سه‌رۆكێ ده‌سته‌یا وه‌به‌رهێنانێ: ئه‌م د كه‌رتێن چاندن و پیشه‌سازیا خوارنێ دا پێدڤی ب وه‌به‌رهێنانا بیانی نه
ئه‌ڤرۆ:
سه‌رۆكێ ده‌سته‌یا گشتی یا وه‌به‌رهێنانێ ل هه‌رێما كوردستانێ دیار كر، گروپێ كۆمپانیێن ویلایه‌تا تكساس یا ئه‌مریكی دڤێت ل هه‌رێما كوردستانێ وه‌به‌رهێنانێ بكه‌ن و د بێژیت: شانده‌كێ وان كۆمپانیێن ویلایه‌تا تكساس سه‌ره‌دانا مه كرییه ل ده‌سته‌یا گشتی یا وه‌به‌رهێنانێ، كو ژ هه‌ژماره‌كا كۆمپانیێن ئه‌مریكی د بیاڤێ چاندن و پیشه‌سازی و بیناسازیێ دا پێك هاتبوون.
د. محه‌مه‌د شوكری، سه‌رۆكێ ده‌سته‌یا گشتی یا وه‌به‌رهێنانێ بۆ ئاژانسا خانی گوت: “گروپێ كۆمپانیێن ویلایه‌تا تكساس خواستا وێ چه‌ندێ هه‌یه ل كه‌رتێ وه‌به‌رهێنانێ پشكداریێ بكه‌ن و بۆ ڤێ مه‌ره‌مێ ژی داخوازیا په‌یداكرنا ده‌رفه‌تێن كاری ژ مه وه‌كو ده‌سته‌یا وه‌به‌رهێنانێ كر”.
د. محه‌مه‌د شوكری گۆتژی: “ئه‌م زێده‌تر د كه‌رتێن چاندن و پیشه‌سازییا خوارنێ دا پێدڤی ب وه‌به‌رهێنانا بیانی نه ل هه‌رێما كوردستانێ، ب تایبه‌تی ئه‌زموونا كۆمپانیێن ئه‌مریكی، مه چه‌ندین ده‌رفه‌تێن وه‌به‌رهێنانێ ژی ل كوردستانێ هه‌نه، مه بڕیار دا ب پێكئینانا تیمه‌كا هه‌ڤپشك بۆ هندێ په‌یوه‌ندی د ناڤبه‌را وه‌به‌رهێنانا هه‌رێما كوردستانێ و كۆمپانیێن ویلایه‌تا تكساس دا مكومتر لێبهێن”.
