چاڤدێریا بازرگانی شه‌ش لژنه بۆ چاڤدێریكرنا بازاری پێكئینان
دهۆك، له‌زگین جوقی:
به‌رپرسێ راگه‌هاندنا رێڤه‌به‌ریا چاڤدێریا بازرگانی ل دهۆكێ دیار كر، شه‌ش لژنه رۆژانه چاڤدێریا بازاری دكه‌ن و دبێژیت: ئه‌م داخوازێ ژ فرۆشیار و بازرگانان دكه‌ین، ڤێ ره‌وشێ بۆ خوه ب ده‌لیڤه نه‌بینن و بهایێ كه‌ره‌ستان گران بكه‌ن، چونكو هه‌ر فرۆشیاره‌كێ بهایێ كه‌ره‌ستان گران بكه‌ت دێ هێته سزادان.
شوكری شه‌فیق، به‌رپرسێ راگه‌هاندنا رێڤه‌به‌ریا چاڤدێریا بازرگانی ل دهۆكێ بۆ رۆژناما ئه‌ڤرۆ دیار كر، چاڤدێریا بازرگانی ل دهۆكێ بزاڤێن خوه چر كرینه بۆ چاڤدێریا بازاری چڕ كرینه، داكو بهایێ كه‌ره‌ستان گه‌له‌ك گران نه‌بیت و گۆت: “رۆژانه ژی شه‌ش لژنه دێ چاڤدێریا بازاری و بهایێ كه‌ره‌ستان كه‌ن، ب گشتی ل هه‌موو جیهانێ گرانبوونه‌ك چێبوویه و بهایێ كه‌ره‌ستێن خوارنێ گران بوویه، دیسا هاتنه خوارا بهایێ دینارێ ئیراقی هه‌مبه‌ر دۆلاری و دروستبوونا ئالۆزیان د ناڤبه‌را ده‌وله‌تان دا بووینه ئه‌گه‌ر بهایێ هنده‌ك كه‌ره‌ستان گران ببیت، لێ ئه‌م به‌رده‌وام دێ چاڤدێریا بازاری كه‌ین، داكو ئیستغلال نه‌هێته كرن”.
به‌رپرسێ راگه‌هاندنا رێڤه‌به‌ریا چاڤدێریا بازرگانی ل دهۆكێ ئاشكرا ژی كر كو هه‌ر بازرگان و فرۆشیاره‌كێ بهایان گران بكه‌ت دێ هێته سزادان و ژ كه‌سێ ناهێته قه‌بوولكرن، كو ل نك خوه بهایێ كه‌ره‌ستان گران بكه‌ت و پێرابوون د گه‌ل دا دێ هێنه وه‌رگرتن.
