وه‌زیرێ پلاندانانێ: ئارمانجا مه كێمكرنا رێژه‌یا بێكاریێ یه د ناڤ گه‌نجان دا
ئه‌ڤرۆ:
وه‌زیرێ پلاندانانێ ل حوكمه‌تا هه‌رێما كوردستانێ دیار كر، ئه‌و كار بۆ كێمكرنا رێژه‌یا بێكاریێ د ناڤ گه‌نجان دا و په‌یداكرنا ده‌لیڤێن كاری بۆ وان دكه‌ن و دبێژیت: ئارمانجا مه كێمكرنا رێژه‌یا بێكاریێ یه د ناڤ گه‌نجان دا.
د. دارا ره‌شید، وه‌زیرێ پلاندانانێ ل حوكمه‌تا هه‌رێما كوردستانێ و زینه عه‌لی، نوونه‌را به‌رنامێ نه‌ته‌وێن هه‌ڤگرتی بۆ گه‌شه‌پێدانێ ل ئیراقێ ب به‌رهه‌ڤبوونا رۆبه‌رت جه‌ی په‌له‌دینۆ، قونسلێ ئه‌مریكا ل هه‌رێما كوردستانێ یاداشته‌كا لێكتێگه‌هشتنێ ئیمزا كر.
وه‌زیرێ پلاندانانێ د داخویانیه‌كا رۆژنامه‌ڤانی دا سوپاسیا پشته‌ڤانی و هاریكاریێن (USAID) و (UNDP) كر بۆ وه‌زاره‌تا پلاندانانێ ب مه‌ره‌ما ئه‌نجامدانا رووپێڤیا دامه‌زراوان ل سه‌ر ئاستێ بزنسێن (گه‌له‌ك بچووك، بچووك و ناڤنجی) ل هه‌رێما كوردستانێ.
د. دارا ره‌شید، وه‌زیرێ پلاندانانێ ل حوكمه‌تا هه‌رێمێ گۆت: “مه‌ره‌ما مه ژ ئه‌نجامدانا وێ رووپیڤیێ، كێمكرنا رێژه‌یا بێكاریێ و په‌یداكرنا ده‌لیڤێن كاری یه بۆ گه‌نجان و هاریكاریكرنا كه‌رتێ تایبه‌ته بۆ پشته‌ڤانیكرنا وان ل بزنسێن بچووك و ناڤنجی د بیاڤێن جودا دا، دیسا ئارمانجا حوكمه‌تا هه‌رێما كوردستانێ ژی یه، ب رێیا ئه‌نجامێن وێ رووپیڤیێ كێماسی و ئاسته‌نگێن هه‌مبه‌ر وان جۆره بزنسان دیار بكه‌ت و چاره‌سه‌ری و پشته‌ڤانیێن پێدڤی پێشكێشی وان بكه‌ت”.
ژ لایه‌كێ دیڤه قونسلێ ئه‌مریكا ل هه‌رێما كوردستانێ و نوونه‌را به‌رنامێ نه‌ته‌وێن هه‌ڤگرتی بۆ گه‌شه‌پێدانێ ل ئیراقێ دیار كرن كو ئه‌و دێ به‌رده‌وام هاریكاریا هه‌رێما كوردستانێ كه‌ن.
