پرۆژێ هایدروپاوه‌رێ دێره‌لۆك دێ كه‌نگی كه‌ڤیته كاری؟
ئامێدیێ، مه‌حمود نهێلی:
پرۆژێ هایدروپارێ دێره‌لۆك ئێكه پرۆژێن گرنگێن ده‌ڤه‌رێ كو ب تمامبوونا وی دێ شێت 37 میگاواتێن كاره‌بێ ب رێكا ئاڤێ به‌رهه‌م دئینیت و وه‌سا بریار بوو دووماهیا سالا 2021 ب داوی بهێت و بكه‌ڤیته كاری، لێ ژ به‌ر چه‌ند ئه‌گه‌ره‌كان كار تێدا ب داوی نه‌هات.
ئه‌ندازیار حه‌سه‌ن هروری، سه‌رپه‌رشتێ كارێ پرۆژه‌ی بۆ رۆژناما ئه‌ڤرۆ دیار كر، پرۆژێ هایدروپاوه‌رێ دێره‌لۆك ئێكه ژ پرۆژێن گرنگێن حكومه‌تا هه‌رێمێ و گۆت: ژ به‌ر كو ئه‌ڤه ئێكه‌م جاره ل كوردستانێ ب پرۆژه‌كی ب ڤی ره‌نگی بهێته چێكرن كو ب رێكا ئاڤێ كاره‌بێ به‌رهه‌م بینیت و دبێژنه ڤان جۆره پرۆژان یێن ژینگه‌ه پارێز و ئه‌ڤ پرۆژێ هایدروپاوه‌رێ دێره‌لۆك پێك دهێت ژ دوو یونتا و دێ شێت 37.6 میگاواتێن كاره‌بێ به‌رهه‌مئینت و دیار كر، كوژمێ 129 ملیون دیناران ژلایێ ئاژانسا جایكا یا یابانی ڤه بۆ ئه‌نجامدانا ڤی پرۆژه‌ی هاتینه ته‌رخانكرن و دهێته بجهئینان ژلایێ كومپانیه‌كا كوێتی ب ناڤێ فاراب گروپ و كومپانیا ئیرانی یا بناڤێ بلند پایه.
ناڤهاتی ئاشكرا كر، ل ژێر چاڤدێری و سه‌په‌رشتیا كومپانیه‌كا ئیتالی و وه‌زاره‌تا كاره‌بێ یا حكومه‌تا هه‌رێما كوردستانێ ڤه كارێ پرۆژه‌ی ب رێڤه دچیت.
ئه‌ندازیارێ سه‌رپه‌رشت حه‌سه‌ن هرۆری دیار كر، د پلانێ دا ئه‌ڤ پرۆژه ل 20/4/2022 بكه‌ڤیته د كاری دا و ب كاره‌با نیشتمانی ڤه بهێته گرێدان و ب كه‌ڤیته د خزمه‌تا هاولاتیان دا.
دیار كر، ئه‌ڤه ژبلی به‌رهه‌م ئینانا كاره‌بێ ئه‌ڤ پرۆژه‌ی دێ ئاریشا ڤولتیا كاره‌بێ ژی ل ڤێ ده‌ڤه‌رێ چاره‌سه‌ر كه‌ت كو به‌ری نوكه ئه‌ڤ ئاریشه ل ده‌ڤه‌رێ هه‌بوویه و ب تایبه‌ت كێمیا ڤۆلتیێ كارتێكرنا ل سه‌ر كارێ پرۆژێن ئاڤێ دكر.
ده‌ره‌بارێ گرنگیا ڤی پرۆژه‌ی ناڤهاتی دیار كر، كاره‌با ڤی پرۆژه‌ی دێ ب كاره‌با نیشتیمانی ڤه هێته گرێدان و دێ كارتێكرنێ كه‌ته سه‌ر زێده‌كرنا ده‌مژمێرێن كاره‌بێ و گۆت: كاره‌با وێ دێ یا گشتی بیت نه‌كو دێ بو ده‌ڤه‌ره‌كا دیار كری بیت و ئه‌ڤ جۆرێن به‌رهه‌مئینانا كاره‌بێ گه‌له‌ك گرنگیا خوه هه‌یه.
ناڤهاتی دیار كر، گه‌له‌ك جهێن دیتر یێن هه‌ی كو دێ دشیان دا بیت كاره‌بێ ب رێكا ئاڤێ به‌رهه‌م ئینن و گۆت: سه‌باره‌ت مه ئه‌ڤه ئێكه‌م جاره پرۆژه‌كی ب ڤی ره‌نگی ل ده‌ڤه‌رێ بهێته چێكرن و ته‌كه‌ستكر، گه‌له‌ك جهێن دیتر ل سه‌ر رووبارێ زێ و ل سه‌ر رووبارێ خابووری ژی هه‌نه پرۆژێن ب ڤی ره‌نگی لێ بهێنه چێكرن .
دیار كر، ئاماده‌كاری ژی هاتینه كرن هند پروژێن دیترێن ب ڤی ره‌نگی كو ژینگه پارێزن و مفا ژ ئاڤێ و سرۆشتی دهێته وه‌گرتن ل سنورێ پارێزگه‌ها دهوكێ بهێنه چێكرن.
