاری یێن ڤه‌كرن و تێكه‌له‌كرن وقێركرنا جادێن نافخویی هاتینه بجهئینان. نێزیكی (30) جادێن نوی ل تاخێن جوراوجور هاتینه ڤه‌كرن. هه‌روه‌سا (13) پروژێن وه‌به‌رهێنان و بازرگانی ل سنورێ باژێرڤانیێ دئێنه بجهئینان ژ وان ژی پروژێ پیشه‌سازی یێ كارگه‌ها ئاری. پروژێ پیشه‌سازی یێ كارگه‌ها ته‌حین و دوشاڤێ. پروژێ وه‌به‌رهێنانێ یێ نه‌خوشخانه‌كا ئه‌هلی. پروژێ پیشه‌سازی یێ كارگه‌ها كارتون و سلیفونی. پروژێ خێرخوازی یێ خزمه‌تگوزاری یێ چێكرنا ١٥٣ دوكانا. پروژێ وه‌به‌رهێنانێ یێ چێكرنا یه‌كێن ئاكنجیبوونێ.
