پڕۆژه‌یه‌كێ مه‌زنێ پیشه‌سازی و چاندنێ ل سێمێلێ دێ هێته ئاڤاكرن
دهۆك، نه‌وزاد هلۆری:
ب مه‌ره‌ما په‌یداكرنا ده‌لیڤێن كاری و گرنگیدان ب كه‌رتێ چاندن و پیشه‌سازی، موله‌تا چێكرنێ ب ئێك ژ مه‌زنترین پرۆژێن وه‌به‌رهێنانێ ل ده‌ڤه‌رداریا سێمێلێ هاته‌دان و بڕیاره د ده‌مێ دو سالان دا بهێته چێكرن.
كوردۆ ئێحسان، رێڤه‌به‌رێ گشتیێ وه‌به‌رهێنانێ ل پارێزگه‌ها دهۆكێ بۆ رۆژناما ئه‌ڤرۆ گۆت: (هه‌ر ل ده‌ستپێكا كابینه‌یا نه‌هێ یا حوكمه‌تا هه‌رێما كوردستانێ، ئێك ژ سیاسه‌تێن وێ ئه‌و بوو، كو گرنگیێ ب كه‌رتێ وه‌به‌رهێنانێ بده‌ت، ب تایبه‌تی د وارێ چاندن و پیشه‌سازیا چاندنێ دا، داكو جۆتیار و وه‌لاتی بشێن گرنگیێ ب به‌رهه‌مێ خۆمالی بده‌ن و ده‌رفه‌تێن كاری ژی بۆ وه‌لاتیان په‌یدا ببن).
زێده‌تر گوت: (د مه‌ها شواتێ یا ئه‌ڤ ساله دا رێڤه‌به‌ریا گشتی یا وه‌به‌رهێنانێ ل پارێزگه‌ها دهۆكێ مۆله‌تا وه‌به‌رهێنانێ دا پڕۆژه‌یه‌كی، كو ژ مێژه‌یه داخوازی ل سه‌ر هه‌بوو، ب تایبه‌ت ته‌خا جۆتیاران، ئه‌و ژی كارگه‌ها به‌رهه‌مئینانا ئاڤا باجانسۆركان و مڕه‌بایێ و ساسێ و چاندنا شتلانه، كارگه‌ه دكه‌ڤیته سنوورێ ده‌ڤه‌رداریا سێمێلێ).
ناڤبری دیاركر ژی كو سه‌رمایێ پڕۆژه‌ی پێنج ملیۆن دۆلارن و ژلایێ وه‌هێنه‌ر هێرش ره‌شید و سه‌ركه‌ت عه‌بدولای هاتیه داخوازكرن و گوت: (بڕیاره پشتی دو سالان ژ وه‌رگرتنا مۆله‌تێ پڕۆژه تمام ببیت و بكه‌ڤیته د خزمه‌تا جۆتیاران دا، ئه‌ڤ پڕۆژه دێ بناڤێ كارگه‌ها جه‌م بۆ به‌رهه‌مئینانا ئاڤا باجانسۆركان و مڕه‌بایێ و ساسێ و چاندنا شتلێن باجانسۆركان بیت، پرۆژه ژ كارگه‌هێ، هۆله‌كا وه‌رگرتنا كه‌ره‌سته‌یان و جهێ دروستكرنا ئاڤا باجانسۆركان، جهێ داگرتنێ، جهێ به‌رهه‌مئینانا كه‌چه‌پێ و مایۆنێزێ عمبار و جهێ شووشتنا فێقی و عمبارا ساركه‌ر، تانكێن خوێ و شه‌كرێ، ژوورا پۆسته‌ری، ژوورا ته‌كنیكی، ژوورا كۆنترۆلی، تاقیگه‌هـ و ئۆفیسا ستافی، جهێ باركرنا به‌رهه‌مان، جهێ چاره‌سه‌ركرنا ئاڤا گران، قه‌پان، گۆڕه‌پانا راوه‌ستاندنا ترۆمبێلان و باخچه و جهێن ڤه‌كری پێك دهێت، كو ل سه‌ر رووبه‌رێ 62 هزار و 500 مه‌ترێن دوجار دێ هێته ئاڤاكرن و دكه‌ڤیته ده‌ڤه‌را سێمێلێ ل گرێگه‌ورێ).
